Bhaa-bhaana 49
49
Pogauna Kapadhaana Nabii Yakub i Manga Anana
49:1-28
1Kasiimpomo Yakub akembamo manga anana tee apogau, "Poromusakamo ingkomiu, iaku bhekupaumbaakakomiu opea bhemomembalina to ingkomiu naile itu.
2Poromusakamo tee rangomea, e manga anana Yakub,
Rangomea Israel amamu.
3Ruben, ingkoomo anaku o tumpe,
Kakaaku tee bhakena bhaa-bhaana kuasaku,
molabhina motohoromatina,
molabhina kakaana.
4Ingkoo mboomo mawa moluana, inda ukapoia utaangia karomu samia
indamo umembali o anana mobhaa-bhaana
Sababuna ingkoo padhamo ukompasi kolemaku,
kasiimpo upekarombua.
Incia padhamo akolemiki bhawineku i kolemaku!
5Simeon tee Lewi, o andi tee aka, apake ewanga to apahancuru opeopeapo.
6Bholi uose ihaejatiakana manga incia, e badaku,
Bholi uposaangu tee manga incia, e baatiniku,
roonamo aʼamara bheapekamate mia,
tee pamuruna manga incia atumpo aena sapi.
7Maasangia amarana manga incia akanea katunda, roonamo amasega mpuu.
Maasangia kasegana manga akanea katunda, roonamo amakaa mpuu.
Iaku bhekupapogaa-gaaia manga i tanga-tangana manga anana Yakub,
tee kupekantalea manga incia i tanga-tangana manga anana Israel.
8Yuda,#49:8 Yuda: Isarongiaka uka Yehuda. ingkoo bheapujiko manga witinaimu.
Limamu bheatalo manga musumu.
Tee manga anana amamu bheasuju i ingkoo
9Yuda mboomo sambaa singa mangura,
incia ambuli i lia sapadhana apeelo kinandena,
incia apangulia kasiimpo akole mboo sambaa singa umane
tee mboo sambaa singa bhawine,
tee inda samia uka mobaranina mopabhangua.
10Katuko pamarintana inda bheapinda minaaka i Yuda,
tee siwuluna bheaparintangi saʼumurua,
sampe aumba incia mokohakuakea,#49:10 sampe aumba incia mokohakuakea: Amembali uka akomaʼana "sampe aumba upeti i incia."
i inciamo manga lipu bheataʼati.
11Incia abhoke keledaina i puuna angguru,
tee anana keledaina i puuna angguru motopilina.
Inca atapasi pakeana,
tee bhajuna tee uwena bhakena angguru.
12Matana bhealabhi kaetana minaaka i angguru,
tee ngincina bhealabhi kaputina minaaka i uwena susu.
13Zebulon bheamboore i bhiwina tawo.
Incia bheamembali labusana manga kapala,
tee potidhaana bheakawea i Sidon.
14Isakhar mboomo sambaa keledai momakaana,
mopotidholena i tanga-tangana bara momatamona
15Wakutuuna akamatea ande tampana poniuntoa sumai amalape
tee lipu incia sumai apekasanaa,
apabhelemea o awaana to asodhaaia
kasiimpo amembali bhatuana mokarajaana.
16Dan#49:16 Dan: Saro incia sii akomaʼana "aʼadili." bheaʼadili lipuna
mboomo manga kaomu sagaanana i Israel.
17Dan bheamembali mboomo ulo i dhala,
mokobisa i loro
motompana korontunguna ajara,
sabutuna mosawikia amandawu apambara.
18Iaku kuantagi kasalaamati minaaka i Ingkoo e KAWASANA OPU.
19Gad bheahumbunia parampo,
maka o Gad ambuli abhebhe korontunguna manga incia.
20Asyer, kinandena amambaka ataralabhi-labhi;
incia bheapatalaaka kinande momambaka to raja.
21Naftali mboomo sambaa rusa bhawine molapa;
incia bheakoʼana manga anana makesa.
22Yusuf mboomo raha abukeaka bhake,
rahana abukeaka bhake i saripina matana uwe.
Manga rahana atuwu alaloi rindi.
23Manga pande pana apanarakaaia,
ahumbunia tee pana.
24Maka, o panana sadhaadhaana amatangka,
tee ruambalia limana sadhaadhaana amakaa,
roonamo kakuasa Momakaana, Aulataʼalana Yakub,
roonamo Mojaganina, Gunu Bhatuna Israel,
25roonamo Aulataʼalana amamu, bhemotulungiko,
tee roonamo Mokokuasana, bhemobarakatiko
tee abarakatiko tee kowao minaaka i laiana i bhawo,
tee abarakatiko tee uwe minaaka i nuncana tana.
Maasangia ingkoo ukosiwulu abhari
tee uka manga binata kadhambaakamu akohasiliaka abhari anana.
26Barakatina amamu alabhia barakatina manga opuaku,
akawea tidhana manga gunu i zamani momangengena.
Maasangia Aulataʼala adhawuaka manga barakati sii i Yusuf,
motoangkana amembali kapala to manga witinaina.
27Binyamin mboomo sambaa serigala mobheka-bhekana dagi.
I wakutuuna malo-malo incia akande kinandena,
tee wakutuu atobhele eo incia apodhawu-dhawumo irampasina."
28Siitumo bhari-bharia lipuna Israel, sapulu rua mia kabharina, tee siitumo ipogauakana amana manga wakutuuna aemaniakea barakati to manga incia tee barakati mohususuna to samia-samia.
Nabii Yakub Amate
49:29-33
29Sapadhana incia sumai, asameamo Yakub i manga incia, "Indamo amangenge bhearomusakaakumo tee manga kaomuku i alamuna mia mate. Koburuakumo i saripina opuaku lantapi-lantapi i nuncana lia i inawu Efron, miana Het sumai, 30siitumo lia i inawu Makhpela, weta i timbu Mamre, i Tana Kanaan. Lia incia sumai aalia Ibrahim tee inawuna minaaka i Efron, miana Het, to apamembalia koburu pewauana. 31Iwe sumaimo Ibrahim tee Sarah, bhawinena, akoburua, mboo sumai uka Ishak tee Ribka bhawinena. Iwe sumai uka iaku kukoburu Lea. 32Inawu tee lia modhaangiana i nuncana padhamo atoali minaaka i miana Het."
33Sapadhana Yakub asamea i manga anana, ahelamea ruambalia aena i bhawona kolemana kasiimpomo amate, incia aromusakea tee manga kaomuna i alamuna mia mate.
Currently Selected:
Bhaa-bhaana 49: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
