Jôba 3
3
NY RESAKA MIFAMALY NATAON’I JOBA SY NY SAKAIZANY TELO LAHY
(3-31)
Mitaraina i Jôba: inona no antony mbola hahavelomana?
1Niloa-bava ihany i Jôba tamin’ny farany ka nanozona ny andro nahaterahany#3.1 nanozona ny andro nahaterahany: ampit Jer 20.14-18.. 2Nandray fitenenana izy ka nanao hoe:
3Enga anie ka hofoanan’Andriamanitra
ny andro nahaterahako
sy ny alina izay nanao hoe;
«zazalahy no torontoronina»!
4Ho tonga haizina anie izany andro izany,
ka tsy hotsarovan’Andriamanitra any ambony any
ary tsy hisy mazava hamiratra aminy intsony.
5Izay aloka mainty indrindra anie handrakotra azy;
ary aoka hisy raho-matevina hitatao aminy
na koa fanakona-masoandro mahatahotra.
6Enga anie ka izany no ho alina maizina indrindra
ka tsy ho tafasisika amin’ny marikandro-taona
ary tsy hiditra intsony amin’ny fanisàm-bolana.
7Ho momba anie izany alina izany
ka tsy handrenesam-pihobiana mihitsy!
8Hanozona azy anie ny mpanozona andro
izay mahay mamoha ilay dragona lehibe#3.8 Fampahatsiahivana ireo fomba majika izay mihambo hanao ho andro ratsy hanombohan-javatra ny andro sasantsasany. Ilay dragona lehibe: bibin’angano voalaza ao amin’ny 40.25–41.26 izay misarim-boay. Nomena hery handrapaka ny volana aman-kintana izy.!
9Tsy hahita ny kintan’ny maraina
ka hiandry ny mazava tsy ho tonga
ary koa tsy hahatsinjo akory
ny fiposahan’ny mazava atsinanana!
10Satria tsy nahasakana ny hahaterahako izy
sy ny hahitako izao fahoriana izao.
*
11Nahoana aho no tsy maty hatrany am-bohòka,
na tsy niala aina fony vao nivoaka avy tany an-kibo?
12Nahoana no nisy lohalika roa nandray ahy
sy nono roa ninonoako?
13Tahaka izay aho mba nilamina tany am-pasana
ka nandry am-piadanana feizay
14niaraka tamin’ny mpanjaka sy ireo mpifehy ny tany
izay nanangana indray ny tsangambato efa rava,
15na niaraka tamin’ny andriandahy be volamena
sady manana volafotsy mameno trano.
16Na koa naleoko fotsiny tsy ary
toy ny zaza tsy azo ka nafenina,
dia toy ny zaza tsy nahita mazava.
17Any ny olon-dratsy
no mitsahatra amin’ny fampahoriana
ary any ny reraka no miala sasatra.
18Mahita fiadanana koa ny mpigadra,
ka tsy handre intsony ny antsoantson’ny mpiambina.
19Samy tafakambana any na kely na lehibe
ary ny mpanompo aza dia ho afaka amin’ny tompony.
*
20Nahoana no ataon’Andriamanitra
mahita masoandro ny olona ory
ary ataony velona ireo tototra alahelo?
21Miandry ny fahafatesana tsy ho tonga izy#3.21 Ampit Apôk 9.6.
sady mitady azy fatratra mihoatra noho ny harena.
22Hibita-kafaliana tokoa ireo
sady ravoravo hahazo fasana!
23Nahoana no velona ny olona tsy mahita lalan-kombana
fa toa voahidin’Andriamanitra ho anaty tamboho.
24Eny, toloko hatrany no sakafo fihinako
ka migororoana toy ny rano ny fidradradradrako.
25Izay atahorako ka mampitebiteby ahy
no tanteraka sy mihatra amiko.
26Tsy manam-pitoniana na fiadanana aho,
tsy misy fitsaharana fa tebiteby lava.
Currently Selected:
Jôba 3: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.