BurhSira 7
7
Amahano ga ngasi lubero
1Oleke okujira amabî, n’amabî garhakuyâlule; 2oyâke obulyâlya, n’obulyâlya bwâkuyâka. 3Mwâna wâni, oleke okurhwêra omu mpinga y’obulyâlya, ly’olek’isârûla akal’ibala. 4Orhasengeraga Nyamuzinda entebe ya burhanzi, orhahûnaga na mwâmi ecikono c’irenge. 5Orhacîkungaga mushinganyanya embere za Nyamuzinda, n’embere za mwâmi orhahimhaga amarhimanya. 6Mwâna wâni, orhahambiraga omukolo gw’obucîranuzi akabà orhankahashimanyula obulyâlya, bulya omugale anakuhira olunda lwâge, obone wamabà ndyâlya nâwe. 7Orhacîshûbulaga omu ndêko y’olugo, orhabâga wa busha embere z’olubaga. 8Orhayêmêraga bakukulula kabiri mpu ojire amabî, bulya n’eliguma orhalifume. 9Orhaderhaga, erhi: «Ka Nyamuzinda arhâlola entûlo zâni, erhi k’arhâziyankirire hano nzirhûla emund’ali». 10Nka washenga oleke okucîdirhibula, orhalekaga n’okuhâna entûlo y’omukenyi. 11Oleke okushekera omuntu ohanyagîre, bulya hali amango ôwamuhebagakwo#7, 11 Owamuhebagakwo: hali amango Nyamuzinda arhangula omuntu n’amalibuko, lolà Ayubu. obwo buhanya ankacimuzûsa. 12Orhakazâgisingira mwene winyu obunywesi, n’omwîra wâwe kwo n’okwo. 13Omanye okunywerha, bulya ntà minjà garhengamwo. 14Orhabâga muvôle omu ndêko y’abashosi, oleke n’orhunwa rhunji-rhunji omu masâla. 15Orhayâkaga emikolo mizibu, ciru n’omukolo gw’enfuka, bulya Ow’Enyanya ye wagujiraga. 16Orhacîhiraga oku lukere lw’abanya-byâha, omanye oku obukunizi burhâlegame 17Obè mwîrhohye bwenêne, bulya omuliro n’emivunyu bwo buhane bw’enkola-maligo. 18Omanye omwîra wankamugera ebirugu, nîsi erhi mwene winyu omugere amasholo g’e Yofiri. 19Omukazi nkana na murhimanya, orhahîra okamushomba, obwinjà bwâge bulushire amasholo cicîro. 20Oleke okurhindibuza omujà okozire bwinjà, nîsi erhi mwambali wâwe ocîhanganyire. 21Ozigire omujà#7, 21 Obuhuru bwâge: omujà ocîkenzire akwânîne alolwe nk’abandi bantu, ahabwe okubà ntagengwa kwâge nk’akola amanyire obuhuru co cici. Lolà Filemoni. w’obukengêre nk’oku ocîzigira wêne, orhabulaga bwacîmwirikira.
Abâna
22K’ojira amasò#7, 22 Amasò: masô ga bintu, nkâfu, bihuzi…? Ogashibirire; akabà galimwo obunguke, ogalange bwinjà. 23K’ojira abâna? Obalere bwinjà, obagombye kurheng’eburhò bwâbo. 24K’ojira abanyere? Obashîbirire omubiri bwinjà, ci kwône obayêreke obusù bukali. 25Oyâluse mwâli wâwe, kuli kwinjà bwenêne, ci omuhè omulume mwinjà. 26Ka mukazi nkana ojira? Omanye wankamuhulusa, n’akabà oyu ogwêrhe arhali ye, orhacîkubagiraga-ye.
Ababusi
27Okenge sho n’omurhima gwoshi, n’amalibuko nyoko#7, 27 Nyoko àbwîne: okenge sho na nyoko, liri irhegeko lya Nyamuzinda, lolà Murh 20, 12… okukengêra amalibuko nyoko abwîne we rhumire kurhume kandi wamukenga kulusha. abwîne orhahîra okagayîbagira. 28Gerêreza oku bo bakuburhaga: mbwîraga bici wabagalulire oku minjà bàkujirire?
Abadâhwa
29Orhînye Nyamuzinda n’omûka gwâwe gwoshi, okenge n’abadâhwa bâge#7, 29 omûka: iroho, buzîne: abadâhwa bâge: omudâhwa akwânîne olukengwa bulya ali murhumisi wa Nnâmahanga, lolà «omuganda akengerwa nnawâbo».. 30Owakulemaga omuzigire n’emisî yâwe yoshi, n’abarhumisi bâge orhabahabaga. 31Orhînye Nyamuzinda, okenge n’omudâhwa, omuhè omwanya gwâge bamutwîrîre: omwâka muhyâhya, enterekêro y’okucîyunjuza, entûlo y’oluziha, enterekêro y’okushukûlwa, n’ebirhanzi n’ebitagatîfu.
Abakenyi n’abahanyagîre
32Olambûle enfune, ohè omukenyi, ly’obona omugisho mwimâna. 33Ohè ngasi oyîsa omûka, ciru n’abafîre nabo orhabayîbagiraga#7, 33 Okukuza abafîre: abafîre bacikwânîne okukengwa bulya bali muli Nyamuzinda, lolà Tob 1, 17; 12, 12.. 34Orhayâkag’abadwîrhe balaka, ofè mungo gw’abalaka. 35Orhayôbohaga okushîbirira abalwâla, okwo kwarhuma nâwe wâsîmwa. 36Omu bijiro byâwe byoshi, kengêra obuzinda bwâwe, na ntyo wayâka ebyâha.
Mashi Bible © BUKAVU Archdiocese of Bukavu, 2024.