Genesỳ 29
29
Fihaonan’i Jakôba tamin’i Rahely
1Ary niainga i Jakôba ka nankany amin’ny tany atsinanana, dia ny tanindrazan-dreniny. 2Indray andro izy, dia nahatazana fantsakana teny an-tsaha, ary indreo nisy ondry aman’osy andiany telo nandry teo anilany, fa io fantsakana io no fampisotroana ny biby fiompy. Misy vato lehibe manarona ny vavan’ny fantsakana. 3Rehefa tafangona avokoa ireo andiany rehetra, dia esorina ny vato amin’ny vava fantsakana ary ampisotroina ny andian’ondry aman’osy; aorian’izany, dia averina ho amin’ny toerany eo amin’ny vava fantsakana ilay vato. 4Nanontany an’ireo mpiandry ondry i Jakôba hoe:
–Ry rahalahy, avy aiza moa ianareo?
Ka hoy ireo hoe:
–Avy any Haràna izahay.
5Dia niteny indray i Jakôba hoe:
–Fantatrareo ve i Labàna, zafin’i Nahôra?
Ka novalian’ireo hoe:
–Eny, fantatray izy.
6Fa nanontany ihany i Jakôba hoe:
–Salama ihany ve izy?
Dia hoy ireo taminy:
–Salama izy, ary inty i Rahely zanany vavy fa tonga miaraka amin’ny andian’ondriny.
7Ary hoy Jakôba hoe:
–Mbola antoandro loatra ny andro, ka tsy mbola fotoana fanangonana ny biby fiompy; fa ampisotroy aloha ireo, dia andraso ihany.
8Fa novalian’ireo hoe:
–Tsy azonay atao izany, raha tsy efa tafangona avokoa ny andiany rehetra; amin’izay dia hoesorina ny vato eo amin’ny vava fantsakana, ary hampisotro ny ondry aman’osy izahay.
9Raha mbola niresaka tamin’ireo i Jakôba, dia tonga i Rahely niaraka tamin’ny ondrin-drainy, fa mpiandry ondry izy. 10Ary rehefa nahita an’i Rahely zanakavavin’i Labàna anadahin-dreniny sy ireo ondry aman’osiny i Jakôba, dia nanatona nanaisotra ny vato teo amin’ny vava fantsakana, ka nampisotro ireo ondry aman’osin’ny anadahin-dreniny. 11Dia nanoroka an’i Rahely i Jakôba sady nitomany. 12Notantarain’i Jakôba tamin’i Rahely fa havan-drainy izy ary zanakalahin’i Rebekà. Dia nihazakazaka i Rahely ka nitantara izany tamin-drainy. 13Rehefa nandre ny amin’i Jakôba zanak’anabaviny kosa i Labàna, dia nihazakazaka nitsena azy, ka namihina sady nanoroka azy ary nitondra azy ho any an-tranony. Notantarain’i Jakôba tamin’i Labàna avokoa ny zava-nitranga, 14ka hoy i Labàna taminy:
–Marina tokoa fa havako ianao, ary iray ra amiko.
Dia nipetraka iray volana tao aminy i Jakôba.
Ny raharaham-panambadian’i Jakôba
15Indray andro dia hoy i Labàna tamin’i Jakôba:
–Noho ny maha havako anao ve dia hanompo ahy maimaim-poana ianao? Koa lazao amiko, inona no ho karamanao?
16Nanana zanakavavy roa anefa i Labàna; ilay zokiny dia nantsoina hoe Leà ary ilay zandriny natao hoe Rahely. 17I Leà dia malefa-pijery, fa i Rahely kosa tsara tarehy sady bikàna. 18Ary tia an’i Rahely i Jakôba ka niteny tamin’i Labàna hoe:
–Hanompo anao fito taona aho mba hahazoako manambady an’i Rahely faravavinao.
19Dia namaly azy i Labàna hoe:
–Aleoko homena anao izy toy izay ho an’olon-kafa, fa mitoera eto amiko.
