Pigpan-imo' 7

Ya pag-ubat-ubat ni Éstéban adti matas na usayanan

1Pagkatigkas yan, nyusip kan Éstéban ya pangulu na manga magdadugsu-ay, “Unu, matinaw ya piglong nilan kanmu?” 2Aw tyumubag si Éstéban, “Kay manga kadégan ku na Judiyu aw manga kapatas nami, pakanyegi mayu ya un ku paglongun: Ya Tyumanem na umbaꞌ deyen, migpakitaꞌ adti kanaten tyugbulan na si Abraham talana pa sakanan nyeyaꞌ adti banwa na Mésopotamiya sa walaꞌ pa pag-alin adti lunsud na Haran. 3Miglong ya Tyumanem kanan, ‘Indeg da kaw lekat asini banwa na kya͡utawan mu, aw ayawi ya kanmu manga kadégan, aw pag-alin kaw adti sambuk na banwa na un ku pakitaꞌ kanmu.’ 4Yanagaw pig-indegan nan ya banwa na manga utaw na Kaldiyanen aw mig-alin sakanan adti Haran. Aw pagkatigkas na pagkamatay na ama nan, pigpakadi na Tyumanem si Abraham asini banwa na pig-eya-an tadun. 5Idtu na pagdateng nan, walaꞌ pa na Tyumanem atagi na lupaꞌ pangkay min na palad. Manang pigpakangan nan si Abraham na atag nan ya lupaꞌ ini adti kanan aw manga buwadbuwad nan, pangkay walaꞌ pa ya iseꞌ nan. 6Aw migpa-edeꞌ ya Tyumanem na ya kanan manga buwadbuwad un ma-imoꞌ dumadayu adti sambuk na banwa, aw un silan allangen aw pamulayaman seled na upatenggatus (400) ya umay. 7Manang miglong pa uman ya Tyumanem kan Abraham, ‘Un ku ukuman ya nasud na mag-allang kanilan. Aw pagkatigkas yan, paluwa-en ku ya buwadbuwad mu lekat adti nasud yan pada liku-an nilan ya lupaꞌ ini aw asini la aku nilan simba͡a.’ 8Aw pigsuguꞌ na Tyumanem si Abraham na pantuli-en ya manga eseg kay yan ya pangilala sa pakang nan kanilan na dayaw mig-iganget. Aw nya͡utaw ya iseꞌ nan na eseg na si Isa-ak, aw paglabay da na walungallaw, pigtuliꞌ ni Abraham ya iseꞌ nan. Aw si Isa-ak nya-imoꞌ ama ni Jakub, aw si Jakub nya-imoꞌ ama na sampuluꞌ tag duwa (12) ya iseꞌ nan na eseg na silan ya nya-imoꞌ tyugbulan tadun.

9“Aw ya manga tyugbulan tadun, nyingaꞌ silan sa mangud nilan na si José. Yanagaw piggalin nilan aw pigdala na manga utaw adti nasud na Ihiptu aw nya-imoꞌ sakanan allang. Manang gayed sakanan pig-agad-agadan na Tyumanem 10aw pigpaluwaꞌ nan lekat adti kadakulaꞌ na pamulayam. Aw pig-atagan nan na katadeng kun unu ya madyaw imo-un dun ni allaw na pigpatawag sakanan adti asdangan na para-un na yan ya hariꞌ sa Ihiptu. Aw to-o migleya ya para-un kanan, yanagaw pig-imoꞌ nan si José magdumala sa kadakulaꞌ na nasud na Ihiptu dala ya ka-epedanan na para-un. 11Na, dyumateng ya dakulaꞌ na getem adti banwa na Ihiptu aw adti banwa na Canaan. Aw migkapelek ya manga utaw dala uman ya tyugbulan tadun dun ni Canaan. To-o silan migti-is kay walaꞌ ya kyinitaꞌ nilan na kakamangan sa pagkan nilan. 12Manang pagdengeg ni Jakub na awun trigu adti Ihiptu, pigpakadtu nan dun ya manga iseꞌ nan na eseg na nya-imoꞌ tyugbulan tadun. Yan ya tagnaꞌ na pagkadtu nilan. 13Adti kadwa na pagkadtu nilan, migpakilala si José adti manga mangkagulang nan, aw pigpa-edeꞌ nan adti para-un ya pamilya nan. 14Aw pagkatigkas yan, pigpatawag ni José ya ama nan na si Jakub aw ya kanan kadégan na pa-alinen adti Ihiptu. Aw ya kadég nilan kapituwan tag lima (75). 15Yanagaw nyanaw san Jakub adti Ihiptu aw dun da silan pag-eyaꞌ. Aw yan ya banwa na kyamatayan ni Jakub aw ya kadég na manga iseꞌ nan na nya-imoꞌ tyugbulan tadun. 16Paglabay da na madég na umay, ya manga pesaꞌ nilan pigdala adti banwa na Canaan aw piglebeng adti Shékim, dun ni ilib na pigbayadan ni Abraham na bulawan na maputiꞌ asini muna lekat adti buwadbuwad ni Hamor dun ni Shékim.

