Roma 8
8
Tadhadhi roonamo Rohina Aulataʼala
8:1-17
1Rampaakanamo sumai, sii-sii indamo dhaangia o kahukumu to manga incia modhadhina moposaanguna tee Isa Al Masi, 2roonamo Rohina Aulataʼala mangapamembalina tadhadhiaka taposaangu tee Isa Al Masi mopadhana mopabebasiko minaaka i hukumu moumbaakana dosa tee mate. 3Aulataʼala padhamo apewau opea inda momembalina ipewauna Hukumuna Taurati roonamo maanusia inda tee kapoolina, mbakana o Aulataʼala alamboko Anana karona. Tee aala bhanguna maanusia ikuasaina dosa, Anana sumai apamembalia kurubanina dosa, rampaakanamo sumai o Aulataʼala padhamo apekatalo kuasana dosa modhaangiana i nuncana karona maanusia. 4Aulataʼala apewau mboo sumai mamudhaakana opea ifirimaniakana i nuncana tuturana Hukumuna Taurati sumai amembali atopamondo i nuncana karota modhadhina moosena kapeeluana Rohina Aulataʼala, tee indamo taose kapeeluata karota. 5Manga mia modhadhina moosena kapeeluana karona, atorotorosu afikiriaka opea ipeeluna karona, maka manga mia modhadhina moosena kapeeluana Rohina Aulataʼala atorotorosu afikiriaka opea ipeeluna Rohina Aulataʼala. 6Roonamo fikirina mia moosena kapeeluana karona bheapotibhaaka mate, maka o fikirina mia moosena kapeeluana Rohina Aulataʼala bheapotibhaaka dhadhi momalape. 7Mia mofikiriakana kapeeluana karona sumai apomusu tee Aulataʼala roonamo incia inda ataʼati hukumuna Aulataʼala tee incia dhaanamo inda amembali ataʼati hukumuna Aulataʼala. 8Jadi, manga mia modhadhina moosena kapeeluana karona atantumo inda amembali apasanaa Aulataʼala.
9Maka moomini mboo sumai, ingkomiu inda udhadhi uose kapeeluana karomiu, maka udhadhi uose kapeeluana Rohi, ande atotuu-totuu o Rohi sumai amboore i nuncana karomiu. Roonamo ande dhaangia o mia inda modhadhiakana tee Rohina Isa Al Masi, incia mencuana pewauana Al Masi. 10Maka ande o Al Masi adhaangia i nuncana karomiu, moomini o badamiu bheamate rampaakanamo dosa, sumaimo Rohina Aulataʼala bheapadhadhikomiu rampaakanamo kabanara. 11#1Kor. 3:16.Aulataʼala padhamo apadhadhi Isa pendua minaaka i tanga-tangana mia mate, tee ande o Rohina adhaangia i nuncana karomiu, sumaimo Aulataʼala mopadhana mopadhadhina Al Masi minaaka i mate sumai uka bheapadhadhi badamiu mofanaana tee Rohina modhaangiana i nuncana karomiu.
12E manga witinaiku, jadi sii-sii ingkita tawaajibu tadhadhi taose kapeeluana Rohina Aulataʼala. Bholimo uka taose kapeeluata karota! 13Roonamo ande uose kapeeluana karomiu, sumaimo bheumate, maka ande tee kuasana Rohi ingkomiu indamo uka upewau manga giu mokodosa, sumaimo ingkomiu bheudhadhi!
14Jadi bhari-bharia mia ikapalaina Rohina Aulataʼala satotuuna manga anana Aulataʼala. 15#Mrk. 14:36.#Gal. 4:5-7.Rohi itarimamiu minaaka i Aulataʼala inda apamembalikomiu bhatua, sabutuna bheudhadhi i nuncana kaeka pendua. Maka o Rohina Aulataʼala mopadhana itarimamiu mopamembalikomiu anana Aulataʼala. Tee o Rohina Aulataʼala sumai imembaliakata tagora, "E Abba,#8:15 Abba: I nuncana pogau Aram, maʼanana o 'Ama.' e Ama." 16Rohina Aulataʼala apobhawa-bhawa tee rohita to adhawuaka kasakusiina, ande ingkita sii manga anana Aulataʼala. 17Ande ingkita manga anana Aulataʼala, maʼanana ingkita bhetamembali manga mia mokotinaurakaakana bhari-bharia giu mopadhana ipasiapuakana Aulataʼala. Opea mopadhana ipasadiaakana Aulataʼala to Al Masi sumai bhetatarimaia tapobhawa tee Incia, roonamo ande ingkita tanarakaa tapoose tee Al Masi, ingkita bhetatomuliangi tapobhawa-bhawa tee Incia.
Ingkita Bhetatarima Kamuliangina Aulataʼala tee Al Masi
8:18-30
18Rampaakanamo sumai, iaku kuabhia ande o kanarakaa inamisita i zamani sii-sii inda amembali topapodhimbaia tee kamuliangi bheidhawuakana to ingkita naile itu. 19Roonamo bhari-bharia giu ipadhaangia apemeliliaka mpuu naepia o wakutuuna Aulataʼala to apatiumbaaka manga anana. 20#Bhaa. 3:17-19.Kaapaaka bhari-bharia giu ipadhaangia padhamo ajolia sabutuna indamo tee gunana, tee o giu incia sumai mencuana kapeeluna manga incia, maka o kapeeluna Aulataʼala. Moomini mboo sumai, dhaangia tee kaharapu, 21ande o giu ipadhaangia sii bheatopabebasi minaaka i kapabhatua mopahancurua, tee atomuliangi apobhawa-bhawa tee manga anana Aulataʼala.
