Genesỳ 26
26
I Itsehàka sy i Abimelèka
1Nisy mosary teo amin’ny tany, hafa noho izay niseho tamin’ny andron’i Abrahama; koa lasa i Itsehàka nankany amin’i Abimelèka mpanjakan’i Filistinina#26.1 Ny mosary tamin’ny andron’i Abrahama: jereo Gen 12.10. –I Gerara izay nanjakan’i Abimelèka (ampit Gen 20.10) dia tsy mbola azo lazaina ho tanin’ny Filistinina akory eto, satria ny Filistinina izay avy any Kreta na Azia Minôra dia tsy mbola nipetraka teny amin’ny morontsirak’i Palestinina, teo anelanelan’i Jafà sy Gazà ankehitriny, raha tsy tamin’ny taonjato faha-12 tal J.K. Momba ny faritanin’ny Filistinina, dia ampit Jos 13.3-4. tao Gerara. 2Niseho taminy ny TOMPO ka nanao hoe:
–Aza mandeha midina any Ejipta, fa monena eo amin’ny tany izay hambarako anao. 3Mivahinia eto amin’ity tany ity fa homba anao Aho ary hitahy anao, satria ny taranakao no homeko ireo faritany rehetra ireo, fa hotanterahiko ny fampanantenana efa nianianako tamin’i Abrahama rainao. 4Hataoko marobe tahaka ny kintana eny an-danitra ny taranakao ary homeko ireto faritany rehetra ireto. Amin’ny alalan’ireo taranakao no hitahiako ny firenena rehetra eto ambonin’ny tany#26.4 Momba ny and 3-4: jereo 22.16-18. –Amin’ny alalan’ireo taranakao no hitahiako: jereo 12.3 sy nta., 5satria efa nihaino ny feoko i Abrahama, ka nitandrina ny baikoko sy ny didiko ary ny fitsipiko sy ny lalànako.
6Nonina tao Gerara i Itsehàka. 7Nanontany azy momba ny vadiny ny olona tamin’izany toerana izany, fa novaliany hoe: «Anabaviko izy#26.7 Ampit Gen 12.13; 20.2..» Natahotra ny hilaza azy hoe vadiny izy, fandrao hovonoin’ny olona tamin’izany toerana izany ho faty ny tenany noho ny amin’i Rebekà fa tsara tarehy loatra ravehivavy.
8Ary rehefa ela no nitoeran’i Itsehàka tao, dia nitsirika teo am-baravarankely i Abimelèka indray andro ka nahita an’i Itsehàka nisangisangy an’i Rebekà vadiny. 9Nampanantsoin’i Abimelèka i Itsehàka ka nilazany hoe:
–Hay tena vadinao tokoa izy, koa nahoana no nolazainao hoe anabavinao?
Hoy kosa ny navalin’i Itsehàka azy:
–Nilaza izany aho fandrao vonoina ho faty noho ny aminy.
10Dia hoy indray i Abimelèka hoe:
–Inona ity nataonao taminay? Efa nisy lehilahy anankiray tamin’ny vahoaka saika handry tamin’ny vadinao, ka ho nahatonga heloka taminay ianao.
11Ary i Abimelèka mpanjaka nandidy ny vahoaka rehetra hoe:
–Izay mikasikasika an’ity lehilahy ity sy ny vadiny dia hovonoina ho faty tokoa.
12Tamin’izany taona izany dia namafy tao amin’io tany io i Itsehàka, ka nahazo zato heny satria notahîn’ny TOMPO. 13Tsy nitsaha-nitombo ny fananany ka tonga mpanan-karena be izy. 14Nanana andian’ondry aman’osy sy andian’omby ary mpanompo maro izy, ka nialonan’ny Filistinina. 15Izany no antony nanotofan’izy ireo tany ny lavaka fantsakana izay nohadîn’ny mpanompon’i Abrahama rainy fony fahavelony.
Ny fifanekena nataon’i Itsehàka sy i Abimelèka
16Dia niteny tamin’i Itsehàka i Abimelèka hoe:
–Mialà eto aminay satria efa tonga mahery lavitra noho izahay ianao izao.
