Pigpan-imo' 8

1-2Aw kyabantayan ni Saulo ya kadég na nya-imoꞌ aw tyumandeꞌ sa manga utaw na migpatay kan Éstéban. Manang awun manga eseg dun na masalig to-o ya pagpangintu-u aw dayaw nilan piglebeng ya lawas ni Éstéban. Aw to-o silan migmatay aw migsugaw.

Ya pagpamulayam sa manga mangintu-uway

Aw lekat dun ni allaw yan, migpalekat ya dakulaꞌ na pagpamulayam sa manga mangintu-uway kan Jisus dun ni Jérusalim. Aw ya syampetan nan, madég ya mangintu-uway na migbeklag nyamalaguy adti kadakulaꞌ na probinsiya na Judiya aw adti banwa na Samariya. Yan dakman oloꞌ ya nyasamaꞌ dun ni Jérusalim ya manga apostolés. 3Aw si Saulo migpadeleg nyamulayam sa manga mangintu-uway aw kaliman nan apnasen ya kadég nilan. Pigpanseled nan ya manga balay nilan aw pyandakep nan ya manga eseg aw ka͡ubayan aw pigpakalabusu nan silan.

Ya pag-ubat-ubat ni Pilipi adti Samariya

4Na, ya manga mangintu-uway na nyamalaguy lekat adti Jérusalim, piglegeb nilan ya manga banwa na dyatengan nilan, aw gayed nilan pigpa-edeꞌ adti manga utaw ya Madyaw na Ubat-ubat kan Jisus. 5Ya sambuk kanilan na si Pilipi, nyadtu sakanan adti sambuk na lunsud na sakup na Samariya, aw pig-ubat-ubatan nan silan na si Jisus yan ya Misiyas na pigpadala na Tyumanem. 6Pagdengeg da na madég na utaw sa pig-ubat-ubat nan, aw sa pagkitaꞌ nilan sa manga milagru na pig-imoꞌ nan magi sa katulus na Tyumanem, dayaw nilan pigpakanyegan ya piglong nan. 7Kay madég ya manga busaw na lyumuwaꞌ da adti manga utaw na to-o mig-ulangag. Aw madég ya manga pulid aw kapig na kyaguli-an da silan. 8Yanagaw to-o migleya ya manga utaw adti lunsud yan.

Si Simon na anituwan

9Na, dun ni lunsud yan, awun anituwan na pigngalanan na Simon. Aw madugay da nya-enneng-enneng ya manga utaw dun ni kadakulaꞌ na Samariya sa nyangka-imoꞌ na katulus nan, yanagaw migpalibantug sakanan. 10Aw idtu muna, alag migpakanyeg kanan ya manga utaw, dala ya tagituꞌ aw ya manga dakulaꞌ na utaw. Aw gayed silan miglong, “Ya utaw yeiy, awun ni kanan ya katulus na Tyumanem na pigtawag na To-o Matulus.” 11Aw asuntu na madugay da silan nya-enneng-enneng sa manga nya-imoꞌ nan, gayed nilan sakanan pigpakanyegan. 12Manang pagdateng ni Pilipi adti Samariya, pigpa-edeꞌ nan ya Madyaw na Ubat-ubat sa Kasakupan na Pighari-an na Tyumanem aw ya ngalan ni Jisu-Kristu. Aw madég kanilan ya nyangintu-u sa pig-ubat-ubat nan. Aw pigba͡utismuwan ya madég na manga eseg aw manga ka͡ubayan. 13Pangkay si Simon nyangintu-u uman. Aw pagkatigkas sakanan ba͡utismuwan, nyagad da sakanan kan Pilipi aw kyinitaꞌ nan ya manga pangilala aw milagru, aw to-o si Simon nya-enneng-enneng.

14Na, ya manga apostolés na awun ni Jérusalim, dyengeg nilan na dyawat na madég na utaw adti banwa na Samariya ya tingeg na Tyumanem. Yanagaw pigpakadtu nilan si Pédro aw si Juan. 15Pagdateng da nilan dun, pyanawagtawagan nilan adti Tyumanem ya manga utaw na bagu nyangintu-u na madawat nilan ya Ispiritu nan, 16kay walaꞌ pa dateng adti kanilan ya Ispiritu pangkay pigba͡utismuwan silan dun ni ngalan ni Jisus na Matas na Pangulu. 17Pagkatigkas yan, pigpandungan ni Pédro aw ni Juan na kanilan manga palad ya manga bagu pa nyangintu-u, aw nyadawat nilan ya Ispiritu Santo. 18Aw kyinitaꞌ ni Simon na dun ni pagpandung na manga apostolés sa palad nilan adti manga utaw, nyadawat nilan ya Ispiritu Santo. Yanagaw pig-atagan nan galu na kuwalta ya manga apostolés, 19aw law nan, “Atagi aku na katulus yeiy pada ya pangkay singalan na pandungan ku na kanak palad makadawat uman sa Ispiritu Santo.” 20Manang miglong si Pédro kanan, “Maka-eped kanmu ya kuwalta mu masangab adti atulun na diliꞌ pagkapatayan! Asuntu na mig-aneng-aneng kaw na mabatug mu bayadan ya katulus na Ispiritu Santo. 21Walaꞌ ya labet mu sa imo-unun na pigtaligu na Tyumanem kanami, kay kya-ede-an nan na kenneꞌ pa na kalatay na anenganeng mu. 22Yanagaw pagselsel kaw sa malat na pigpalpa mu. Aw panawagtawag kaw adti Tyumanem pagaw kallatan kaw nan aw diliꞌ da kaw pa-emel-emelen asuntu sa anenganeng mu na malatay. 23Kay kyinitaꞌ ku na to-o kaw nyingaꞌ kanami aw kyaliputan kaw dun ni imo-unun na malatay.” 24Aw tyumubag si Simon kanilan, “Panginayuꞌ kamu beg kanakeꞌ adti Tyumanem na diliꞌ dumateng adi kanak ya pangkay sambuk na piglong mayu.”

