Roma 8

Ya utaw na awun ni kanan ya Ispiritu Santo

1Na, ya kadég tadun na nyakasambuk da kan Kristu Jisus, diliꞌ da pa-emel-emelen na Tyumanem. 2Kay dun ni pagpakasambuk tadun kan Kristu Jisus, pigbagu la kitadun magi sa katulus na Ispiritu Santo, aw pigpaluwaꞌ da kitadun nan lekat adti pag-allang na salaꞌ aw adti pagdumala na kamatayen. 3Ya Uldin diliꞌ nan mabatug ya pagpaluwaꞌ kanaten lekat adti pagdumala na salaꞌ, kay diliꞌ tadun mabatug tumanen ya kadakulaꞌ na Uldin asuntu na oloꞌ kitadun utaw. Manang mabatug saba na Tyumanem ya pagpaluwaꞌ kanaten. Pigpadala nan asini tas na lupaꞌ ya kanan Iseꞌ pada yan ya magti-is sa kadaman na Tyumanem sa salaꞌ tadun, magi sa lawas nan na pigkalabu adti krus. 4Yanagaw magi sa pig-imoꞌ nan, nyatuman ya kadakulaꞌ na Uldin na Tyumanem adti kanaten na walaꞌ da dalug sa pagkaliman na pagka-utawun tadun adti imo-unun na malatay, kay dyumalug da kitadun sa Ispiritu Santo.

5Na, ya manga utaw na piggagad na pagkaliman na kanilan pagka-utawun mag-imoꞌ sa malatay, yan da oloꞌ ya gayed nilan pig-anenganeng ya maynan. Manang ya manga utaw na nyagagad na Ispiritu Santo, nyatibulluk baling ya kanilan anenganeng adti pagdalug sa Ispiritu. 6Kun ya anenganeng na utaw pigdumala͡an na pagkaliman na pagka-utawun nan adti pag-imoꞌ sa malatay, yan ya datengan nan ya pa-emel-emelen sakanan na Tyumanem na walaꞌ ya tyamanan. Manang kun ya Ispiritu Santo ya magdumala sa anenganeng na utaw, matagtun nan ya ginawa na walaꞌ ya katigkasan aw ya kalinaw. 7Kay ya utaw na gayed piggagad na kanan anenganeng adti pagkaliman na pagka-utawun nan, po-on sakanan na Tyumanem kay walaꞌ nan daluga ya manga suguꞌ dun ni Uldin na Tyumanem, aw ya tengteng matinaw diliꞌ nan mabatug dalugun. 8Yanagaw ya kadég na utaw na kenneꞌ pa nyagagad na pagkaliman na pagka-utawun nilan, diliꞌ silan makatutuk sa Tyumanem.

9Manang kamu, walaꞌ da dumalayi na pagkaliman na pagka-utawun mayu kay ya Ispiritu Santo yan da ya miggagad kamayu, kun tengteng nyeyaꞌ ya Ispiritu dun ni pagka-utawun mayu. Pangkay singalan utawa ya walaꞌ dun ni kanan ya Ispiritu ni Kristu, walaꞌ sakanan paka-akup kan Kristu. 10Manang kun awun si Kristu ni kamayu, pangkay matay ya lawas mayu asuntu na salaꞌ, manang magi sa Ispiritu na nyeyaꞌ dun ni tagsambuksambuk kamayu, matagtun mayu ya ginawa na walaꞌ ya katigkasan asuntu na pigdawat da kamu na Tyumanem kasiling na walaꞌ da ya salaꞌ. 11Aw ya Tyumanem na migmataw kan Kristu lekat adti pagkamatay magi sa katulus na Ispiritu nan na nyeyaꞌ dun ni kamayu, yan uman ya magmataw sa kamayu lawas magi sa Ispiritu nan na awun ni kamayu.

