BurhSira 44
44
Irenge lya bashakulûza bemêzi
1Rhuderhage ogw’abajire irenge, bashakulûza#44, 1 Abakulûkulù bîrhu: balarha, bashakulûza. nk’oku banakulikirine. 2Nyamuzinda aluzize irenge, ayêrekana obukulu bwâge kurhenga ensiku za mîra. 3Omu balume, baguma bahâbwa obwâmi, banajà irenge erhi burhwâli bwâbo burhuma, abandi babà balenga omu kuhâna ihano, batwa emigani y’obulêbi. 4Abandi barhegeka olubaga n’amahano gâbo, n’obukengêre burhimanya omu lubaga, banayigîriza n’ebinwa by’oburhimanya. 5Abandi bashuba bazihi, bayandika n’ebinwa binunu. 6Abandi bahirhira oku birugu n’oku buhashe, balama n’omurhûla aha mwâbo. 7Boshi oku banali babà n’olukengwa, emw’abantu b’amango gâbo, bakuzibwa omu kalamo kâbo. 8Baguma muli bo basiga izîno, izîno liciderhwa n’obukenge kuhika ene, 9Abandi barhasigaga kashambala; bagenzire nk’abarhahali. Kwo bali nka kuno barhali en’igulu, kwo n’okwo iburha lyâbo enyuma zâbo. 10Ci lolaga abagâbo, aba aminjà gâbo garhayibagiragwa. 11Iburha lyâbo lyalanzire akashambala kâbo, omwîmo gwâbo guli mwîmo gwa bulume. 12Obûko bwâbo bukulikire amarhegeko, n’abâna bâbo omu njira yâbo barhaheze irenge lyâbo. 13iburha lyâbo lyâbâho ensiku zoshi, irenge lyâbo lirhakageramo citù, 14Emibiri yâbo yabishirwe n’omurhûla: izîno lyâbo liyôsire lizîne omu maburhwa. 15Ebihugo byaderha oburhimanya bwâbo, n’endêko emanyîse obukuze bwâbo.
Henoki
16Henoki asîmîsa Nyamuzinda, Nyamuzinda amuhêka, lwinganyo lw’okuhinduka kw’amâburhwa.
Nûhu
17Nûhu abonekana okunali muntu mushinganyanya, omu mango g’obukunizi, abà ye nyamerè: oku burhabâle bwâge, igulu lyayôrhana kasigwa#44, 17 Kasigwa: mwâna îshe afîre amusiga omu izîmi erhi amusiga aciburhwa ntya: Nûhu n’omulala gwâge ali «kasigwa»; kwo kuderha owasigîre yêne abandi boshi bàmafà., lolà Iz 4, 3., amango ecihonzi camirîraga igulu. 18Muli ye, endagâno z’ensiku zoshi zajirwa,: mpu ly’abantu balekishubiholoka n’ecihûsi.
Abrahamu
19Abrahamu, shakulûza w’irenge w’amashanja mwandu, ntâye wahisire oku irenge lyâge. 20Akulikira irhegeko ly’Ow’Enyanya; àjira n’eciragâne haguma naye. Eco ciragâne acijira omu mubiri gwâge, n’erhi arhangulwa, abonekana oku anali mwemêzi. 21Co carhumire Nyamuzinda amulaganya n’ecihango, oku agisha amashanja goshi omu iburha lyâge, n’oku aluza obûko bwâge nka katulo k’oku idaho, analengereze iburha lyâge nka nyenyêzi z’emalunga, abahè ecihugo bayîmamwo, kurhenga oku nyanja kuhika oku yindi, kurhenga oku lwîshi kuhika ah’igulu lihekera.
Izaki na Yakôbo
22Kuli Izaki na Yakôbo, erhi îshe Abrahamu orhuma, Nyamuzinda ashub’ishâshula, 23omugisho gwâge oku bantu boshi muli Izaki, erhi îshe Abrahamu orhuma; adêkereza ecihango oku irhwe lya Yakôbo. Amuyîmika omu mugisho gwâge; amugabira n’ecihugo c’omwîmo, acitwâmwo mpande, acigabanyiza emilala oku enali iku mi n’ibiri.
Mashi Bible © BUKAVU Archdiocese of Bukavu, 2024.