17“Na, sa malapit da ya allaw na tumanen na Tyumanem ya pigpakang nan kan Abraham asini muna, migkadég pa to-o ya manga buwadbuwad nan adti banwa na Ihiptu 18mendaꞌ na nyingkud da ya sambuk na hariꞌ na walaꞌ nan ka-ede-i ya tabang ni José dun ni Ihiptu asini muna. 19Yanagaw gayed sakanan mig-imoꞌ sa manga malat na kapandayan na un magpakalug sa manga tyugbulan tadun. Aw pigleges nan silan na ayawan ya mangayseꞌ nilan na bagu nya͡utaw adti luwaꞌ pada diliꞌ da mataw. 20Dun ni manga umay yan, nya͡utaw si Moysis aw to-o sakanan matinaw na pagka-iseꞌ. Seled na tulumbulan pigkalmukan sakanan na ina nan na tagu-taguꞌ dun ni kanilan balay. 21Pagdateng na allaw na diliꞌ da nilan mabatug tagu-un ya iseꞌ, pig-ayawan sakanan adti luwaꞌ, aw walaꞌ kadugay pigkamang sakanan na biyaꞌ na yan ya iseꞌ na para-un, aw pig-ipat nan kasiling na kanan tengteng iseꞌ. 22Yanagaw si Moysis pigpalna-uwan na manga Ihiptuwanen sa kadakulaꞌ na kanilan katanem aw katadeng. Aw madyaw ya dengeg nan asuntu sa katadeng nan maglong aw sa pigpan-imoꞌ nan.

23“Pagdateng ni Moysis adti kapatan (40) ya umay nan, nyakabetang adti anenganeng nan na lumabaꞌ adti manga kadégan nan na buwadbuwad ni Isra-él dun ni Ihiptu. 24Aw kyinitaꞌ nan dun ya sambuk na kadégan nan na pyamulayaman na utaw na Ihiptuwanen. Aw pigtabangan ni Moysis ya kadégan nan aw pigpatay nan ya Ihiptuwanen. 25Na, iman ni Moysis aw kalabetan na manga kadégan nan na Isra-él ya tud nan adti kanilan, na pigpamalliꞌ sakanan na Tyumanem na un magpaluwaꞌ kanilan lekat adti pagpamulayam na manga Ihiptuwanen. Manang walaꞌ nilan kalabeti. 26Pagkasalut da na allaw, lyumikuꞌ si Moysis adti kadégan nan na Isra-él aw kyinitaꞌ nan ya duwa na migtanam. Aw kaliman nan galu usayen ya pagtanam nilan, law nan, ‘Kay Lew, anangaꞌ kamu magtanam? Alag kamu saba mangkaylug!’ 27Manang ya eseg na nyanubbuk sa tanam, pigtulud nan si Moysis aw piglongan nan, ‘Singalan ya mig-imoꞌ kanmu kapatas nami na un magbaya-bayaꞌ kanami? 28Unu kaꞌ, silingen aku mu na Ihiptuwanen na pigpatay mu kagabi?’ 29Pagdengeg ni Moysis sa piglong nan, nyaksay sakanan nyanaw lekat adti Ihiptu aw nyalaguy pasinan adti banwa na Midyan. Aw dun da sakanan pangugnan, aw dun da uman ka͡utaw ya duwa ya iseꞌ nan na eseg.

30“Paglabay da na kapatan (40) ya umay, awun anghil na migpakitaꞌ kanan adti kaligbinan dun ni buntud na Sinay. Migpakitaꞌ kanan dun ni tagbiꞌ na kawuy na lyumaga. 31Aw pagkitaꞌ ni Moysis, to-o sakanan nyabelengbeleng. Aw sa pagpalapit nan adti kawuy, awun dyengeg nan na tingeg na lekat adti Tyumanem, 32‘Aku saba ya Tyumanem na manga tyugbulan mayu na si Abraham aw si Isa-ak aw si Jakub.’ Pagdengeg ni Moysis sa tingeg nan, to-o sakanan migteneb aw tyakigan aw walaꞌ nan ka-inunu. 33Aw miglong ya Tyumanem kanan, ‘Luwasa ya sandal mu, kay asini aku ni banwa ini na pig-indegan mu. 34Kyinitaꞌ ku saba ya pagpakalat sa manga utaw ku adti nasud na Ihiptu, aw dyengeg ku uman ya pag-agele nilan. Aw nyanog aku lekat adti tas na langit kay un ku silan bawi-en lekat adti pagpamulayam na manga Ihiptuwanen. Yanagaw un ta kaw padala adti Ihiptu.’

