Daniela 2
2
Ny nofy voalohany nataon’i Nebokadnetsara
1Ary tamin’ny taona faharoa nanjakan’i Nebokadnetsara, dia nanonofy izy. Nampitebiteby azy izany, hany ka tsy nahitany tory. 2Dia nasain’ny mpanjaka nantsoina ny mpanao majika aman-tsikidy sy ny mpimasy ary ny mpanandro mba hanambara aminy ny hevitry ny nofiny. Nony tonga ireo ka niseho teo anatrehan’ny mpanjaka, 3dia nilazany hoe:
–Nanonofy aho ka nampitebiteby ahy izany; liana te hahalala ilay nofy aho.
4Namaly ny mpanjaka tamin’ny teny aramianina#2.4 teny aramianina: manomboka eto ka hatramin’ny toko 7.28, ny rijan-teny manontolo dia amin’ny fiteny aramianina izay fiteny iraisam-pirenena nampiasaina tany Atsinanana-akaiky nanomboka tamin’ny taonjato faha-8 tal J.K. ireo mpanandro ka nanao hoe:
–Ho ela velona anie ianao, ry mpanjaka! Lazao aminay mpanomponao ny nofinao, dia hambaranay anao ny heviny.
5Namaly an’ireo mpanandro kosa ny mpanjaka, ka nanao taminy hoe:
–Hentitra ny teniko fa raha tsy hampahafantarinareo ahy ny nofy sy ny heviny, dia hotetitetehina ianareo, ary horavana ny tranonareo. 6Fa raha mahalaza amiko ny nofy sy ny heviny kosa ianareo, dia hahazo fanomezana sy valisoa ary voninahitra lehibe avy amiko. Noho izany ambarao ahy ny nofy sy ny heviny.
7Dia namaly azy indray ireo ka nanao hoe:
–Ry mpanjaka ô, aoka holazainao aminay mpanomponao ny nofy, dia hasehonay ny heviny.
8Fa namaly ny mpanjaka, ka nanao hoe:
–Fantatro marina izao fa mitady handany andro ianareo, satria tsapanareo fa hentitra ny teniko. 9Fa raha tsy manambara amiko ny nofy ianareo, dia hitovy ny famaizana hatao aminareo rehetra; sady ianareo niray tetika hilaza lainga sy fitaka eto anatrehako mandra-piovan’ny toe-javatra. Koa ambarao ahy ny nofy, dia ho fantatro fa mahalaza ny heviny amiko ianareo.
10Dia namaly teo anatrehan’ny mpanjaka indray ny mpanandro ka nanao hoe:
–Tsy misy olona eto ambonin’ny tany afaka hilaza izany nofinao izany, ry mpanjaka! Ary tsy mbola nisy mpanjaka, na dia izay lehibe sy mahery aza, ka nanontany zavatra toy izany tamin’ny mpanao majika aman-tsikidy sy ny mpanandro. 11Ary ny zavatra izay angatahinao dia faran’izay lalina, ka tsy misy afaka manambara azy eo anatrehanao raha tsy ireo andriamanitra izay tsy miara-monina amin’ny olombelona.
12Dia tezitra nisafoaka mafy noho izany rehetra izany ny mpanjaka, ka nanome baiko mba handringanana ny olon-kendry#2.12 olon-kendry: io teny io dia enti-manondro ireo manam-pahaizana manokana momba ny sikidy sy ny fanandroana voatanisa eo amin’ny and 2. rehetra ao Babilôna. 13Dia navoaka ny didy mampamono ho faty ireo olon-kendry; ary notadiavina koa i Daniela sy ny namany mba hovonoina ho faty.
Nambaran’Andriamanitra tamin’i Daniela ny nofin’ny mpanjaka.
14Ary niainga tokoa i Ariôka, lehiben’ny mpiambina ny mpanjaka, mba hamono ho faty ireo olon-kendrin’i Babilôna. Kanefa teny feno fahamalinana sy fahendrena no nasetrin’i Daniela an’i Ariôka; 15nanontaniany momba ny antony nahahenjana ny didy navoakan’ny mpanjaka i Ariôka, dia nampahafantatra azy ny toe-javatra. 16Avy eo nankany amin’ny mpanjaka i Daniela ary niangavy azy mba hanome fotoana hahazoany manambara amin’ny mpanjaka ny hevitry ny nofiny.
