Romans 13
13
Authority tang shi rangka inn
1Thaji miq sha mung authority tang jaktáng o tong ching; chammatakoi thaji authority sha Shkewa ching kowang etho bara authority na tong aa, ning tha Shkewa esho shing ta. 2Eshirangma utang eq authority tang sha miiksuk eq lang aa, piq Shkewa miiksuk na lang aa etho piq aa tharo tatsam kapna. 3Jaktáng o shingtey tang shey jaqhal jaksomtey tang sha tacho moq, etharin jashit jaksomtey tang sha hun tacho aa. Authority tang cho hunga tong ma tathin aa i? Irimal ang ajo asing jaksom somlo inn etho nim aa rangka kap nin. 4Authority tang sha Shkewa sanga tang etho nim ma jaqhal ang rangma shing aa. Etharin nim aa jashit som inn jo ucho ang inn; chammatakoi nim sha tharo tatsam rangma ning ma tarong atha. Ning sha Shkewa sanga tang etho thaja somtey tang tharo tatsam ma Shkewa wang takat ta. 5Eshirangma nim aa jaktáng o shingtey raaq utat eq ching, tharo tatsam wang lun ma chen ang moq, etharin tin tasang rangma tho irimal somlo inn.
6Eshirangma qhok khey shi ukot eq inn, chammatakoi authority tang sha Shkewa sanga tang etho ning aa chamlang somlot ching sha somlo aa. 7Thaji miqtang ma chamlang kot ching aa eshi kot inn: qhok khey kot ching ang ajo qhok khey kot inn, lik aa ngin kot ching ang ajo lik aa ngin kot inn, rangka kot ching ang ajo rangka kot inn, hunman kot ching ang ajo hunman kot inn.
Ashey ashey ma jaksom kot
8Utang ma tho chamli wey kot ma ang eq nak tong inn, nim ni nim tatinmat shi hun thawel kot ma cham ang aa, chammatakoi adak ma tinmat shing shey piq aa thong sha tahom aa. 9“Sathuk nak som inn, nak tatik inn, hut nak hut inn, miq dak tangwang ma nak ngiljo inn” iri thaji raaqkhat tang etho irimal adak raaqkhat tang thaji raa iri ashey raaqkhat roq kap aa, “Ba himreltey shima, nang ni nang ma tinmat u shimal tinmat u.” 10Nim aa miq dak ma tinmat inn jo nim aa ning ma baluk otho tashit somlo min; eshirangma tinmat shing shey thong sha tahom aa.
11Rangham shi singsam eq irimal somlo inn, thanga nim rangma jipsil wang tátma rangham sey thutapha; chammatakoi bari rangham o hiqtang aa han ti, eshi rangham wang thanga hiqtang lunwan sha arelna. 12Rangpal sha alin shey etho rangwung sha thalat ma ta; eshirangma hiqtang aa anak jaksom sha shingchak eq alit paq ajan sha som ching. 13Chamal rangney o qhing i shimal hun hiqtang jaqhal eq qhing ching; eshirangma jashit kut aa kan, kham ling, sathuk jaksom, jashit jaksom, ngeljo etho thamol hit eshi tang sha ang ching ang moq. 14Eshi kaley khat sam inn mal Teyhungwa Jesu Khristo shi sam inn etho hanngam ngikjuk shi tahom ma nak tathin inn.
Currently Selected:
Romans 13: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
