1 Timotius 2
2
Kapaumba to Jamaʼa Mamudhaakana Adoʼa
2:1-7
1Rampaakanamo sumai bhaa-bhaana iaku kunaasehatiakako to uemani mpuu i Aulataʼala, udoʼa, uemani safaʼati, tee uemani sukuru to bhari-bharia mia, 2tee udoʼaaka uka to manga raja tee bhari-bharia kaogesa mamudhaakana tadhadhi tapomalape tee maanusia rangata tee taʼamani i nuncana tapewau opea molaengana ipewauta sabutuna ingkita tadhadhi tatanangi tee tatohoromati. 3Manga doʼamo mboo sumai momalapena tee ipeeluna Aulataʼala Mangapasalaamatina. 4Gauna Incia mamudhaakana bhari-bharia mia atopasalaamati tee amatau kabanara pokaiana tee Al Masi. 5Roonamo tangkanamo sakaro-karona o Aulataʼala, tee sakaro-karona Mopapomalapena pendua Aulataʼala tee maanusia, siitumo Isa Al Masi, tee Incia uka o maanusia. 6Isa o mia mopadhana mopasaraakaakana karona mamudhaakana maanusia atopabebasi minaaka i manga dosana. Kajadia incia sumai Aulataʼala asusuakea i wakutuu mopadhana itantuakana, to amembali bukutii ande Incia gauna mamudhaakana bhari-bharia mia abebasi minaaka i dosana, 7#2Tim. 1:11.tee rampaakanamo giu incia sumai, iaku apatotapuaku to kumembali samia rasulu tee kumembali samia guru moadhariakana Lele Malape mobanara to mia inda motolentuna miana Yahudi. Opea ipogauakaku sii abanara tee inda kugau-gau.
Tuturana Ibaadati to Umane tee Bhawine Wakutuuna i nuncana Jamaʼa
2:8-15
8Rampaakanamo sumai iapai-iapaipo uka ingkomiu uporomu, kapeeluku mamudhaakana bhari-bharia umane atanempe limana momangkilo tee adoʼa inda tee aʼamara atawa apogera-gera. 9#1Ptr. 3:3.Mboomo uka manga bhawine, manga incia tabeana apaajo karona tee cara molaengana tee apake pakea mokoʼadati, tee momalapena podho sakawana. Manga incia bholi ataralabhi-labhi apiia o buluana, bholi apake bulawa, muntia, atawa pakea momaalina haragaana, 10maka manga incia tabeana apaajo karona tee feʼeli momalape. Mboo sumaimo tabeana o giu molaengana ipewauna bhawine moʼakuina aʼibaadati i Aulataʼala. 11Manga incia tabeana atanangi, apengkaadhari, tee ataʼati. 12Iaku inda kuundaakea o bhawine aadhari tee aparinta umane, maka tabeana manga incia bholi tee uuʼuuna.#2:12 bholi tee uuʼuuna: Aipomo maʼanana manga bhawine bholi apogau wakutuuna dhaangia tee umane moadharina manga mia i nuncana jamaʼa. 13#Bhaa. 2:7; 2:21-22.Roonamo Nabii Adamu mobhaa-bhaana ipadhaangia kasiimpo Hawa, 14#Bhaa. 3:1-6.tee mencuana Adamu mototipuna, maka o bhawinemo sumai, sabutuna incia amandawu i nuncana dosa. 15Maka moomini mboo sumai o bhawine bheatopasalaamati alaloi apalaahiri anaana, somanamo incia asadhaadhaa aparacaea tee amaasiaka mia mosagaanana tee adhadhi mangkilo tee amembali ataangi karona minaaka i giu momadhaki.
Currently Selected:
1 Timotius 2: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