17Dia nody tany an-tranony i Daniela ka nampahafantatra an’i Hananià sy i Misaela ary i Hazarià namany ny toe-javatra; 18ary nangatahiny izy telo lahy mba hitalaho ny famindrampon’ilay Andriamanitry ny lanitra momba ity zava-miafina ity, ka mba tsy haringana miaraka amin’ireo olon-kendrin’i Babilôna sisa i Daniela sy ny namany. 19Ary naseho an’i Daniela tamin’ny fahitana nandritra ny alina ilay zava-miafina; koa nidera an’ilay Andriamanitry ny lanitra izy. 20Dia niteny i Daniela ka nanao hoe:
«Hisaorana anie ny anaran’Andriamanitra
hatrizay hatrizay ka ho mandrakizay,
satria Azy ny fahendrena sy ny hery!
21Izy no tompon’ny fotoana sy ny tantara;
Izy no manonga-mpanjaka sy mananga-mpanjaka;
Izy no manome ny fahendrena ho an’ny hendry
ary ny fahaiza-manavaka ho an’ny mahira-tsaina.
22Izy no mampiseho ny zavatra lalina sy miafina
sady mahalala izay misy ao amin’ny maizina,
satria ny mazava no miara-mitoetra aminy.
23Misaotra sy midera Anao aho,
ry Andriamanitry ny razako ô,
satria nomenao fahendrena sy hery.
Ary ankehitriny nampahafantarinao ahy
izay zavatra nangatahinay taminao,
ka nambaranao anay ilay nofin’ny mpanjaka.
24Teo anoloan’izany i Daniela dia nankany amin’i Ariôka izay voatendrin’ny mpanjaka handringana ny olon-kendry rehetra ao Babilôna, ka avy hatrany i Daniela dia niteny taminy hoe:
–Aza aringana ny olon-kendrin’i Babilôna! Ento ho eo anatrehan’ny mpanjaka aho fa ny tenako no hanambara aminy ny hevitry ny nofiny.
25Dia nitondra haingana an’i Daniela ho eo anatrehan’ny mpanjaka i Ariôka sady niteny tamin’i Nebokadnetsara hoe:
–Nahita lehilahy isan’ny babo avy any Joda aho, ry mpanjaka; izy io no hanambara aminao ny hevitry ny nofinao.
Ilay sarivongana manan-tongo-marefo
26Dia niresahan’ny mpanjaka i Daniela izay antsoina hoe Beltesatsara ka nanontaniany hoe:
–Moa afaka hampahalala ahy ny nofiko sy ny heviny tokoa va ianao?
27Dia namaly ny mpanjaka i Daniela ka nanao hoe:
–Tsy misy olon-kendry na mpisikidy na mpanao majika na ombiasy afaka hanambara aminao ny zava-miafina izay anontanianao, ry mpanjaka! 28Fa misy Andriamanitra any an-danitra ambony any Izay mampiseho ny zava-miafina, ka Izy no nampahafantatra an’i Nebokadnetsara mpanjaka izay hiseho amin’ny hoavy. Koa izao àry ny nofinao sy ny fahitana tao an-tsainao teo am-pandriana. 29Raha natory ianao, ry mpanjaka, dia lasan’eritreritra ny amin’izay hiseho rahatrizay; koa Ilay mampiseho ny zava-miafina dia nampahafantatra anao izay hiseho rahatrizay. 30Ary raha naseho tamiko io zava-miafina io, dia tsy hoe manam-pahendrena mihoatra noho ny miaina rehetra aho akory, fa mba hahazoana mampahalala anao ny hevitry ny nofinao, ry mpanjaka, ka hahafantaranao izay eritreritry ny fonao.
31«Ry mpanjaka ô, izao àry no hitanao: Nisy sarivongana iray tena lehibe nijoro teo anoloanao ary namirapiratra sady nahatahotra ny endriny. 32Volamena madio ny lohan’io sarivongana io, volafotsy kosa ny tratrany sy ny tanany, halimo ny kibony sy ny feny, 33vy ny ranjony; ary ny tongony dia vy ny ampahany ary tanimanga ny ampahany. 34Dia nijery tsara io sarivongana io ianao mandra-piendaky ny vato iray tamina tendrombohitra#2.34 tamina tendrombohitra: araka ny dkt tranainy grika sy ny and 45; tsy hita ao amin’ny rijan-teny fototra aramianina eo amin’ny and 34. nefa tsy nendahan-tanana; namely an’ireo tongotra vy sy tanimanga tamin’ilay sarivongana io vato io ka nahatorotoro ny tongony roa. 35Ary torotoro avy hatrany koa ny vy sy tanimanga mbamin’ny halimo sy volafotsy ary volamena, ka tonga toy ny akofa eny am-pamoloana fahavaratra; dia nopaohin’ny rivotra ireo, ka tsy hita intsony izay nitoerany. Ary ilay vato izay namely ny sarivongana dia tonga tendrombohitra lehibe ka nameno ny tany manontolo#2.35 Jereo Jer 4.11 sy nta..
