Markus 8

Isa Apakande Pata Rewu Mia

8:1-10

(Mat. 15:32-39)

1Saangu wakutuu dhaangia uka o mia bhari aporomusaka, maka iwe sumai inda tee kinande momembalina ikandena manga mia bhari sumai. Kasiimpo Isa akemba manga murina tee apogau, 2"Iaku amaasi incaku tee manga mia bhari sii, roonamo talu eomo kangengena manga incia apoose tee Iaku, maka inda dhaangia momembalina ikandena manga incia. 3Ande kutumpua ambuli i bhanuana tee dhaangiapo tangasaana amaara kompona mboo sumai dhaanamo manga incia bheamalimpu i dhala, roonamo i tanga-tangana manga incia dhaangia uka moumbana minaaka i karidhoana."

4Manga murina alawani, "Tuaapa amembali i tampa momalino mboo sii tapotibhaaka kinande to tapakandeaka mia mobhari mboo sii?"

5Aabhamo Isa i manga incia, "Saopea o kabharina roti modhaangiana i ingkomiu?"

Lawanina manga murina, "Dhaangia pitu angu."

6Incia atumpumo mia bhari sumai auncura i tana. Kasiimpo Isa aalamo pitu angua roti sumai tee aemani sukuru, aweta-wetamea, tee apepuumo adhawuakea i manga murina to abage-bageakea i manga mia bhari sumai. Kasiimpo manga murina abage-bageakea uka. 7Manga incia uka dhaangia pia mbaa o ikane maidhiidhina. Sapadhana aemani sukuru to manga ikane sumai, Isa atumpumo uka manga murina to abage-bageakea o ikane sumai to mia bhari. 8Manga mia incia sumai akandemo sakawana amambosu. Kasiimpo wakutuuna manga murina arombusaka bhilaana kinande sumai, garaaka dhaangia pitu langka maoge o bhilaana. 9Kabharina manga mia sumai kera-kera pata rewu mia. Kasiimpo Isa atumpumo manga mia bhari sumai ambuli. 10Sapadhana sumai o Isa alausakamo akompa i bhangka apobhawa tee manga murina tee abhose i lipu Dalmanuta.

Manga Miana Farisi Aemani Tanda

8:11-13

(Mat. 16:1-4)

11 # Mat. 12:38-39; Luk. 11:16; 11:29. Kasiimpo aumbamo manga mia mominaakana i rombongana Farisi tee apepuumo apotagali tee Isa. Roonamo gauna acobai Isa, manga incia aemani i Incia mamudhaakana apakamataakea saangu tanda inda momentela minaaka i sorogaa. 12Isa ahela poinuncana i nuncana ngangarandana roonamo inda asanaa, kasiimpo apogau, "Apokia manga mia i zamani sii-sii apeelo saangu tanda inda momentela? Satotuuna Iaku kupogau tee ingkomiu, manga mia i zamani sii-sii inda bheatodhawuaka tanda opeapo uka to manga incia." 13Isa abholi manga mia mominaakana i rombongana Farisi sumai tee akompa i bhangka, kasiimpo alingka i ati i sawetana Tawona Galilea.

Ragina Manga Mia minaaka i Rombongana Farisi tee Ragina Herodes

8:14-21

(Mat. 16:5-12)

14Garaaka manga murina Isa amalingu abhawa roti tee tangkanamo dhaangia saangu o roti ibhawana manga incia i nuncana bhangka. 15#Luk. 12:1. Isa apogau tee manga incia, "Udhania pekalape, jagania o karomiu minaaka i kadhakina manga mia mominaakana i rombongana Farisi tee ragina Herodes."#8:15 ragina Herodes: Miana Yahudi apake oni ragi apamembalia pogau ibarati to apekaogeaka kuasana, siitumo kuasa momalape atawa o kuasa momadhaki. Iwe sii o Isa apogauaka kadhaki bheiumbaaka minaaka i giu opea inda iparacaeana miana Farisi tee Herodes i mia bhari.

16Kasiimpo manga incia akoja-kojaakamo to hali incia sumai podho-podho manga incia tee apogau, "Incia apogau mboo sumai roonamo ingkita inda tee rotita."

17Wakutuuna Isa amataua ikoja-kojaakana manga incia, Incia apogaumo, "Apokia ingkomiu ukoja-kojaaka soʼalina ingkomiu inda ubhawa roti? Buaka ingkomiu indapo uka ukamatea tee umaʼanaia? Ingkomiu sii umentagali mpuu! 18#Yer. 5:21; Yeh. 12:2; Mrk. 4:12. Ingkomiu ukomata, pokia ingkomiu inda upokamata? Ingkomiu ukotalinga, pokia ingkomiu inda uporango? Buaka ingkomiu inda uudhania 19wakutuuna kuweta-weta lima angu roti to lima rewu mia? Pia langka o labhina irombusakamiu?"

Lawanina manga incia, "Sapulu rua langka." 20"Atawa wakutuuna kuweta-weta pitu angu roti to pata rewu mia, pia langka o labhina irombusakamiu?" Lawanina manga incia, "Pitu langka maoge."

21Kasiimpo Isa apogau uka i manga incia, "Indapo uka umaʼanaia?"

