Zaburu 78
78
Kalapena Kawasana Opu tee Miana Israel Mokodosa
78:1-72
1Lagu kaadharina Asaf.
E lipuku, rangoa o kaadhariku,
taaia o talingamu tee opea ipogauakaku.
2 #
Mat. 13:35. Iaku bhekubungkale ngangaku to kupakawaaka ibarati,
tee bhekupogauaka manga pogau rahasia modhaangiana minaaka i zamani piamo itu,
3siitumo manga giu mopadhana irangomami tee imataumami,
tee mopadhana ipetulatulaakana manga opu-opuamami.
4Ingkami inda bhetabuniakea minaaka i anaanana manga incia,
maka ingkami bhetapetulatulaakea i siwuluna sapadhana ingkami
manga kapujia to KAWASANA OPU tee kakaana,
tee manga giu inda momentela mopadhana ipewauna.
5Incia padhamo apakawaaka tuturana to siwuluna Yakub,
tee apatotapuaka Hukumuna Taurati i tanga-tangana miana Israel.
Incia atumpu manga opu-opuata to aadhariakea i anana manga incia
6mamudhaakana o siwulu bhemoumbana amataua,
siitumo manga anaana bhemolaahirina naile itu.
Kasiimpo manga incia uka bheaumba
tee apetulatulaakea i anana manga incia.
7Tee mboo sumai manga incia bheadhika kaparacaeana i Aulataʼala,
tee inda amalinguaka opea ipewauna Aulataʼala,
maka ataʼatia manga parintana;
8tee bholi mboomo opu-opuana miana Israel,
adorohaka tee aewangiaku,
siitumo opu-opuana tee ngangarandana inda atotapu i Aulataʼala,
tee manga incia inda ataʼatia.
9Miana Efraim mokoewangaakana pana sumai,
abhalili tee apalai i eona potimbea.
10Manga incia inda akenia pekatangka o pojanjiana tee Aulataʼala,
tee amendeu aose hukumuna.
11Manga incia amalinguakea opea mopadhana ikarajaana Kawasana Opu
tee amalinguaka manga giu inda momentela mopadhana ipakamataakana to manga incia.
12 #
Limb. 7:8--12:32. I aroana opu-opuana manga incia, Aulataʼala apewau giu inda momentela,
i atina Zoan i Tana Mesir.
13 #
Limb. 14:21-22. Incia aweta tawo tee ataroakea manga incia apolimba,
tee o uwe apekakatea mboomo rindi.
14 #
Limb. 13:21-22. Wakutuuna pontanga eo manga incia atondaia apapooseakea tee taʼina ngalu,
tee wakutuuna malo manga incia apapooseakea tee caheana waa.
15 #
Limb. 17:1-7. Incia aweta manga bhatu i tana matuu,
tee adhawua manga asumpu ataralabhi-labhi, mboomo minaaka i andalaoge.
16Incia apalimba uwe minaaka i bhatu,
sabutuna o uwe sumai asiwulu mboomo umala.
17Maka manga incia dhaangiapo uka torotorosu akodosa
tee adorohaka i Momalangana i tana matuu.
18 #
Limb. 16:2-15. Manga incia acobai Aulataʼala i nuncana ngangarandana
tee atuntu kinande ipeeluna apokana tee nawusuuna.
19Manga incia aewangi Aulataʼala tee apogau,
"Amembali buaka o Aulataʼala apasiapu kinande i tana matuu?
20Atotuumo ande o bhatu abhebhea sabutuna apidhiaka uwe
tee manga umala apasiwulua tee alua,
maka amembali buaka Incia manga dhawuaka roti,
atawa amembali buaka Incia apasiapu dagi to uumatina?"
21Sabutuna o KAWASANA OPU apamuru wakutuuna arango giu incia sumai;
waa morore akangkanai uumatina Yakub,
tee o pamuruna ahandamo mpuu to miana Israel,
22roonamo manga incia inda aʼiimani i Aulataʼala
tee inda aparacaea ande Incia bhemopasalaamatina manga incia.
