Josoa 2
2
Mandefa mpitsikilo roa tany Jerikao i Josoa
(Jereo Mpits 1.23-25; Jos 6.17, 22-25)
1Ary i Josoa, zanakalahin’i Nona, dia nandefa mpitsikilo roa lahy mangingina avy tao an-tobin’i Sitima ka niteny taminy hoe:
–Ndeha misafo ny tany ianareo, indrindra fa ny tanànan’i Jerikao#2.1 Sitima: angamba tsy misy hafa amin’ilay toerana antsoina hoe Abela-Sitima (Nom 33.49) izay tokony ho kilaometatra vitsivitsy eo avaratra atsinanan’ny Ranomasina Maty. –Jerikao: tanàna tsy lavitra an’i Jôrdàna, fa erỳ amin’ny faran’ny lohasaha, eny am-pita andrefan’ny renirano. –Rahaba dia anarana voatsiahy ao amin’ny Test. Vaovao: Mt 1.5; Heb 11.31; Jak 2.25..
Nony tonga tao an-tanàna izy roa lahy, dia niditra tao an-tranon’ny vehivavy mpivaro-tena iray atao hoe Rahaba ka nandry tao. 2Ary ren’ny mpanjakan’i Jerikao fa misy Israelita tonga io alina io mba hitsikilo ny tany. 3Koa naniraka tany amin’i Rahaba izy hilaza hoe:
–Ireo lehilahy miantrano ao aminao ireo dia tonga mba hitsikilo ny tany manontolo. Koa atolory anay ireo!
4Dia lasa i Rahaba nitondra azy roa lahy sy nanafina azy, vao namaly hoe:
–Nisy lehilahy tonga tokoa teto amiko, nefa tsy fantatro izay niaviany. 5Saingy nony hariva ny andro ka hohidiana ny vavahadin’ny tanàna#2.5 Mba hisakanana ny fahavalo tsy hiditra ny tanàna, dia nohidiana mandrakariva ny vavahady mandritra ny alina., dia lasa ireo ka tsy fantatro izay nalehany. Enjeho faingana izy fa ho tratranareo!
6Kanjo efa nampiakarin-dravehivavy any an-tampon-trano izy roa lahy ary nafeniny tao anaty tahon-drongony izay efa nalahany teo. 7Dia niainga ireo iraky ny mpanjaka hanenjika ny mpitsikilo teny an-dalàna mankany Jôrdàna ka hatrany amin’ny fitàna. Ary raha vao lasa ireto mpanenjika, dia nohidiana ny vavahady. 8Fa talohan’ny hatorian’ny mpitsikilo no niakatra nankao aminy tao an-tampon-trano i Rahaba 9ka niteny taminy hoe:
–Fantatro fa efa nomen’ny TOMPO anareo ity tany misy anay ity ka ny mponina rehetra dia raiki-tahotra anareo sady rera-po eo anoloanareo. 10Efa renay ny fomba nataon’ny TOMPO hanamainana ny Ranomasin’ny Volotara teo anoloan’ny razanareo niala tany Ejipta. Efa renay koa fa novonoinareo i Sihôna sy i Hôga izay mpanjaka amôrita anankiroa tany andafy atsinanan’i Jôrdàna ka nafoinareo ho an’ny TOMPO ny fananany rehetra#2.10 Ny fomba nanamainan’ny Tompo ny Ranomasin’ny Volotara: jereo Eks 14.21. –Sihôna sy i Hôga: jereo Deot 2.24–3.17; Nom 21.21-35.. 11Koa raha nandre izany izahay, dia ketraka ny fonay ary tsy nisy olona sahy nitsangana hanohitra anareo intsony. Fa ny TOMPO Andriamanitrareo no Andriamanitra any an-danitra ambony sy etỳ an-tany ambany. 12Ary ankehitriny, aoka hianiananareo amin’ny Tompo aho fa hamindranareo fo ny fianakaviako tahaka izay namindrako fo taminareo: koa mba omeo famantarana azo antoka aho 13fa havelanareo ho velona ny ray aman-dreniko sy ireo mpiray tampo amiko mbamin’ny ankohonany tsirairay avy ka hamonjy ny ainay tsy ho faty ianareo.
14Dia novalian’izy roa lahy hoe:
–Raha tàhiny tsy ambaranao olona izao fandalovanay mpisafo tany izao, dia hamindra fo sy hanao izay hitsiny aminao izahay, rehefa homen’ny TOMPO anay ity tany ity. Raha tsy izany no ataonay aminareo mianakavy, dia aoka ny ainay no ho faty hisolo ny anareo.
15I Rahaba dia nipetraka tamina trano nanolotra ny mandan’ny tanàna; koa naidiny tamin’ny tadimahazaka, avy teo am-baravarankely, izy roa lahy sady nilazany hoe:
16–Mandehana any an-tendrombohitra ianareo fandrao hifanena amin’ny mpanenjika, ary miafena any telo andro ambara-piveriny; aorian’izany, vao mandehana amin’ny lalanareo.
17Dia hoy izy roa lahy tamin’i Rahaba:
–Ny amin’ny fianianana izay nasainao nataonay, dia izao no fomba hanatanterahany azy: 18Rehefa tonga haka ny tany izahay, dia afatory eo amin’ny varavarankely izay nampidinanao anay ity kofehy mena ity; ary angony ao an-trano avokoa ny ray aman-dreninao sy mpiray tampo aminao mbamin’ny fianakavianao manontolo. 19Raha misy olona mivoaka ho any ivelan’ny trano, dia izy ihany no tompon’andraikitra amin’ny fahafatesany fa tsy izahay. Ireo rehetra miaraka aminao ao an-tranonao kosa, raha misy olona mamely azy, dia izahay no tompon’andraikitra amin’ny fahafatesany. 20Kanefa, raha tàhiny ambaranao olona izao fandalovanay izao, dia afaka amin’ny fianianana izay nasainao nataonay izahay.
21Dia nanaiky araka ny tenin’izy roa lahy i Rahaba, ka nandefa azy. Ary nony efa lasa ireo, dia nafatony teo amin’ny varavarankely ilay kofehy mena. 22Izy roa lahy kosa nandeha nankany an-tendrombohitra ary nitoetra tany telo andro ambara-piverin’ireo mpanenjika. Ary nikaroka azy tany amin’ny lalana rehetra ireto mpanenjika nefa tsy nahita. 23Dia niala ny fiereny izy roa lahy ka nidina avy tany an-tendrombohitra, dia niampita an’i Jôrdàna sy nankany amin’i Josoa, zanakalahin’i Nona. 24Ary nitantarany ny zavatra rehetra nitranga i Josoa 25sady nilazany hoe:
–Efa natolotry ny TOMPO antsika manontolo tokoa izany tany izany; ary rera-po eo anoloantsika mihitsy aza ny mponina rehetra ao.
Currently Selected:
Josoa 2: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.