12Yanagaw, kay manga inulug na nyangintu-u, ka-ilangan tadun dalugun ya pagkaliman na Tyumanem aw diliꞌ da tadun pagdalugun ya pagkaliman na pagka-utawun tadun adti pag-imoꞌ sa manga salaꞌ. 13Kay kun kenneꞌ pa tadun dalugun ya pagkaliman na kanaten pagka-utawun, yan saba ya datengan tadun ya pa-emel-emel na Tyumanem na walaꞌ ya tyamanan. Manang kun tengteng tadun ayawan ya kanaten manga salaꞌ aw manga imo-unun na malatay magi sa tabang na Ispiritu Santo, matagtun tadun ya ginawa na walaꞌ ya katigkasan. 14Kay ya kadég na piggagad na Ispiritu Santo, silan ya manga mangayseꞌ na Tyumanem. 15Idtu muna, kasiling kamu na allang na gayed nyallek sa pagpa-emel-emel na tagtun kamayu. Manang adun, pigbagu la kamu na Ispiritu aw nya-imoꞌ da kamu mangayseꞌ na Tyumanem. Yanagaw walaꞌ da ya kakallekan tadun magpalapit kanan, aw magi sa Ispiritu nan mabatug da tadun ya pagpanawagtawag adti kanan na maglong “Kay Maꞌ.” 16Aw ya Ispiritu nan, yan ya migmatinaw adti kanaten na kitadun ya tengteng manga mangayseꞌ na Tyumanem. 17Aw asuntu na mangayseꞌ da kitadun nan, yanagaw madawat tadun ya manga pigpakang nan kanaten. Aw kun nyaka-agad da kitadun sa pagti-is ni Kristu, maka-agad kitadun uman makatagtun sa kadyawan na awun ni tas na langit eped nan.

Ya kadyawan na un pa dumateng sa manga mangayseꞌ na Tyumanem

18Na, mig-anenganeng aku na ya pagti-is tadun adun tagbiꞌ yeiy, kay to-o pa dakulaꞌ kagaya ya kadyawan na un bukasan kanaten na Tyumanem. 19Kay bekeꞌ oloꞌ na utaw manang dala uman ya kadég na inimo-an nan, alag silan nyiman na maksay da bukasan na Tyumanem kun singalan ya tengteng mangayseꞌ nan. 20Kay ya kadég na inimo-an nan, walaꞌ nilan ka͡apeti ya tud nan. Aw yan saba ya pagbayaꞌ na Tyumanem aw bekeꞌ na kanilan pagbayaꞌ. Manang ya kadég nilan 21nyiman na dumateng ya allaw na mabagu silan aw makaluwaꞌ lekat adti kanilan pagpakabetang na magkalat. Aw makasambuk silan dun ni kadyawan na pagpakaluwaꞌ na mangayseꞌ na Tyumanem. 22Kya-ede-an tadun na taman adun ya kadakulaꞌ na inimo-an na Tyumanem migpan-agele silan kasiling na ka͡ubayan na migti-is na un da ka͡utawan. 23Aw bekeꞌ oloꞌ na inimo-an nan ya migti-is manang kadég tadun uman na nyakadawat sa Ispiritu na yan ya muna pig-atag na Tyumanem. Mig-agele kitadun talana tyumagad sa allaw na bukasan na kitadun ya tengteng mangayseꞌ nan aw atagan na bagu na lawas na diliꞌ da magkamatay. 24Kay dun ni pag-iman yeiy, nyakaluwaꞌ da kitadun. Na, ya pag-iman na kyinitaꞌ da, bekeꞌ yan na pag-iman. Kay singalan utawa ya mig-iman sa kyinitaꞌ da nan? Walaꞌ saba! 25Manang kun pig-iman tadun ya walaꞌ pa tadun kita-a, padelegen tadun ya pagtagad sa un dumateng.

26Maynan uman, ya Ispiritu Santo gayed kanaten tyumabang dun ni kalumay na ginawa tadun. Kay walaꞌ tadun ka-ede-i kun unu ya umbaꞌ sekaten adti Tyumanem, manang ya Ispiritu, yan ya magpatengaꞌ kanaten adti kanan dun ni pagpanawagtawag tadun, aw nyanginayuꞌ pada kanaten dun ni tingeg na bekeꞌ na kana utaw. 27Ya Tyumanem, kya-ede-an da nan ya kadég na awun ni anenganeng na manga utaw. Aw kya-ede-an nan uman ya anenganeng na Ispiritu, kay yan ya magpanginayuꞌ adti kanan pada kanaten na manga mangintu-uway umbaꞌ sa pagbayaꞌ nan.