20Koa mba hahazoany an’i Rahely, dia nanompo an’i Labàna fito taona i Jakôba; nefa toy ny andro vitsivitsy nandalo izany teo imasony, satria tena tiany razazavavy. 21Rehefa afaka izany, dia hoy i Jakôba tamin’i Labàna:
–Aiza amin’izay ny vadiko hampakariko, fa efa tapitra ny fe-potoana.
22Dia nasain’i Labàna ho amin’ny sakafom-panambadiana ny olona rehetra teo an-toerana. 23Nony hariva dia nalain’i Labàna i Leà zanany vavy ka nentiny tany amin’i Jakôba ary nandry taminy izy. 24Nomen’i Labàna an’i Leà zanany vavy kosa i Zilpà mba ho mpanompovavy hanampy azy. 25Nony maraina vao gaga i Jakôba fa hay i Leà no tao aminy, ka hoy izy tamin’i Labàna:
–Inona izao nataonao tamiko izao? Fa angaha tsy i Rahely no nanompoako anao, koa nahoana ianao no namitaka ahy?
26Dia namaly i Labàna hoe:
–Tsy fomban-tany aty aminay ny mampanambady ny zandriny alohan’ny zokiny. 27Vitao aloha ny herinandron’ny volantantely amin’ny zokiny, dia homenay anao koa ny zandriny raha manompo ahy fito taona hafa indray ianao.
28Dia nataon’i Jakôba izany, ka novitainy ny herinandron’ny volantantely tamin’i Leà; avy eo dia nomen’i Labàna azy koa i Rahely ho vadiny. 29Nomen’i Labàna an’i Rahely i Bilehà mba ho mpanompovavy hanampy azy. 30Dia nandry tany amin’i Rahely koa i Jakôba ka tiany lavitra noho i Leà izy. Ary nanompo an’i Labàna fito taona hafa koa i Jakôba.
Ireo zanak’i Jakôba
31Ary rehefa hitan’ny TOMPO fa tsy tiana noho i Rahely i Leà, dia nataony mitoe-jaza izy; fa i Rahely kosa nataony momba. 32Dia bevohòka i Leà, ka tera-dahy ary ny anarany nataony hoe Reobena, satria hoy izy hoe:
–Ny TOMPO efa nijery ny fahoriako#29.32 Amin’ny fiteny hebreo ny anarana hoe Reobena dia mampahatsiaro matoanteny izay nadika hoe efa nijery fa ny hevitry ny anarana hoe Reobena ara-bakiteny dia nahita zanakalahy izy. , ary ankehitriny dia ho tia ahy ny vadiko.
33Ary bevohòka indray izy ka tera-dahy, dia niteny hoe:
–Efa ren’ny TOMPO fa tsy tiana aho, ka nomeny an’ity indray koa. Dia nataony hoe Simehôna ny anarany#29.33 Amin’ny fiteny hebreo ny anarana hoe Simehôna dia mampahatsiaro ny matoanteny izay nadika hoe Efa ren’ny... eto.. 34Mbola bevohòka indray izy ka tera-dahy fanintelony, dia nanao hoe:
–Ankehitriny dia hifikitra amiko ny vadiko, satria efa niteraka telo lahy ho azy aho.
Noho izany dia nataony hoe Levỳ ny anarany#29.34 Amin’ny fiteny hebreo ny anarana hoe Levỳ dia mampahatsiaro ny matoanteny izay nadika hoe hifikitra eto..
35Fa mbola bevohòka indray izy, dia niteraka zazalahy fahefatra, ka nanao hoe:
–Amin’ity kosa dia hidera ny TOMPO aho.
Dia nataony hoe Joda#29.35 Amin’ny fiteny hebreo ny anarana hoe Joda dia mampahatsiaro ny matoanteny izay nadika hoe hidera eto. ny anarany.
Dia nitsahatra tsy niteraka intsony izy.
Currently Selected:
Genesỳ 29: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.