22Roonamo tamataua, ande sakawana sii-sii, bhari-bharia giu ipadhaangia aposapeenci roonamo kanarakaa inamisina manga incia mboomo kapiina bhawine mokoana. 23#2Kor. 5:2-4.Mencuana soo manga incia mopeencina, maka ingkita uka tapeenci i nuncana ngangarandata. Ingkita padhamo tatarima Rohina Aulataʼala momembalina kadhawuna Aulataʼala mobhaa-bhaana, tee sii-sii ingkita dhaangiapo uka taantagi Aulataʼala to mangaangkana tamembaliaka anana, siitumo to katolosina badata. 24I nuncanamo kaharapu incia sii ingkita tatopasalaamati. Maka ande opea iharaputa sumai atokamatamo, mencuanamo kaharapu o sarona. Roonamo inda dhaangia mia moharapuna giu mopadhana ikamatana! 25Maka ande ingkita taharapuaka giu indapo ikamatata, ingkita taantagia tee kasabara.
26Mboomo sumai uka o Rohina Aulataʼala mangatulungi i nuncana kakurangata. Roonamo opea mofaraluuna idoʼaakata inda tamataua, maka o Rohina Aulataʼala sumai mangadoʼaaka tee kapeencina ngangarandana inda momembalina ibhoasaka tee pogau. 27Aulataʼala momatauna antona ngangarandana maanusia sumai, amataua uka o kapeeluana Rohi, roonamo Rohi sumai adoʼaaka manga mia mosaalihi apokana mboomo kapeeluana Aulataʼala. 28Ingkita uka tamataua ande o Aulataʼala moʼatorona bhari-bharia giu mamudhaakana aumbaaka kalape to manga mia momaasiakea, siitumo manga incia ikembana. Manga incia atokemba mboomo ihaejatiakana Aulataʼala. 29Roonamo ingkita imatauna Aulataʼala pepuu minaaka i auwalina, tee ingkita uka mopadhana ipatotapuakana minaaka i auwalina to tapokanaaka tee Anana, mamudhaakana o Isa Al Masi amembali Ana tumpe minaaka i kabharina witinaina. 30Manga incia mopadhana ipatotapuakana Aulataʼala minaaka i auwalina sumai akembaia Aulataʼala; sapadhana akembaia, manga incia aabhimea abanara i aroana Aulataʼala; sapadhana atoabhi abanara, manga incia amuliangimea uka.
Kaasina Aulataʼala to Ingkita Alaloi Isa Al Masi
8:31-39
31Jadi opea bhemomembalina ipogauakata to bhari-bharia giu incia sumai? Ande o Aulataʼala mangaewaaka, inda bheadhaangia o musu momembalina mangapekatalona! 32Aulataʼala ataroaka Anana karona anarakaa tee akurubaniakea to mangapasalaamatiaka. Aulataʼala padhamo adhawuaka Anana, jadi Incia uka dhaanamo bheamangadhawuaka bhari-bharia giu. 33Incema buaka momembalina moraeakana manga mia ipilina Aulataʼala sumai? Garaaka o Aulataʼala karona mangaabhina tabanara. 34Incema bhemomangahukumuna? Inda dhaangia! Roonamo Isa Al Masi padhamo mangamateaka, tee Incia uka adhadhimo pendua minaaka i mate, tee sii-sii auncuramo i weta kaanana Aulataʼala tee amembalimo Potoloweata to momangadoʼaakana. 35Incema buaka momembalina mangapapogaana minaaka i kaasina Al Masi? Inda dhaangia! Amembali buaka o kapisaki, kanarakaa, kasikisaa, kaara, kalealea, balaa, atawa o hancu mangapapogaa minaaka i kaasina? Inda! 36Roonamo mboomo mopadhana motoburina i nuncana Kitabi Momangkilo,
"Rampaakanamo Ingkoo, saeoa ingkami tadhadhi i nuncana balaa imateaka.
Ingkami tatoabhi mboomo manga dumba bheisumbele."
37Maka i nuncana bhari-bharia kajadia incia sumai, Aulataʼala mangapakana totuu-totuu alaloi Isa Al Masi momangamaasiakana. 38Roonamo iaku kuyaakini, malape o mate atawa o dhadhi, malape manga malaaʼekati atawa manga pamarinta, malape manga giu modhaangiana sii-sii atawa bhemoumbana naile itu, pegiu-giuna kuasa, 39tampa momalanga, tampa momandala, atawa opeapo uka bhari-bharia giu ipadhaangia, bhari-bharia sumai inda dhaangia momembalina mangapapogaana minaaka i kaasina Aulataʼala alaloi Isa Al Masi Oputa Momalanga.
Currently Selected:
Roma 8: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
