Bhaa-bhaana 46

Nabii Yakub tee Witinaina Apinda i Tana Mesir

46:1-34

1Sumaimo, abhosemo Israel tee sagala giu pewauana. Wakutuuna incia akawa i Bersyeba, incia apasombaakamo kurubani motosumbele i Aulataʼalana Ishak, o amana.

2Kasiimpomo, afirimanimo Aulataʼala i Israel i nuncana pokamatana i malo, "Yakub, Yakub."

Lawanina, "Sii iaku, Kawasana Opu."

3Firimanina, "Iakumo Aulataʼala, Aulataʼalana amamu. Bholi umaeka ulingka i Mesir, roonamo Iaku bhekupamembaliko saangu lipu maoge iwe sumai. 4Iaku bhekupoose tee ingkoo i Mesir, Iaku uka dhaanamo kubhawako umbuli pendua. Ingkoo bheupotidhole i saangoana Yusuf wakutuu ajalamu akawa."

5Kasiimpomo, abhosemo Yakub minaaka i Bersyeba. Manga anana Israel abhawa amana, manga anana, manga bhawinena tee uka manga kareta ilambokona Firaun to aule manga incia. 6Manga incia uka abhawa kadhambaakana tee harataa mopadhana ipokawaakana i Tana Kanaan, kasiimpo abhose i Mesir. Yakub abhawa bhari-bharia siwuluna, siitumo 7bhari-bharia manga anana opuopuana umane tee bhawine.

8O siimo manga sarona siwuluna Israel moumbana i Mesir, siitumo Yakub tee siwuluna.

Anana Yakub tumpena siitumo Ruben.

9Manga anana Ruben:

siitumo Henokh, Palu, Hezron, tee Karmi.

10Manga anana Simeon:

siitumo Yemuel, Yamin, Ohad, Yakhin, Zohar, tee Saul, anana samia bhawinena Kanaan.

11Manga anana Lewi:

siitumo Gerson, Kehat tee Merari.

12Manga anana Yuda:

siitumo Er, Onan, Syela, Peres, tee Zerah. Maka Er tee Onan amatemo i Tana Kanaan.

Manga anana Peres:

siitumo Hezron tee Hamul.

13Manga anana Isakhar:

siitumo Tola, Pua, Ayub, tee Simron.

14Manga anana Zebulon:

siitumo Sered, Elon, tee Yahleel.

15Manga incia sii satotuuna siwuluna Lea, mopalaahirina manga anana umane to Yakub i Padan-Aram, tee uka Dina, anana bhawine. Jadi, bhari-bharia siwuluna Yakub minaaka i Lea, malape umane atawa bhawine, kabharina 33 mia.

16Manga anana Gad:

siitumo Zifyon, Hagi, Syuni, Ezbon, Eri, Arodi, tee Areli.

17Manga anana Asyer:

siitumo Yimna, Yiswa, Yiswi, Beria, tee Sera, witinai bhawinena manga.

Manga anana Beria:

siitumo Heber tee Malkiel.

18Manga incia sii satotuuna siwuluna Zilpa, bhatua bhawine idhawuakana Laban i Lea, o anana. Jadi bhari-bharia siwuluna Yakub mominaakana i Zilpa sumai kabharina 16 mia.

19Manga anana Rahel, bhawinena Yakub:

siitumo Yusuf tee Binyamin.

20Sainamo manga anana Yusuf:

siitumo Manasye tee Efraim, ipalaahirina i Mesir minaaka i Asnat binti Potifera, Imamu i On.

21Manga anana Binyamin:

siitumo Bela, Bekher, Asybel, Gera, Naaman, Ehi, Ros, Mupim, Hupim, tee Ared.

22Manga incia sii satotuuna siwuluna Yakub mominaakana i Rahel, kabharina 14 mia.

23Anana Dan:

siitumo Husyim.

24Manga anana Naftali:

siitumo Yahzeel, Guni, Yezer, tee Syilem.

25Manga incia sumai satotuuna siwuluna Bilha, bhatua bhawine idhawuakana Laban i Rahel, o anana. Jadi, bhari-bharia siwuluna Yakub mominaakana i Bilha kabharina pitu mia.

26Kabharina mia moumbana i Mesir apobhawa tee Yakub, siitumo siwuluna, inda atolentu manga bhawinena, bhari-bharia 66 mia. 27Manga anana Yusuf molaahirina to incia i Mesir dhaangia rua mia sabutuna bhari-bharia witinaina Yakub modhaangiana i Mesir wakutuu incia sumai kabharina 70 mia.

28Yakub atumpumo Yuda aporikanaakea apokawaaka Yusuf to asusuakea dhala aporope i Tana Gosyen. Sakawana manga incia i Tana Gosyen, 29Yusuf akompamo i karetana kasiimpomo alingka to apokawaaka Israel, amana, i Gosyen. Sapokawana manga, Yusuf asakumo bhorokona amana tee atangi amangenge i awaana.

30Pogauna Israel i Yusuf, "Sii-sii taroakamo iaku kumate, roonamo iaku padhamo kukamata roumu tee kumataua ande ingkoo dhaangia udhadhi."

31Kasiimpo Yusuf apogau i manga witinaina tee witinaina amana, "Iaku bhekulingka kupaumba Firaun, 'Manga witinaiku tee witinaina amaku, momboorena i Tana Kanaan, padhamo aumba iaku. 32Manga incia sumai mojaganina kadhambaaka, roonamo manga incia amananeamo ajagani kadhambaaka. Gulumana bhembe dumba, gulumana sapi, tee sagala giu pewauana abhawea.' 33Jadi, ande Firaun akemba ingkomiu tee aabha, 'Opea karajaamiu?' 34Lawanimo, 'Apepuu maidhiidhi, sampemo sii-sii manga bhatuamu ajagani kadhambaaka, mboomo uka opuamami pitu lapina.' Tee mboo sumai ingkomiu amembali umboore i Tana Gosyen, roonamo bhari-bharia mojaganina kadhambaaka satotuuna kahina to miana Mesir."

Currently Selected:

Bhaa-bhaana 46: KMW

Highlight

Copy

Compare