Isa Apaunto Kapiina Mia Mawilo i Bait Saida

8:22-26

22Isa tee manga murina akawamo i Bait Saida. Kasiimpo dhaangia manga mia mobhawaakea samia umane momawilo tee aemani mpuu i Isa to adhingku o mia mawilo sumai mamudhaakana amembali apokamata. 23Isa akeni limana mia mawilo sumai tee atondaia i sambalina kampo. Isa awiluki matana mia mawilo sumai tee adhika limana i matana mia incia sumai, kasiimpo aabhakia, "Amembalimo upokamata?"

24Mia mawilo sumai apotonto i aroana, kasiimpo apogau, "Iaku kumembalimo kukamata manga mia, maka manga incia kukamatea mboomo manga puuna kau mokalingka-lingka."

25Isa apendua adhika limana i matana mia mawilo sumai. Sabutuna o matana mia sumai atobungkalemo, incia amembalimo apokamata, tee atindamo akamata sagala giu. 26Kasiimpo Isa apogau tee mia mopadhana ipauntona kapiina sumai, "Mbulimo, tee bholimo upesua pendua i kampo incia sumai."#8:26 bholimo upesua pendua i kampo incia sumai: Dhaangiapo uka manga kaburi momangenge mopogauna, "Bholi upesua pendua i kampo tee apaumbaaka giu incia sumai i incemapo uka."

Kangakuna Petrus

8:27-30

(Mat. 16:13-20; Luk. 9:18-21)

27Isa tee manga murina alingka i desa-desa moposarina tee kota Kaisarea Filipi. I tangana dhala o Isa aabhamo i manga murina, "Kera-kera i fikirina mia, incema Iaku sii?"

28 # Mrk. 6:14-15; Luk. 9:7-9. Manga murina alawani, "Dhaangia mopogauna, 'Nabii Yahya Mopapebhahona,'#8:28 Nabii Yahya Mopapebhahona Siitumo samia nabii indapo momangengena momate. Incia o tolidhana inana Isa, siitumo Siti Mariam. [Elisabet o inana Yahya tee pinoinana Siti Mariam.] Tee o Isa aabhia alabhi minaaka samia nabii (kamata Mat. 3:1; 11:9) maka mosagaanana apogau, 'Nabii Ilyas,'#8:28 Nabii Ilyas: Ilyas sumai samia nabii molaianina Kawasana Opu i zamanina manga raja Israel motoangkana i sorogaa wakutuuna incia dhaangiapo adhadhi. Manga incia afikiria ambuli pendua i dunia tee asarongiaka karona o "Isa." sainamo mosagaanana uka apogau, 'Sala samia minaaka i manga nabii.' "

29 # Yah. 6:68-69. Kasiimpo Isa aabha uka, "Kera-kera i fikirimiu, incema buaka Iaku sii?"

Alawanimo o Petrus, "E Opu, Ingkoomo Al Masi."#8:29 Al Masi: Al Masi dhaangia o sarona minaaka i pogau Ibrani "Mesias." Maʼanana Mesias "mia iminakina bhaana." Mia sumai o bhaana aminakia to tandana asahamo Kawasana Opu to apamembalia raja atawa o nabiina atawa o imamuna.

30Kasiimpo Isa alarangia mpuu manga murina mamudhaakana inda apaumbaakea to incemapo uka o pokaiana tee karona.

Kapaumbaakana Bhaa-bhaana to Pokaiana tee Kanarakaana Isa tee Saratina to Moosena Incia

8:31-38; 9:1

(Mat. 16:21-28; Luk. 9:22-27)

31Sapadhana incia sumai o Isa apepuumo aadhariaka manga murina, ande o Anana Maanusia tabeana anamisi bhari kanarakaa. Incia bheamendeua manga mancuanana miana Israel, manga imamu maoge, tee manga ahalii Hukumu Taurati. Incia bheatopekamate, maka talu eo sapadhana sumai, Incia bheadhadhi pendua. 32Isa apakawaaka giu incia sumai tee mpuu-mpuuna incana tee atinda mpuu. Maka o Petrus ahela Isa i saripi tee apepuumo agorampangia.

33Maka wakutuuna Isa apoili tee apotonto i manga murina, Incia agorampangimo Petrus. Pogauna, "Dhencumo minaaka i aroaku, e Ibilisi! Roonamo fikirimu inda aminaaka i Aulataʼala, maka aminaaka i maanusia."

34 # Mat. 10:38; Luk. 14:27. Kasiimpo Isa akemba mia bhari tee manga murina, tee apogau i manga incia, "Ande dhaangia o mia gauna mooseaku, tabeana abholia o urusana karona, inda alabhiaka karona, tee asodha kau salibna tee aoseaku. 35#Mat. 10:39; Luk. 17:33; Yah. 12:25. Roonamo incema-incema gauna mopasalaamatina inyawana, incia bheakailanga inyawana, maka incema-incema mokailangana inyawana rampaakanamo Iaku tee roonamo Lele Malapena Aulataʼala, incia bheapasalaamati inyawana. 36Opea o labana mia apotibhaaka saangua dunia sii maka akailanga inyawana? 37Atawa opea momembalina idhawuakana mia to abholosiaka inyawana? 38Roonamo incema-incema momaeana moʼakuiaku tee momaeana moʼakuina pogauku i tanga-tangana zamanina mia mokodosa tee mia inda mokeniakana janjina sii, sumaimo o Anana Maanusia uka bheamaea aʼakui mia incia sumai wakutuuna Incia aumba naile itu i nuncana kamuliangina Amana apoose tee manga malaaʼekati momangkilo."

Currently Selected:

Markus 8: KMW

Highlight

Copy

Compare