35“Si Moysis yeiy, pigkele͡an na manga tyugbulan tadun asini muna aw miglong silan, ‘Singalan ya mig-imoꞌ kanmu kapatas nami na un magbaya-bayaꞌ kanami?’ Manang yeiy baling ya utaw na pigsuguꞌ na Tyumanem aw pig-imoꞌ nan kanilan kapatas, aw yeiy ya migpaluwaꞌ kanilan lekat adti manga Ihiptuwanen magi sa anghil na Tyumanem na migpakitaꞌ kanan dun ni tagbiꞌ na kawuy na lyumaga. 36Aw si Moysis ya miggagad sa manga tyugbulan tadun lekat adti banwa na Ihiptu, manang sa walaꞌ pa silan indeg, madég ya pangilala aw milagru na pigpakitaꞌ nan dun ni banwa yan aw adti Dagat na Mapula, aw adtu uman ni kaligbinan na alag laganasen seled na kapatan (40) ya umay. 37Aw si Moysis saba ya miglong adti manga buwadbuwad ni Isra-él, law nan, ‘Un pa magpadala ya Tyumanem adti kamayu sa sambuk na propita kasiling kanak na lumekat adti buwadbuwad ni Isra-él.’ 38Aw si Moysis uman ya dyumala sa tingeg na anghil na miglong kanan dun ni tas na buntud na Sinay na awun ni kaligbinan, aw pigpa-edeꞌ nan uman adti manga tyugbulan tadun. Aw pigdawat nan ya pigsulat na Tyumanem na yan ya Uldin na pig-ayawan sa kadég tadun aw yan ya nyatag kanaten sa ginawa. 39Manang ya tyugbulan tadun, walaꞌ silan kalim dalug kan Moysis, aw yan ya gayed nilan pig-anenganeng ya pag-eyaꞌ nilan adti Ihiptu. 40Yanagaw miglong silan kan Aaron, ‘Imo-i kami sa manga inutaw na yan da ya tyumanem na un maggagad kanami, kay walaꞌ da nami ka-ede-i kun ayin da adun ya utaw yan na si Moysis na miggagad kanami lekat adti Ihiptu.’ 41Aw mig-imoꞌ silan sa inutaw kasiling na nati na baka, aw pigdugsu-an nilan ya inutaw yan aw pig-imo-an nilan sa pista kay kyatutukan silan sa pig-imoꞌ na kanilan manga tulluꞌ.#7:2-41 Ya pigkasampetanen ni Ésteban asini manga birsikulu ini, mabasa adti Génésis kapitulu 12 taman adti Éxudo kapitulu 32. 42Yanagaw pigpabaya-an da silan na Tyumanem na magsimba sa sega aw bulan aw manga bitun. Aw ya kanilan bet pigsulat adti libru na manga propita:

‘Kamu na buwadbuwad ni Isra-él, seled na kapatan (40) ya umay miglegeblegeb kamu adti kaligbinan, aw migpatay kamu sa madég na manga ayep aw pigdugsuꞌ mayu ya manga lawas nilan.

Manang bekeꞌ ku baling ya pigdugsu-an mayu.

43 Aw yan saba ya gayed mayu pigsidala ya layaglayag na inabelan na yan ya pag-eya-an na sambuk na inutaw mayu na si Molok.

Aw pigdala mayu uman ya inutaw na bitun na pigngalanan mayu na Répan.

Aw yeiy ya pig-imoꞌ mayu manga tyumanem na un mayu simba͡en.

Yanagaw un ta kamu alilinan apit adti tadtu na banwa na Babiloniya.’#7:42-43 Mabasa adti Amos 5:25-27.

