BurhSira 4
4
1Mwâna wâni, orhayîmaga omukenyi ehyamubîka, orhalungumarhazagya abâli buligo. 2Orhalibuzagya omushalye, ow’obuligo orhahîraga okamulîsa n’amagala. 3Orharhindibuzagya owarhindibusire, orhalegerezagya n’omukenyi olikuhûna. 4Orhakumîraga omukenyi orhindibwîre, orhakengulaga omukenyi. 5Orhakengulaga omuntu olagîrîre, omanye irhondo orharhumaga bakusigira enfûlago. 6Bulya erhi omuntu olagîrîre akakusigira enfûlago omu bulagîrire bwâge, Nyamuzinda wamulemaga anamuyumva. 7Obè musîmwa eka, okazikenga abakulu. 8Orhege omukenyi okurhwiri, akakulamusa, nâwe omulamuse n’obutûdu. 9Ofungire oyu badwîrhe barhindibuza, orhabâga mwôba nka watwa olubanja. 10Obè îshe w’enfûzi, orhabâle abakana. Ntyo wâbà nka mwene Ow’Enyanya, akusîma kulusha oku nyoko akusîma.
Oburhimanya kulera bulera
11Oburhimanya bunalere abâna bâbwo#4, 11 Ababulonza: Oburhimanya budesirwe nka muntu, lolà Mig 1, 25; 8, 12; Luk 7, 35., bushîbirire ababulonza. 12Omuntu ozigira oburhimanya erhi buzîne azigîre, abantu babukulikira kurhenga sêzi, bayumva obusîme. 13Owabuhisirekwo, ayîma omu irenge, ngasi hantu akaja, ajâne n’omugisho gwa Nyamuzinda. 14Abakolera oburhimanya, Nyamuzinda bakolera, n’ababusîma, basîmwa naye. 15Omuntu oyumva izù ly’oburhimanya, bwinjà atwa olubanja, omwîra wâbwo agwêrhe eciyimangîre. 16Ocîkubagira oburhimanya kushobôla abushobôlako, n’iburha lyâge libuyimemwo. 17Kulya kubà bwàmârhangimuhêka omu njira y’ebinzongonzongo, bumuyôbohye yêshi ashukume, bumulibuze, bumukome yêshi, kuhika abè wa kucîkubagirwa, yêshi akangavuke, 18buzinda, bumugalule obwo, bumushubize omu njira ekubllsire, bumumanyîse amahwe gâbwo. 19Omuntu akacîkenyagula, bunamurhibe, bumuleke agende lwâge.
Hali enshonyi n’enshonyi
20Mwâna wâni, lolà eburhambi n’obundi, ocîzibuke amabî, orhacîgayaga kulya kw’obuho. 21Bulya hali enshonyi ziheka omuntu omu câha, hali n’enshonyi ziri irenge n’inêma. 22Orhabâga mukali kuli we wêne okurhalusire, oleke n’okubà nshonyi kwarhuma wacîheza. 23Orhamîraga akanwa kankaciza, orhafulikaga oburhimanya bwâwe. 24Bulya binwa bimanyîsa oburhimanya, n’ekanwa yo erhenga ihano. 25Orhaderhaga okurhali, ci oyumve enshonyi z’okubà muhwinja. 26Orhabâga nshonyi z’okuyêmêra ecâha câwe, orhahîraga okaheka muhûsi gw’olwîshi kwo ebikanyâli. 27Orhacîrhegega omusirhe, orhahîraga okazimbira omugale olubanja. 28Olwîre obushinganyanya kuhika okufà, nâwe Nyakasane Nyamuzinda akulwira. 29Orhabâga ntwâli omu binwa, ogalibà mwôlo na mwôba omu bijiro. 30Orhabâga nka ntale omu mwâwe ogalibii mwôba embere za bambali bâwe. 31Okuboko kwâwe kurhabiduhiraga okuhâbwa, kukanazidohera okugalula.
Mashi Bible © BUKAVU Archdiocese of Bukavu, 2024.