BurhSira 41
41
Olufù
1Lufù mâshi! okukengêra oku h’oli kurhahimwa bululu oku muntu oli n’iragi ekarhî k’ebyâge, kuli kàshêga, oyu byoshi bibêrîre, n’owacîhasha okulya yêne. 2Mâshi lufù, kàli irhegeko lyâwe licîfinjirwe emwa kàlibwîre#41, 2 Emwa kàlibwîre: amalibuko ganarhuma omuntu acîfinja ôwafîre., oyu amagala gàrhibire mîra, emw’omushosi civandagwa olâl’arhânya, owarhibire omurhima arhiba n’obulangâlire. 3Orhayôbohaga olufù, kengêra àbakushokolîre n’abâli nyuma zâwe. 4Liri irhegeko Nyamuzinda àhebirekwo ngasi muntu cakarhuma wacîkenyagulira obulonza bw’Ow’Enyanya? Olame myâka ikumi, myâka igana erhi myâka cihumbi, ekuzimu barhakutumuze obulamu bwâwe.
Oluhembo lw’abantu babî
5Bâna ba mihera endyâlya ziburha, abakômera enyumpa z’enkola-maligo. 6Akashambala basigira abâna baburhwa na abanya-byâha kuhera ka nahera, iburha lyâbo cijâci ca ngasi lusiku. 7Omubusi mubî kujâcirwa ajâcirwa n’abâna bâge, bulya kulî ye ecibî carhengaga. 8Buhanya bwinyu, mwe nkola-maligo, bulya mwalesire irhegeko lya Nyamuzinda w’Enyanya. 9Mwabusirwe, mwaburhirwa obuhanya, mwâfa, mufâne n’obuhanya. 10Ngasi hirhenga omu budaka, omu budaka hishubira, enkola-maligo kwo na kwo, bahehêrirwe na kuhera bahera. 11Emishîbo bajirira abafîre ebà eyêrekîre emigogo yâbo, ci izîno ly’emihera kuhera linahera. 12Oshîbirire izîno lyâwe bulya lyo lyasigala, lyo likulu aha buhirhi bw’ensaranga. 13Akalamo k’iragi kanashinge nsiku, ci izîno ly’irenge libà ly’ensiku n’amango.
Enshonyi
14Bâna bâni, mubîkirire n’omurhûla enyigîrizo zâni, Burhimanya bufulike na buhirhi burhaboneka, makwânane maci byâkabona? 15Omuntu wafulika oku ali musirhe ye mukulu, oku muntu wafulika oburhimanya bwâge. 16Ntyo mukaziyumva enshonyi nk’oku namubwîra, bulya enshonyi zibâmo kunji, hali ezikwânîne omuntu, hali n’ezirhamukwânîni, n’abantu boshi barhazibà kuguma. 17Mubè nshonyi z’obûmaguza embere za sho na nyoko, n’ez’okunywerha embere z’omurhegesi n’omukulu, 18ez’okuvuna irhegeko embere z’omuzûzi, n’embere z’omurhambo w’abazûzi, n’ez’okubà mubî embere z’endêko y’olubaga. 19Obè nshonyi z’obulyâlya embere z’owinyu n’omwîra, n’ez’obushambo eka; 20embere z’okuli kwa Nyamuzinda n’endagâno yâge; obè nshonyi z’okuhira engofola oku mêza#41, 20 Engofola oku mêza: kuli kubula bukenge okuhira engofola oku mêza amango walya, kwo kuguma n’okuhira okuboko ah’irhama., 21ez’okuhânira embere z’abagayanyi, ez’okurhâgalula omusingo gw’abakulamusize: 22ez’okulolêreza embaraga, n’ez’okuyôza ow’emwinyu; 23ez’okunyaga omwanya gw’owundi erhi akantu bamuhîre, ez’okulolêreza omukazi ogwêrhe ibà; 24ez’okushâsa mwambali-kazi wâwe, omanye encingo yâge. 25Ez’okuderha kubî embere z’abîra bâwe, n’oyu wahâga orhamukangulaga; 26ez’okujà kwaderha n’okulumîza omwanzi wayumvîrhe, n’okuderha amahwe ga bene. 27Ntyo wanamanya enshonyi zikwânîne, n’abandi boshi bânakurhonya.
Mashi Bible © BUKAVU Archdiocese of Bukavu, 2024.