28Kya-ede-an da tadun na ya kadég na kanaten kya-agiyan un sumampet adti madyaw na tud na Tyumanem kay awun da dadan pigpalpa nan sa tagsambuksambuk kanaten, asuntu na pigtawag da kitadun nan aw pigginawa͡an tadun sakanan. 29Kay lekat pa asini muna pigpamalliꞌ da dadan na Tyumanem ya manga mangintu-u kanan. Aw yanagaw pigtani la nan silan na ma-imoꞌ kanan mangayseꞌ aw masiling ya bet nilan sa bet ni Jisus, pada ma-imoꞌ sakanan kamagulangan sa kadég tadun na nyangintu-u. 30Aw kun singalan ya pigtani la nan na ma-imoꞌ kanan mangayseꞌ, silan ya pigtawag da nan. Aw kun singalan ya pigtawag da nan, silan uman ya pigdawat nan kasiling na walaꞌ da ya salaꞌ. Aw kun singalan ya pigdawat da nan na walaꞌ ya salaꞌ, patasen nan silan.

Ya dakulaꞌ na pagginawa na Tyumanem kanaten

31Yanagaw, anenganengen tadun ya kadég yeiy. Kun pig-apitan kitadun na Tyumanem, walaꞌ saba ya pangkay sambuk na dumeg kanaten! 32Walaꞌ nan demetan ya kanan Iseꞌ manang pigtumbay nan baling na patayen adti krus pada sa kadég tadun. Kun pig-atag nan ya kanan Iseꞌ, walaꞌ saba ya diliꞌ nan atag kanaten. 33Singalan kaꞌ ya makapaglong na makasasalaꞌ ya manga utaw na pigpamalliꞌ da na Tyumanem? Walaꞌ saba! Kay pigdawat da kitadun na Tyumanem kasiling na walaꞌ da ya salaꞌ. 34Aw singalan uman ya makapaglong kanaten na pa-emel-emelen kitadun na Tyumanem? Walaꞌ saba! Kay si Kristu pigpatay da adti krus kalyu kanaten, aw pigmataw uman sakanan lekat adti pagkamatay. Aw adun, nyingkud da apit adti kalintu na Tyumanem aw nyanginayuꞌ sakanan pada kanaten.

35Walaꞌ ya maka-elet kanaten lekat adti pagginawa ni Kristu, pangkay pa apeten tadun ya pagti-is aw manga kalugan aw manga pagpamulayam aw getem, aw walaꞌ ya un tadun pagkadégkadég, aw ya manga kallekanan na un ma-imoꞌ, aw pangkay kun patayen pa kitadun. 36Awun pigsulat asini muna na maglong:

“Kay Tyumanem, asuntu sa pagpangintu-u nami kanmu, gayed nyakabetang ya pagka-utawun nami adti kalatayan.

Kasiling kami na manga karniro na un da tumba͡en.”#8:36 Mabasa adti Salmo 44:22.

37Pangkay maynan ya pagpakabetang tadun, manang mabatug tadun saba degen ya kadég yeiy magi sa tabang ni Kristu na to-o gyuminawa kanaten. 38Kay kya-ede-an da ku na walaꞌ ya maka-elet kanaten lekat adti pagginawa na Tyumanem. Pangkay pa ya pagkamatay aw ya pag-eyaꞌ tadun, aw manga anghil aw manga busaw. Aw bekeꞌ na kakaypengan tadun adun aw kakaypengan sa unu ya un pa dumateng. Aw bekeꞌ na katulus na diliꞌ tadun pagkita-en, 39dala ya awun ni dalem na langit, aw ya awun ni dalem na lupaꞌ, aw pangkay unu na pig-imoꞌ na Tyumanem. Diliꞌ yeiy maka-elet kanaten lekat adti dakulaꞌ na pagginawa na pigpakitaꞌ nan kanaten magi kan Kristu Jisus na kanaten Matas na Pangulu.

Currently Selected:

Roma 8: klgv

Highlight

Compare

Copy