44“Na, ya tyugbulan tadun asini muna, mig-imoꞌ silan uman sa palangad pag-eya-an na tengteng Tyumanem dun ni kaligbinan.#7:44 Asini muna, ya eya-anan na Tyumanem asini lupaꞌ pigtawag na Tabirnakulu aw pag-alin-alinen nilan. Aw yan ya pagsimba͡an na manga utaw na Isra-él kay walaꞌ pa katulluk ya Témplo adti Jérusalim. Aw dun ni pag-imoꞌ nilan, dayaw nilan dyalug ya pigpakitaꞌ na Tyumanem kan Moysis kun unu ya gya na pag-eya-an nan. 45Aw pig-ayawan nilan adti kanilan manga buwadbuwad aw pigsidala uman nilan mendaꞌ sa paggagad ni Joswé kanilan asini banwa ini. Aw dun ni manga allaw yan, pig-alilinan na Tyumanem ya manga muna utaw aw nyatagtun na manga tyugbulan tadun ya lupaꞌ yeiy, aw asini la ni banwa tadun ya palangad pag-eya-an na Tyumanem taman na manga allaw na paghariꞌ ni Dabid. 46Aw kyatutukan ya Tyumanem kan Dabid, aw migsekat si Dabid na tumbay kanan ya pagtulluk sa dakulaꞌ na eya-anan na Tyumanem asini tas na lupaꞌ na un pagsimba͡an na manga buwadbuwad ni Jakub sa Tyumanem. 47Manang si Solomon baling ya pigtumbay na Tyumanem na un magtulluk sa balay nan.

48“Manang ya Tyumanem na To-o Matas, diliꞌ mabatug na meyaꞌ sakanan adti balay na pig-imoꞌ na utaw, kasiling na pigsulat na propita asini muna, law na Tyumanem,

49 ‘Ya adti tas na langit, yan ya trunu sa paghariꞌ ku,

aw ya lupaꞌ, yan ya gina-anan ku.

Unu pa balaya ya un mayu imo-un kanak?

Aw ayin aku na banwa paglagdeng?

50 Unu kaꞌ, bekeꞌ ku ya mig-imoꞌ sa kadég yeiy?’ ”#7:49-50 Mabasa adti Isayas 66:1-2.

51Aw miglong pa si Éstéban dun ni matas na usayanan, “Mangkategel kamu! Kasiling kamu na manga Héntil na walaꞌ ya kalim magpakanyeg sa tingeg na Tyumanem! Gayed kamu nyatu sa Ispiritu nan kasiling uman na tyugbulan mayu asini muna. 52Nyabus pyamulayaman na kamayu tyugbulan ya manga propita! Aw pigpatay nilan ya manga mig-ubat-ubat dadan sa pagkadi na sambuk na walaꞌ ya salaꞌ na yan si Jisus! Aw sa pagdateng nan, pigtumbay mayu baling adti kanan manga po-on aw kamu saba ya migpapatay kanan! 53Aw pangkay kamu ya nyakatagtun sa Uldin na pig-atag na Tyumanem magi sa manga anghil asini muna, manang walaꞌ mayu pagbetangan sa ginawa ya pagdalug sa Uldin.”

Ya pagpatay kan Éstéban

54Pagdengeg na manga mag-usayay sa kadakulaꞌ na piglong ni Éstéban, to-o silan nyadaman aw nyampanguliteb ya kanilan untu sa kabulut nilan. 55Manang si Éstéban nyatmuꞌ na Ispiritu Santo, aw lyumangad sakanan adti langit aw kyinitaꞌ nan ya kalalamdag na Tyumanem na to-o syumiga aw si Jisus na nyindeg apit adti kalintu nan. 56Aw miglong sakanan, “Inunuwa! Nyabekaꞌ da ya langit. Kyinitaꞌ da ku ya Iseꞌ na Utaw na nyindeg apit adti kalintu na Tyumanem!” 57Manang pigsengseng na manga mag-usayay ya manga talinga nilan aw migpangkawayit silan, kay diliꞌ silan malim magpakanyeg sa piglong nan. Tigkas yan, pigdulus nilan si Éstéban, 58aw pigdala nilan adti luwaꞌ na syudad aw pigbadasan nilan na babintu. Aw ya manga utaw na migmatinaw sa galuꞌ adti kan Éstéban, talana nilan pyamintu sakanan, pigtaligu nilan ya kanilan manga sa-ul adti sambuk na eseg na bagu pa ya ginawa na pigngalanan na si Saulo. 59Talana pa nilan si Éstéban pyamintu, nyanawagtawag sakanan adti Tyumanem, law nan, “We… Jisus na kanak Matas na Pangulu, dawata beg ya ispiritu ku!” 60Pagkatigkas yan, lyumuhud si Éstéban adti lupaꞌ aw mig-ulangag, law nan, “Kay Matas na Pangulu, diliꞌ mu silan pagpa-emel-emelen asuntu sa pig-imoꞌ nilan.” Aw pagkatigkas nan maglong, nyabugtuꞌ ya ginawa nan.

Currently Selected:

Pigpan-imo' 7: klgv

Highlight

Compare

Copy