Pigbukasan 2
2
Ya piglong ni Jisus adti manga mangintu-uway na awun ni Épéso
1“Sulata ya ini adti anghil na migtungguꞌ sa manga mangintu-uway na nyanimba adti syudad na Épéso: ‘Aku ya nyawid sa pitu ya bitun adi kalintu ku aw nyanaw dun ni tenga-tengaꞌ na pitu ya saleng na nyaka-indeg na alag bulawan. Aw ini ya un ku paglongun kamayu: 2Nya-edeꞌ aku sa manga imo-unun mayu aw sa pagud mayu aw sa kadugay na kamayu pagti-is. Aw kya-ede-an ku uman na diliꞌ mayu mati-is ya manga mig-imoꞌ sa malatay. Pigtandaꞌ mayu ya bet aw ya palna-u na manga utaw na sallong kunu apostolés. Aw kya-ede-an mayu na galu-un kadiꞌ silan. 3Nyati-is mayu ya madég na kamayu kya-agiyan asuntu sa pagpangintu-u mayu kanak, aw walaꞌ pagkalumay ya kamayu ginawa. 4Manang awun pagsalaꞌ ku kamayu: Migkatagbiꞌ da ya pagginawa mayu kanak, aw bekeꞌ da na kasiling na idtu na muna. 5Yanagaw anenganenga mayu ya kadakulaꞌ na pagginawa mayu kanak idtu muna. Pagselsel kamu aw imo-a mayu ya madyaw kasiling na pig-imoꞌ mayu idtu na bagu pa kamu nyangintu-u! Kun diliꞌ kamu magselsel, kawunan ta kamu aw kamangen ku ya saleng lekat adti kamayu. 6Manang awun uman madyaw na pig-imoꞌ mayu: Pigkele͡an mayu ya imo-unun na malatay na manga Nikolaytan na pigkele͡an ku uman.
7“ ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.
“ ‘Ya utaw na dumeg sa malatay, pakangan ku na makakan sa bunga na Kawuy na Maka-atag sa Ginawa na awun ni Para-iso na pigtagilan na Tyumanem.’
Ya piglong ni Jisus adti manga mangintu-uway na awun ni Ismirna
8“Sulata ya ini adti anghil na migtungguꞌ sa manga mangintu-uway na nyanimba adti syudad na Ismirna: ‘Aku saba ya nyaka-una aw aku ya kamoliyan. Nyatay aku idtu muna manang nyataw aku uman. Aw ini ya un ku paglongun kamayu: 9Nya-edeꞌ aku sa kamayu pagti-is asuntu sa pagpangintu-u mayu, aw kya-ede-an ku uman na tagbiꞌ ya pagkamangan mayu. Aw pangkay maynan ya pagpakabetang mayu, manang ya tengteng na matinaw, mayaman kamu dun ni pagpangintu-u mayu kanak! Aw kya-ede-an ku na pigtanemtaneman kamu na malatay na tingeg na manga utaw na migpatastas na ya tyugbulan nilan manga Judiyu, manang ya tengteng matinaw pigdumala͡an silan ni Satanas. 10Manang diliꞌ kamu magkallek sa pagti-is na un dumateng. Pakanyegi ya un ku paglongun! Seled na sampulungallaw un kamu pakalabusu ni Satanas pada tanda-en ya kamayu pagpangintu-u. Manang diliꞌ mayu pag-ayawan ya pagpangintu-u mayu kanak pangkay kamatayen pa ya kamayu datengan, aw un ta kamu tandanan na korona na yan ya ginawa na walaꞌ ya katigkasan.
11“ ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.
“ ‘Ya utaw na dumeg sa malatay, diliꞌ nan saba lemenen ya kadwa na pagkamatay.’#2:11 Ya kakawasan na kadwa na pagkamatay: Agbel ya utaw adti danaw na atulun na diliꞌ pagkapatayan. Mabasa uman adti kapitulu 20:6,14, aw kapitulu 21:8.
Ya piglong ni Jisus adti manga mangintu-uway na awun ni Pérgamo
12“Sulata ya ini adti anghil na migtungguꞌ sa manga mangintu-uway na nyanimba adti syudad na Pérgamo: ‘Ini ya piglong na mig-awid sa lipang na to-o matalem: 13Nya-edeꞌ aku sa syudad mayu na awun ya trunu ni Satanas.#2:13 Asini birsikulu, ya trunu ni Satanas, yan ya témplo ni Ze͡us na sambuk na tyumanem na manga utaw na Grigo. Ya témplo yeiy pigbantaw adti tas na pangpang, aw kun tandawan na manga utaw, iman mu aw dakulaꞌ na ingkudanan. Manang kenneꞌ mayu migpadeleg dyumalug kanakeꞌ. Walaꞌ mayu balyawan ya pagpangintu-u mayu kanak pangkay pigpatay ya inulug mayu na si Antipas. Kasaligan sakanan sa pag-ubat-ubat sa kanak tingeg dun ni kamayu, yanagaw pigpatay sakanan baling dun ni kamayu syudad na pigdumala͡an ni Satanas. 14Manang awun manga pagsalaꞌ ku kamayu: Awun eped kamayu na dyumalug pa sa palna-u ni Bala-am. Pigpalna-uwan nan si Balak na hariꞌ sa banwa na Mo-ab asini muna kun unun nan ya pagbuyu sa manga utaw na Isra-él adti pagpakasalaꞌ. Aw yanagaw pigbuyu silan ni Balak na kuman sa pigdugsuꞌ da adti manga inutaw aw piggagad uman silan adti pagkasala-enen.#2:14 Mabasa adti Numiros kapitulu 22 taman ni kapitulu 24. 15Aw pigsilingan mayu silan, kay awun manga eped dun ni kamayu na dyumalug sa palna-u na manga Nikolaytan. 16Yanagaw pagselsel kamu! Kay kun diliꞌ kamu magselsel, maksay aku mawun aw tanamen ku ya manga migpalna-u sa galuꞌ, magi sa tingeg ku na kasiling na lipang.