23Maka Incia adhawu parintana to laiana,
tee abungkale manga bhambana sorogaa;
24 #
Yah. 6:31. Incia apasapo waona manna#78:24 manna: Kinande idhawuakana Aulataʼala to miana Israel ipasapona i tana matuu saesaeo. Kamata Limb. 16:2-15. mamudhaakana manga incia amembali akande,
tee mboo sumai Incia adhawuaka to manga incia o gandum minaaka i sorogaa.
25Maanusia akande rotina malaaʼekati;
Aulataʼala adhawuaka manga incia kinande motaralabhi-labhi.
26Incia atowii ngaluna timbu i laiana,
tee atowii ngaluna salata tee kuasana;
27Incia apasapo waona dagi mboomo ngawu o kabharina,
tee manu-manu mboomo kabharina bhone i tawo.
28Incia apakotibu manga manu-manu sumai i tanga-tangana pokemaana,
i saripina mbooresana manga incia.
29Kasiimpo manga incia akande sakawana amambosu mpuu,
roonamo Aulataʼala padhamo adhawuakea opea ipeeluna manga incia apokana tee nawusuuna.
30Maka indapo uka manga incia atumpu incana,
siitumo tangasaana o kinande dhaangiapo i nuncana ngangana manga incia,
31pamuruna Aulataʼala aumba tee abhali manga incia
tee ahobuti inyawana manga jampina manga incia,
tee apekamate manga ana mangurana Israel.
32Moomini mboo sumai, manga incia sadhaadhaa akodosa,
manga incia inda aparacaea tee manga giu inda momentela mopadhana ipewauna.
33Rampaakanamo sumai, Kawasana Opu apekamate manga incia mboomo sampearo tahela poinunca,
tee o dhadhina manga incia apepadhaia i nuncana balaa motomaeka mokawana inda inamu-namu.
34Siitumo ande Incia apekamate sagaa minaaka i manga incia, siimpomo manga incia apeeloa;
manga incia atobamo tee abhalili apeelo Aulataʼala tee mpuu-mpuuna incana.
35Manga incia audhania ande o Aulataʼala gunu bhatuna manga incia,
tee o Aulataʼala Momalanga motolosina manga incia.
36Maka manga incia atipu Aulataʼala tee ngangana,
tee agau-gaua tee dhelana manga incia.
37Ngangarandana manga incia inda atotapu i Aulataʼala;
manga incia inda akeniaka janjina.
38Maka roonamo Incia amaasiaka uumatina,
sumaimo Aulataʼala aʼamponi kasalahana manga incia tee inda apabinasea.
Sampe Incia uka amenturu ataangi amarana,
tee inda apalimba pamuruna.
39Incia amataua ande o maanusia inda abakaa,
manga incia mboomo ngalu molalo tee inda ambuli pendua.
40Manga incia amenturu mpuu adorohaka tee Aulataʼala,
tee apekaporo incana i tana matuu.
41Dhaangia pia mpearo manga incia acobai Aulataʼala,
tee apekaporo incana Momangkilona, Aulataʼala isombana miana Israel.
42Manga incia inda audhania o kuasana,
tee inda audhania i wakutuuna Incia atolosi manga incia minaaka i bhalina;
43i wakutuuna Incia apewau manga tanda inda momentela i Tana Mesir,
tee manga muuzizati i atina Zoan.
44 #
Limb. 7:17-21. Aulataʼala abhalii manga umala apamembalia raa,
mboo sumai uka tee manga siwuluna uwe,
sabutuna manga miana Mesir inda amembali asumpua.
45 #
Limb. 8:1-6; 8:20-24. Incia aumbaaka gulumana lale mosampa to mopepadhaina manga incia,
tee aumbaaka barakaka to mopahancuruna manga incia.
46 #
Limb. 10:12-15. Incia adhawuaka hasilina timpuana manga incia mamudhaakana akandea o ulo-ulo,
tee o hasilina kanguleana bukuna manga incia to akandea kabhoro.
47 #
Limb. 9:22-25. Incia apahancuru puuna angguruna manga incia tee wao bhatu,
tee manga puuna arana manga incia tee alona esi.
48Incia ataroaka o gulumana binatana manga incia akangkanaia waona bhatu,
tee o gulumana kadhambaakana manga incia akangkanaia bherese.
49Aulataʼala arambasaka pamuruna mokarore-rore to manga incia;
amarana, lumbuna incana, tee kapiina incana,
mboomo sarombonga malaaʼekati moumbana to mopacilakana manga incia.
