Romans 12
12
Atharang pinthong
1I pho nia no tang, nga nim ma Shkewa tinshit tasik eq tinthanin eq bat phang, nim hanphung shi atharang, asang etho Shkewa nuk aa shimal pinthong kot inn; ira hun nim ma asing shumnuk. 2Iri mingkang miq dangjang mal nak ang inn, etharin nim thung anal ang eq nim dangjang shi cham kaley aa. Irimal ang ajo nim aa Shkewa tin sha sam nin; piq nim rangma aqhal, khakla, etho unuk ang eq tin shing aa.
3Bari ráng manchan raa nga ma kot taphang nga eshi ráng manchan tungkang o, nim ma bat phang: nim ni nim tung aa raaq sha chamtan ahan tathin ching, eshiwang ahan nak tathin inn, etharin chamal eq Shkewa thaji ma kam phal kota eshi kam mal nim ni nim tung aa raaq jaqhal eq phung inn. 4Hiqtang ashey hanphung na daqhan uking uphak ang aa etho adak adak uking uphak ma adak adak jaksom ang aa; 5Eshimal hun hiqtang bara daqhan ang i, Khristo na ashey hanphung ang eq hiqtang ni hiqtang jaktung na ashey uking uphak. 6Hiqtang ma kotaphi eshi ráng machan mal hiqtang ma adak adak jakkot kota. Utang eq raaqtóng ma jakkot kapta, piq aa kam eq raaqtóng bat ching. 7Unong eq ma jakkot kapta jo unong eq ching, tataltey angma ang ajo tatal eq ching; 8Tinthajong tey angma ang ajo, piq aa tinthajong ching; ukottey angma ang ajo tin lak eq kot ching; solwa angma ang ajo piq aa ahan jaksom som ching; tinshit takhitey angma ang ajo piq aa sungrang jamoq somlo ching.
9Tinmat sha alik ang ching ang moq; anaan sha chikrik eq ching; bara jaqhal shi taching lo inn. 10Jaqhal eq tinmat shi shing inn; ashey eq ashey sha rangka ma tin shing inn. 11Ajung nak ang inn etharin achet achan jaksom somlo inn. Nim tin nim mong thaji shiwang Teyhungwa jaksom shi somlo inn. 12Tungmang sho sungrang eq tong inn; tsamnang na thanan shing inn; romtam na arong tong inn. 13Teyhungwa asang miqtang ma chamlang ràa aa, eshi tangma ning shi nong inn; adak miqtang ma nim him shi alak shing inn.
14Tahitham tey tang ma sunmaan kot inn; ning ma sunmaan hun kot ching, mantun nak kot inn. 15Sungrang tey tang jamoq sungrang ang inn etho uqhaptey tang jamoq uqhap ang inn. 16Nim ni nim jaktung na tin ashey shing inn. Tharangkatey ma nak ang inn, etharin tinnintey tang jamoq tong ma nuk inn; nim aa phanrip samtol i ta nak tathin inn.
17Jashit kaley utang jamoq tho jashit nak som inn; bara thaji miiksiin na jaqhal, esha somlot ma tathin inn. 18Chamtan náng jin angna, nim thaji miqtang jamoq nungmay eq tong inn. 19I no nia pho tang, mangkho chuk nak chu inn; eshi raaq shi Shkewa tinkhat na shing inn. Asang likwit na thawit aa, “Teyhungwa bat aa, ‘Mangkho chuk sha i jaksom, nga hun thawel kot náng.’” 20Iri kaley, “Nim ralwa sha chamlal na ang ajo piq ma til shi taphak sat inn, junglal na ang ajo piq ma jung thaling inn; irimal som ajo nang aa piq kho shina rakri walkhil sha thajung nu.” 21Anaan shey nang shi nak thajin u, jaqhal wang jashit shi jin inn.
Currently Selected:
Romans 12: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
