Limbaana 15

Laguna Nabii Musa tee Miana Israel

15:1-21

1I wakutuu incia sumai Musa tee miana Israel alaguaka lagu incia sii to KAWASANA OPU, mboo sii laguna,

"Iaku gauku bhekulagu to KAWASANA OPU, roonamo Incia amalanga atomuliangi,

ajara tee mosawikia, atudhaakea i nuncana tawo.

2KAWASANA OPU mopekakaaku tee mopamembaliaku kulagu-laguaka kapujia incia sii.

Inciamo mopasalaamatiaku.

Inciamo Aulataʼalaku, kupujimo Incia,

tee Aulataʼala ipasombaakana amaku, tee kupekalangea.

3KAWASANA OPU, satotuuna mboomo mia pande potimbe momasega.

KAWASANA OPU, sumaimo sarona.

4Karetana Firaun tee tantarana abhanakea i nuncana Tawo Towu Lambe.

Manga kapalana suludaduna momalapena motopilina apatondua i nuncana Tawo Towu Lambe.

5Andala maoge atutubhi manga incia,

manga incia atondu i uwe momandalana mboomo bhatu.

6Lima kaanamu, e KAWASANA OPU, amulia roonamo kuasamu,

lima kaanamu, e KAWASANA OPU, apahancuru musumu.

7Tee kaogesamu momaogena

Upabinasea bhari-bharia mobhanguna to aewangi Ingkoo.

Ingkoo urambasaka amaramu mokarore-rorena,

mokandena manga incia mboomo katumpuna laena bhae.

8Tee poinuncana angomu, utowii uwena tawo, sabutuna o uwe sumai akabumbu-bumbu malanga,

saangua siwuluakana uwe akakaro makate mboomo rindi,

saanampuu andala maoge amembali mboomo bhatu esi i tangana tawo, abhatu tee inda siwulu.

9Pogauna musu, 'Manga incia bhekupajerea, tee kurakoa.

Bhekupalimba hancuku, tee bhekupabinasea.

Kasiimpo bhari-bharia harataana manga bhekurampasia,

bhekubage-bagea tee kuniʼimatia sampe atumpu incaku.'

10Maka KAWASANA OPU tee sampearo poinunca

lausaka tawo atutubhi manga incia.

Manga incia atondumo mboomo timara

i nuncana ewona tawo momaoge.

11Manga dewa iapai mopokanana tee Ingkoo,

e KAWASANA OPU Momuliana roonamo kangkilomu?

Incema momembalina mopewauna manga giu inda momentela

tee apewau hali motomaeka mboomo Ingkoo?

12Upaulua lima kaanamu,

sabutuna o musu atopadha adhokua alamu.

13Tee kaasimu inda amabhotu,

Ingkoo ukapalaikia o lipu mopadhana itolosimu.

Tee kuasamu momaogena utondaia i mbooresamu momangkilona.

14Manga lipu arangoa, manga incia uka arengku,

kapii mopeloli asampaiki raʼeatina Tana Filistin.

15I wakutuu incia sumai abagoeamo manga kapalana kaomuna Edom,

tee manga mia mokokuasana i Moab amembali arengku,

bhari-bharia raʼeatina Tana Kanaan amaeka.

16Manga incia amaeka tee amingkiri,#15:16 amingkiri: Namisina amaeka mpuu tee ameri.

e KAWASANA OPU, wakutuu akamata limamu momakaana.

Wakutuuna uumatimu alalo,

musu apakukua muncuna mboomo bhatu,

sakawana uumatimu mopadhana itolosimu alalomo.

17E KAWASANA OPU, Ingkoo ubhawea tee udhikaia uumatimu

i tampa ipilimu to mbooresamu.

Manga incia amboore i gunumu karomu,

i tampana momangkilona ipabhangumu karomu, e Kawasana Opu.

18E KAWASANA OPU, Ingkoomo Raja

moparintana saʼumurua."

19I wakutuuna miana Israel apolimba i tawo, manga incia adhala i tanga-tangana tawo momatuu. Maka wakutuuna manga ajara, manga kareta, tee tantara mosawikina ajarana miana Mesir apesua i nuncana tawo, KAWASANA OPU apewau uwena alembo pendua sabutuna manga incia atondu. 20Kasiimpo Miryam, samia nabii bhawine, akana Harun, aala rebana, tee bhari-bharia bhawine aose abhebhe rebana apoose amanari. 21Miryam alagu to manga incia,

"Lagumo to KAWASANA OPU,

sababuna Incia amalanga amulia.

Bhari-bharia ajara tee mosawikia

atudhaakea i nuncana tawo."

I Mara tee i Elim

15:22-27

22Kasiimpo Musa abhawa miana Israel minaaka i Tawo Towu Lambe arope i Tana Matuu Syur. Kangenge talu eo manga incia alingka alaloi tana matuu inda apotibhaaka uwe. 23Manga incia akawamo i Mara,#15:23 Mara: Saro incia sii i nuncana oni Ibrani maʼanana "amapaʼi". maka inda amembali asumpu uwe i Mara, roonamo amapaʼi namina. Siitumo sababuna tampa incia sumai asarongiakea Mara. 24Sumaimo manga mia sumai adodo i Musa tee aabha, "Opea bheisumputa?"

25Musa adoʼa mpuu-mpuu i KAWASANA OPU, kasiimpo KAWASANA OPU asusuakea satumpo kau. Musa atudhaaka kau sumai i nuncana uwe, kasiimpo uwe sumai amembali amambaka namina, sabutuna amembali atosumpu.

I tampa incia sumai KAWASANA OPU adhawumo sagala katotapu tee tutura i manga incia, tee iwe sumai uka KAWASANA OPU auji manga incia. 26Firimanina KAWASANA OPU, "Taʼatiaku mpuu-mpuu, tee upewaumea opea ikamataku amalape, osemea bhari-bharia parintaku tee keniakea sagala katotapuku. Ande ingkoo upewau mboo sumai, inda bhekuhukumuko tee manga panyaki ipakangkanaiakaku i manga miana Mesir. Iakumo KAWASANA OPU mopauntokomu minaaka i panyakimu."

27Sapadhana sumai manga incia akawamo i tampa isarongiaka Elim. Iwe sumai dhaangia sapulu rua angu matana uwe tee pitu pulu puuna horomaa. Kasiimpomo manga incia apokema i saripina uwe sumai.

Currently Selected:

Limbaana 15: KMW

Highlight

Copy

Compare