50Aulataʼala ataroakea o pamuruna akarore-rore,
tee inda ajoli-joli manga incia mamudhaakana atopabinasa,
maka o inyawana manga incia apasaraakea i panyaki imateaka.
51 #
Limb. 12:29. Incia apekamate bhari-bharia ana umane tumpe i Mesir,
siitumo bhaa-bhaana o kakaana manga incia i pokemaa i Tana Ham.
52 #
Limb. 13:17-22. Maka o uumatina karona abhawea alimba mboomo dumba.
Incia atonda uumatina i tana matuu mboomo gulumana kadhambaaka.
53 #
Limb. 14:26-28. Incia akapalai uumatina sakawana asalaamati, sabutuna o uumatina inda amaeka;
sainamo musuna atanggalamu i nuncana tawo.
54 #
Limb. 15:17. Incia abhawa uumatina sakawana i tanana momangkilo,
i gunu incia siimo, mopadhana ipokawaakana tee lima kaanana.
55Incia uka apadhencu manga lipu mosagaanana minaaka i aroana uumatina,
kasiimpo apapodhawu-dhawuakea tee kaʼukuru o lipu tinaurakana sumai to manga incia,
tee ataroaka manga lipuna Israel ambooresi kemana manga musuna.
56Maka manga incia acobai Aulataʼala Momalanga,
tee adorohaka i Incia.
Manga incia inda aosea o parintana,
57tee manga incia inda ataʼati tee ahianati pojanjiana tee Aulataʼala mboomo opu-opuana;
manga incia inda amembali atotangkaaka mboomo pana mobengko.
58Manga incia apamembali Aulataʼala aʼamara tee tampana momalanga to apasombaaka kurubani;
manga incia apamembali Aulataʼala akaura-ura tee manga patuna dewana.
59Wakutuuna o Aulataʼala arango giu incia sumai, Incia apamuru,
tee amendeu atarima miana Israel sampeampearo!
60Incia amendeumo amboore i tampana mbooresana i Silo,#78:60 Silo: Tampana to Kema Momangkilo wakutuu bhaa-bhaana miana Israel apesua i Tana Kanaan, wakutuuna Baitulla indapo atopakakaro i Yerusalem.
siitumo o Kema Momangkilo, tampana mbooresana i tanga-tangana maanusia.
61Incia ataroakea o sorongana pojanjiana atotaangi,
tee o tanda kamuliangina amandawu i limana bhali.#78:61tanda kamuliangina: Giu incia sii apogauaka tee asusuaka wakutuuna Sorongana Pojanjiana KAWASANA OPU arampasia miana Filistin.
62Incia ataroaka musu apekamate uumatina tee hancu,
tee apawoa amarana i uumatina karona.
63Manga ana umane momangurana manga incia akandea waa
sabutuna inda atorango o laguna kawia to manga kabuabua.
64Manga imamuna manga incia amateaka ewanga,
tee manga iaiarona imamu sumai inda atangisi umanena.
65Kasiimpo abhangumo o KAWASANA OPU mboomo mia siimpo mobhanguna mokole,
mboomo jampi asambo-sambo sapadhana asumpu angguru.
66Incia apewau manga bhalina apalaiaka karona;
Incia apewau manga incia amaea saʼumurua.
67Incia amendeu siwuluna Yusuf
tee inda apili sukuna Efraim;
68maka Incia apili sukuna Yuda,
siitumo Gunu Sion imaasiakana.
69Incia apabhangu tampana momangkilo mboomo kalangana laiana,
tee mboomo alamu, momatangka to saʼumurua.
70Aulataʼala apili Daud, o bhatuana,
tee aalea wakutuuna incia tangasaana ajagani gulumana dumba.
71Aulataʼala aala Daud minaaka i karajaana awulu manga dumba mopadudu sumai
tee apamembalia mogembalaakana siwuluna Yakub,
siitumo o miana Israel, uumatina tee tinaurakana.
72Tee karelana totona incana o Daud agembalaaka uumatina,
tee kakidhana incia amataua tuaapa o carana akapalai manga incia.
Currently Selected:
Zaburu 78: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
