Romans 2
2
Shkewa khaphung
1Nim aa miq dak tang sha phung inn i? Nim utang ang inn jo tho nim aa irimal somlot ching ang moq. Chammatakoi nim aa miq dak tang sha phung eq ning aa chamlang somlo aa sha nim atho somlo inn jo, nim ni nim sha aja ta shing inn. 2Hiqtang aa usam eq i, irimal jaksomtey o Shkewa ching kowang asing khaphung ang aa. 3Etharin nim aa miq dak tang sha chamlang raaq ma khaphung inn, esha hun nim aa somlo inn. Irimal ang ajo nim Shkewa khaphung wang jin lun ang ni ta tathin inn i? 4Shkewa nim jamoq chamtan tinnin ang eq, tinkha moq ang eq etho tinthanan shing aa ta nim aa khi min i? Shkewa nim jamoq tinnin ta nim aa usam hun eq inn chammatakoi nim tin kaley rangma hun piq aa tathin aa. 5Etharin nim tinchet etho kaley moq tin tungkang o nim aa nim ni nim rangma tsamnang sha thajoq inn. Piq rapney tinkhat saal o Shkewa asing khaphung sha takhi na. 6Piq aa thaji ma ning jaksom mal kongpha kot na. 7Barey jaqhal jaksom som chey roq eq na etho phun amun, rangka etho timoq rollung sha bi aa, ning rangma Shkewa pattuk rollung kot na. 8Etharin bara urangma tong aa etho asing sha shing chak aa etho aja ji sha phan aa, ning rangma Shkewa tinkhat sha rapney angna. 9Barey aja som chey roq eq aa, ning rangma tsamnang nia tin jungnáng angna; esha phang Jehudi tang ma eshi jio Gentile tang ma angna. 10Etharin barey jaqhal som aa, ning rangma phun amun etho rangka etho nungmay angna; esha phang Jehudi tang ma eshi jio Gentile tang ma angna. 11Shkewa thaji sha ashey lam o phung aa.
12Gentile tang eq thong kap hunga ngarey som aa, ning sha thong ahung na thom na. Etho Jehudi eq thong jaktáng na ang eq ngarey som aa, ning sha thong o phung na. 13Chammatakoi thong raaq utat eq aa ta utang tho Shkewa jakho na asing miq ang moq angna, etharin utang eq thong raaq sho somlo aa ning sha hun asing miq angna. 14Gentile miqtang ma thong ahung, etharin thong eq bara bat aa esha ning aa sam hunga somlo ajo, ning rangma thong ahung ang ajo tho, ning rangma ning ni ning sha thong ma ang aa. 15Ning aa thong raaq tang sha ning ni ning tinmong na thawit chol ta takhi aa. Etho ning thung eq tho miikkhi ukot eq aa etho ning tinthin shey baluk luk o ning sha aja ta bat aa etho baluk luk o ning sha asing ta bat aa. 16Etho nga phanchan ang tungtang qhal mal, Shkewa Jesu Khristo tungkang o miqtang eq apu asum tathin sha phung saal o irimal angna.
Jehudi tang etho thong
17Nim ni nim raa Jehudi tang ta bat inn; nim aa thong na tungmang shing inn etho Shkewa tung aa raaq o tharangka ang inn. 18Nim aa chamlang somlo inn shima Shkewa nuk aa sha nim aa usam eq inn etho chamlang asing sha nim aa usam eq inn chammatakoi nim ma thong sha tatal eq ta. 19Nim miikduk tang sha jak eq hum soltey etho rangnak na tongtey tang ma alit kottey tang ta nim aa usam eq inn. 20Nim sha miqthom tang nia nijangmay tang tataltey tang chammatakoi thung atal nia asing sha ushey ang eq kottey thong sha nim jak na. 21Irimal ang jo nim bara adak miqtang ma tatal kot inn, nim aa nim ni nim ma chamma tatal min aa? “Hut nak huq inn” ta nim aa phanchan kot inn, etharin nim ni nim aa hun hut hut inn i? 22“Sathuk nak som inn” ta bat inn, etharin nim ni nim aa hun sathuk somlo inn i? Nim aa shila chikrik inn, etharin nim ni nim aa hun rangnuk him sha huq inn i? 23Nim thong tung aa raaq na thangrangka inn, etharin thong na thawit aa mal somlot hunga nim aa Shkewa sha tharik inn i? 24Asang likwit na bat aa, “Nim tungkang o Gentile tang jaktung na Shkewa miing miiksuk chey aa.”
25Nim aa thong na bat aa mal somlo inn jo, nim aa hankhup qhan wang chamlilang kap inn, etharin nim aa thong na bat aa thimal somlo min ang inn jo esha hankhup qhan moq mal ang aa. 26Irimal ang ajo Gentile tang bara hankhup qhan wey moq tey tang, ning aa thong na bat aa thimal somlo ajo Shkewa ning sha hankhup qhantey tang mal wet moq angna i? 27Eshirangma Gentile tang bara hanphung o hankhup qhan wey moq tey tang mal ang eq tho thong na bat aa thimal somlo aa, nim aa thong na bat aa thimal somlo min ta nim Jehudi tang ma ning aja ta raaq na. 28Bara rangkho na chen Jehudi tang, ning sha Jehudi tang ang moq; etho hankhup qhan sha hanphung o chen ang moq. 29Etharin bara tin mong wang hankhup qhan chol tey piq sha hun Jehudi, bara jak eq wit aa thong wang ang moq etharin Tsija wang ang aa. Eshimal miq sha miqtang wang ang moq ang eq Shkewa ching kowang rangka kap na.
Currently Selected:
Romans 2: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