36«Izany ilay nofinao, ry mpanjaka, ary ny heviny koa dia holazaina eto anatrehanao. 37Ry mpanjaka ô, ianao no mpanjakan’ny mpanjaka fa nomen’ilay Andriamanitry ny lanitra ho anao ny fanjakana sy ny hery ary ny tanjaka sy ny voninahitra. 38Napetrany eo ambany fifehezanao koa ny olombelona sy ny biby eny an-tsaha ary ny voro-manidina; eo ambany fifehezanao ireny, na aiza na aiza itoerany, ka ianao no nataon’Andriamanitra ho mpanjakan’izy rehetra; ianao izany no ilay loha volamena. 39Hisy fanjakana malemy kokoa noho ny anao, hitsangana aorianao; avy eo dia hisy fanjakana fahatelo izay ambaran’ny halimo ka hitatra amin’ny tany manontolo. 40Ary ny fanjakana fahefatra dia ho mafy tahaka ny vy. Tahaka ny anorotoroan’ny vy sy anapotehany ary anamontsanany ny zavatra rehetra no hanorotoroan’io fanjakana io sy hanamontsanany ireo fanjakana rehetra talohany#2.40 Ireo metaly isan-karazany izay manao lanja midina mirafitra amin’ny sarivongana dia mampiseho an’ohatra ny fifandimbiasan’ny fanjakana Babilônianina, sy Medianina, sy Persianina ary Grika na ny fanjakana Babilônianina, fanjakana Medianina-Persianina, fanjakana Grika sy Rômanina araka ny fiheverana sasany.. 41Ary, araka ny hitanao, ny tongotr’ilay sarivongana sy ny rantsan-tongony dia tanimanga ny ampahany ary vy ny ampahany, izany hoe hizara io fanjakana io. Hisy fahamafisana toy ny an’ny vy ao aminy, satria hitanao fa ny vy dia nifangaro tamin’ny tanimanga; 42kanefa ny rantsan-tongotra, izay vy ny ampahany ary tanimanga ny ampahany, dia maneho tahaka izany koa fa ny ampahan’io fanjakana io dia hatanjaka ary ny ampahany kosa halemy. 43Ny vy izay hitanao nifangaro tamin’ny tanimanga dia mampiseho ihany koa fa hifangaro amin’ny fanambadiana ireo mpanjaka; nefa tsy ho mafy io fitambarana io tahaka ny tsy mahamafy ny fitambaran’ny vy amin’ny tanimanga#2.43 Ampit 11.6,17..
44«Amin’ny andron’ireo mpanjaka ireo ilay Andriamanitry ny lanitra no hanangana fanjakana izay tsy ho rava na oviana na oviana; ary ny fiandrianany tsy ho lasan’ny firenen-kafa. Io fanjakana io no hanorotoro sy handevona ireo fanjakana rehetra talohany, fa izy kosa hitoetra mandrakizay. 45Izany no ambaran’ilay vato#2.45 Io vato io dia milaza ny hahatongavan’ny fanjakana iray vaovao izay haorin’Andriamanitra. izay hitanao niendaka tamina tendrombohitra nefa tsy nendahan-tanana, ka nanapotika ny vy sy halimo mbamin’ny tanimanga sy volafotsy ary volamena. Nampahafantarin’Andriamanitra lehibe anao, ry mpanjaka ô, izay hiseho amin’ny hoavy. Tena marina ny nofinao ary azo antoka ny heviny.»
46Dia niankohoka i Nebokadnetsara mpanjaka, ka nanome voninahitra an’i Daniela ary nampanolotra fanomezana sy zava-manitra ho azy. 47Izay ny mpanjaka vao namaly an’i Daniela ka nanao hoe:
–Marina tokoa fa ny Andriamanitrareo no Andriamanitry ny andriamanitra sy Tompon’ny mpanjaka ary mpanambara ny zava-miafina, matoa afaka nanambara tamiko izany zava-miafina izany ianao.
48Tamin’izay ny mpanjaka dia nanandratra an’i Daniela ka nanome azy zava-tsarobidy marobe ary nanendry azy ho mpifehy amin’ny faritanin’i Babilôna manontolo sy ho lehiben’ireo olon-kendry rehetra ao Babilôna. 49Noho ny fangatahan’i Daniela tamin’ny mpanjaka dia i Sadràka sy i Mesàka ary i Habeda-Negao no voatendrin’i Nebokadnetsara hitondra ny faritanin’i Babilôna; fa i Daniela kosa lasa mpanolotsainan’ny mpanjaka#2.49 fa i Daniela... mpanjaka: dkt hafa fa i Daniela kosa tao an-dapan’ny mpanjaka. .
Currently Selected:
Daniela 2: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.