17“ ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.
“ ‘Ya utaw na dumeg sa malatay, atagan ku sakanan na mana na pigdayaw na walaꞌ pa kita-a.#2:17 Mabasa adti Éxudo kapitulu 16 ya pagpakan na Tyumanem sa manga utaw na Isra-él sa mana. Manang ya pigtawag na mana asini birsikulu ini, yan ya manga pigpakang na Tyumanem adti manga mangintu-uway na un pa lingeben kagaya adti kamoliyan na allaw. Aw atagan ku uman na batu na maputiꞌ na pigsulatan sa bagu na ngalan. Aw ya ngalan yeiy, walaꞌ ya eped na maka-edeꞌ. Yan oloꞌ ya maka-edeꞌ ya utaw na pig-atagan.’
Ya piglong ni Jisus adti manga mangintu-uway na awun ni Tiyatira
18“Sulata ya ini adti anghil na migtungguꞌ sa manga mangintu-uway na nyanimba adti syudad na Tiyatira: ‘Aku ya Iseꞌ na Tyumanem, aw ya manga mata ku kasiling na atulun na lyumaga, aw ya manga siki ku magsalinang kasiling na bronsi na bagu pigtu-ang. Aw ini ya un ku paglongun kamayu: 19Nya-edeꞌ aku sa manga imo-unun mayu: Kya-ede-an ku ya pagginawa mayu kanak aw adti manga eped mayu uman, aw ya pagtabang mayu sa kamayu manga eped. Aw kya-ede-an ku na nyakapadeleg kamu dun ni pagpangintu-u pangkay madugay ya pagti-is mayu. Nya-edeꞌ aku uman na to-o pa madég ya madyaw na pigpan-imoꞌ mayu adun kay sa idtu na bagu pa kamu nyangintu-u. 20Manang awun pagsalaꞌ ku kamayu: Walaꞌ mayu baling pagsagda͡an ya ka͡ubayan na si Jézibél na sallong kunu propita.#2:20 Ya bet na utaw asini birsikulu ini, kasiling na bet ni Jézibél na to-o malatay. Mabasa adti 1 Hariꞌ 21:1-25. Magi sa palna-u nan na galuꞌ, nyabuyu nan adti pagkasala-enen ya kanak manga sugu-anen na nyangintu-u kanak, aw pigdegdeg nan silan na kuman sa abus da dugsu-an adti manga inutaw. 21Pig-atagan da ku sakanan na manga selat na magselsel sa pagkasala-enen nan manang walaꞌ sakanan baling pagselsel. 22Pakanyegi aku! Pakelegan ku sakanan na magkedel pada diliꞌ da sakanan makapagbangun lekat dun ni kulanganan nan. Aw pangkay singalan ya migpa-iyeped kanan dun ni pagkasala-enen, to-o dakulaꞌ ya pagamak ku kanilan kun diliꞌ silan magselsel. 23Aw ya manga dyumalug kanan aw migpalna-u sa palna-u nan na galuꞌ, awun uman pagamak ku kanilan mendaꞌ na matay silan. Tigkas yan, ka-ede-an na kadég na manga mangintu-uway na aku ya nyaka-edeꞌ sa anenganeng na manga utaw. Aw atagan ku ya tagsambuksambuk kamayu umbaꞌ sa pigpan-imoꞌ mayu pangkay madyaw aw malat.
24“ ‘Manang awun eped kamayu dun ni Tiyatira na walaꞌ dalug sa palna-u ni Jézibél aw walaꞌ nilan kalimi ya pagsiling sa palna-u na to-o malalem na lekat adti kan Satanas. Aw ini ya paglongun ku kamayu: Diliꞌ ta kamu pabegatan sa eped na manga suguꞌ. 25Manang tibagsegi na magpadeleg ya kasalig na pagpangintu-u mayu kanak mendaꞌ sa allaw na lumikuꞌ aku. 26Ya utaw na dumeg sa malatay aw magpadeleg mag-imoꞌ sa makatutuk kanak taman adti katigkasan, yan ya utaw na atagan ku sa katundanan na magdumala sa manga nasud. 27Magdumala sakanan kanilan, aw degen nan ya kanan manga po-on kasiling na kulun na nyadugdug. Kay atag ku uman adti utaw yan ya katundanan sa pagdumala kasiling na pagdumala na nyadawat ku lekat adti kanak Ama. 28Aw atag ku kanan ya bitun na awun ni silatan na to-o magsiga na maselem.#2:28 Ya kakawasan na bitun yeiy na to-o magsiga, yan si Jisus. Adti kamoliyan kagaya, ya manga utaw na dumeg sa malatay makasambuk da silan kan Jisus na walaꞌ ya tyamanan.
29“ ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na mangintu-uway.’
Currently Selected:
Pigbukasan 2: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