17Koa niala teo i Itsehàka, dia nanorin-day tao an-dohasahan’i Gerara ka nipetraka tao. 18Nasainy nosokafana ireo fantsakana izay voahady fony fahavelon’i Abrahama rainy fa nototofan’ny Filistinina taorian’ny nahafatesany. Ary naveriny tamin’ireny fantsakana ireny indray ny anarana izay efa nomen-drainy azy. 19Indray andro dia nihady lavaka fantsakana tao an-dohasaha ireo mpanompon’i Itsehàka ka nahita loharano velona. 20Dia niady tamin’ireo mpiandry ondrin’i Itsehàka ireo mpiandry ondry tao Gerara ka nanao hoe:
–Anay ny rano.
Dia nantsoin’i Itsehàka hoe Hesèka izany hoe Fifandirana ny fantsakana, satria nifandiran’ireo izy. 21Dia nihady lavaka fantsakana hafa koa ireo mpanompon’i Itsehàka, nefa nilàn’ireo sotasota indray. Io fantsakana io dia nantsoina hoe Sitnà, izany hoe Sotasota. 22Koa niala tao izy ary nampandavaka fantsakana hafa indray; fa tsy mba niadian’ireo kosa io ka nantsoin’i Itsehàka hoe Rehôbôta na Fahalalahana, satria hoy izy hoe: «Ankehitriny ny TOMPO dia efa nanome toera-malalaka ho antsika mba hahazoantsika fahombiazana eto amin’ity tany ity.»
23Dia niala teo izy ka nankany Beera-Seba. 24Nisehoan’ny TOMPO izy nony alina ka nilazany hoe:
–Izaho no Andriamanitr’i Abrahama rainao. Aza matahotra fa miaraka aminao Aho, ary mitahy anao. Hampitomboiko ny taranakao noho ny fampanantenana efa nataoko tamin’i Abrahama mpanompoko.
25Nanorina alitara teo i Itsehàka ka nivavaka tamin’Andriamanitra sady niantso Azy hoe TOMPO. Namelatra ny lainy izy ary nihady lavaka fantsakana hafa koa ireo mpanompony.
26Niainga avy tao Gerara i Abimelèka ka nankany amin’i Itsehàka niaraka tamin’i Ahozata sakaizany sy i Pikôla komandin’ny tafiny. #26.26 Abimelèka sy i Pikôla: jereo 21.22. 27Nanontany azy ireo i Itsehàka hoe:
–Inona moa no alehanareo aty amiko, kanefa ianareo nankahala sy nandroaka ahy?
28Dia novalian’ireo hoe:
–Tsapanay tokoa fa momba anao ny TOMPO; koa nihevitra izahay fa tokony hanao fifanekena ombàm-pianianana isika. 29Mianiàna àry aminay fa tsy hanisy ratsy anay ianao tahaka ny tsy nampijalianay anao. Tsy nisy afa-tsy ny soa no nataonay taminao ka nalefanay ombàm-piadanana ianao, izay efa notahîn’ny TOMPO ankehitriny.
30Dia nanao fanasana ho an’i Abimelèka i Itsehàka, ka nihinana sy nisotro izy. 31Nifoha maraina avy izy ireo ny ampitso ary samy nifanao velirano. Avy eo nalefan’i Itsehàka izy telo mianaka, ka lasa nody ombàm-piadanana.
32Androtr’iny ihany dia tonga ireo mpanompon’i Itsehàka nanambara taminy ny vaovao momba ny fantsakana izay nolavahany ka nilaza hoe:
–Nahita rano izahay.
33Nantsoin’i Itsehàka hoe Sibehà (na hoe Fianianana) ilay fantsakana. Izany no nanaovana ny anaran’ny tanàna hoe Beera-Seba na hoe Fantsakana fianianana mandraka androany.
Ny fanambadian’i Hesao
34Feno 40 taona i Hesao raha nampakatra vehivavy hetita anankiroa ho vadiny, dia i Jehodita zanakavavin’i Bery sy i Basemàta zanakavavin’i Elôna. 35Nangidy hoditra tamin’i Itsehàka sy i Rebekà izy roa vavy ireo.
Currently Selected:
Genesỳ 26: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.