25Aw migpadeleg si Pédro aw si Juan migpa-edeꞌ sa Madyaw na Ubat-ubat kan Kristu. Pagkatigkas yan, syuminan silan adti Jérusalim. Aw dun ni panaw nilan, nyapit silan adti madég na baranggay aw pigpa-edeꞌ nilan adti manga taga Samariya ya Madyaw na Ubat-ubat kan Kristu na lekat adti tingeg na Tyumanem.

Si Pilipi aw ya utaw na taga Étiyopiya

26Manang si Pilipi, pigsuguꞌ sakanan na anghil na Tyumanem na miglong, “Kadtu kaw adti dalan na lekat adti Jérusalim pasinan adti Gasa.” Na, dun ni kaligbinan paka-agi ya dalan yeiy. 27Yanagaw nyindeg si Pilipi aw nyanaw dun ni dalan yan, aw kyinitaꞌ nan adti mawatawat ya sambuk na eseg na taga Étiyopiya. Na, ya utaw yeiy, pigsaligan ni Candasi na rayna sa nasud na Étiyopiya, aw pigtaliguwan sakanan sa kadakulaꞌ na ka-unan aw kuwalta na rayna. Lyumekat sakanan adti Jérusalim kay migsimba sa Tyumanem 28aw nyuliꞌ da. Nyingkud dun ni kalisa nan aw migbasa sa libru na pigsulat na propita na si Isayas. 29Aw miglong ya Ispiritu Santo adti kan Pilipi, “Daluga aw dengan kaw sa kalisa nan!” 30Yanagaw dyumalagan si Pilipi pasinan adti kalisa, aw dyengeg nan ya pagbasa na utaw yan na lekat adti pigsulat ni Isayas. Aw nyusip si Pilipi kanan, “Unu, kay Lew, kyalabetan mu ya kakawasan na pigbasa mu?” 31Aw tyumubag sakanan, “Walaꞌ ku kalabeti. Unun ku ya pagpakalabet kun walaꞌ ya utaw na magpalabet kanak?” Aw piglongan nan si Pilipi na tumangkil kanan sumakay adti kalisa. 32Na, ini ya pigbasa nan:

“Kasiling sakanan na karniro na pigdala adti iyawanan,

aw kasiling uman na iseꞌ na karniro na un da gupitan,

walaꞌ ya tingeg na piglong nan.

33 Pigmulamula sakanan na manga utaw, aw diliꞌ matinaw ya pag-ukum nilan kanan.

Singalan kaꞌ ya un magtultul sa manga buwadbuwad nan adti moli na allaw?

Kay ya ginawa nan pigkamang da asini tas na lupaꞌ.”#8:32-33 Yan ya pigbasa nan ya Isayas 53:7-8.

34Aw miglong ya pigsaligan kan Pilipi, “Ubatan kanak. Singalan utawa ya pigsulat na propita na si Isayas? Ya kanan pagka-utawun aw kun eped na utaw?” 35Aw pigpalekat ni Pilipi ya pag-ubat-ubat kanan, lekat adti pigsulat ni Isayas mendaꞌ adti Madyaw na Ubat-ubat kan Jisus. 36Aw sa talana silan syumakay adti kalisa, dyumateng silan adti tubig, aw miglong ya pigsaligan, “Tengtengi! Awun tubig iyan! Anangaꞌ diliꞌ aku mu ba͡utismuwan adun?” 37[Aw tyumubag si Pilipi kanan, “E-e. Mabatug kaw saba ba͡utismuwan kun mangintu-u kaw kan Jisus sa kadakulaꞌ na ginawa mu.” Aw law na pigsaligan, “Nyangintu-u la aku na si Jisu-Kristu, yan ya Iseꞌ na Tyumanem.”] 38Aw pigsuguꞌ nan ya dyumala sa kalisa na tumeneng. Aw nyanog silan adti kalisa aw tyumalaꞌ sa tubig. Aw dun da ni Pilipi ba͡utismuwi ya pigsaligan na taga Étiyopiya. 39Pagtaklang nilan lekat adti tubig, biglaꞌ pigkamang na Ispiritu na Tyumanem si Pilipi aw dyala nan adti eped na banwa, aw walaꞌ da na pigsaligan kita-a. Aw migpadeleg ya pigsaligan adti panaw nan na to-o migleya. 40Aw si Pilipi dun da pakabetang adti lunsud na Asoto. Aw pigpa-edeꞌ nan ya Madyaw na Ubat-ubat kan Jisus adti manga utaw na nyeyaꞌ adti kadég na manga lunsud na pig-agiyan nan pasinan adti syudad na Césariya.

Currently Selected:

Pigpan-imo' 8: klgv

Highlight

Compare

Copy