Zaburu 147
147
Kakuasa tee Rahumatina KAWASANA OPU
147:1-20
1Pujimo KAWASANA OPU!
Amalape mpuu talaguaka manga lagu kapujia to Aulataʼalata;
umbe, amalape mpuu tanamisia tee alaenga to tapujia!
2KAWASANA OPU apabhangu Yerusalem,
tee aromusaka manga miana Israel mopadhana ibhanakana.
3Incia apaunto manga mia momaporona incana,
tee atange kambelana manga incia.
4Incia atantuaka kabharina manga kalipopo,
tee sumbe-sumbere adhawua saro.
5Kawasana Oputa amaoge tee kakaana ataralabhi-labhi,
hikimatina inda atokera-kera.
6KAWASANA OPU atulungi manga mia motopisaki,
maka Incia apaporitambe manga mia madhaki sakawana i tana.
7Lagumo tee usukurumo i KAWASANA OPU!
Laguakamea manga lagu kapujia tee umagasiaaka kecapi to Aulataʼalata.
8Inciamo motutubhina laiana tee manga taʼina ngalu,
mopadhaangiana wao i alamu,
tee apatuwu rumpu i manga gunu.
9Incia uka modhawuna kinande i binata,
tee i manga anana manu-manu tongkaa mokaoni-onina.
10Mencuana kakaana ajara ipeeluna Aulataʼala,
tee uka mencuana suludadu momakaa imasinaina;
11maka o KAWASANA OPU amaasiaka manga mia momaekaia,
tee manga mia moharapuakana kaasina molagina.
12Muliangia o KAWASANA OPU, e Yerusalem!
Pujimo Aulataʼalamu, e Sion!
13Roonamo Incia apekatangka manga kapasona bhambana lawamu,
tee abarakati raʼeatimu tee manga giu momalape.
14Incia adhawu kaʼamani i lipumu,
tee apekambosuko tee gandum momalape.
15Incia apakawaaka parintana i alamu,
sumaimo firimanina lausaka atopewau.
16Incia apasapo salju mboomo buluna dumba,
tee o alo mokobhatu akamburakea mboomo rapu.
17Incia apasapo waona esi mboomo katongkana roti;
inda dhaangia momembalina motaraina kagarina.
18Incia apakawaaka firimanina, sumaimo areremo o esi sumai;
Incia atowii ngalu, sumaimo o uwe asiwulumo.
19Incia apakawaaka firimanina i Yakub,
tee manga katotapuna tee manga tuturana to Israel.
20Incia inda apewau giu mboo sumai i lipu mosagaanana iapaipo uka;
manga incia inda amataua manga tuturana.
Pujimo KAWASANA OPU!
Currently Selected:
Zaburu 147: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
