BurhSira 22
22
Omwolo
1Omwôlo kwo ali nk’ibuye banîrekwo, ngasi wagera na kuheba olushungûrho. 2Omwôlo kwo ali nka camvu ca njalira, mazingonoko, ngasi ogahumakwo kuhôrhola anahôrhola enfune.
Emifiriri y’abâna
3Zibà nshonyi z’omulume okuburha ecirala c’omurhabana, ci okuburha ecirala c’omunyere kôhe kulengana bwenêne. 4Omunyere nkana, buhirhi bw’owamuyanka, ci omunyere mubî, mungo gw’owamuburhaga. 5Cikala-nshonyi w’omunyere, îshe na nnina azibonêsa, bombi kukaga bamukaga. 6Obukali burhagwêrhi lugero, lwimbo lwa mishîbo, ci okushûrha n’okuhanûla bubà burhimanya bukwânîne#22, 6 Bukwânîne: okuhana n’okushûrha: lolà Mig 13, 24; 19, 18; 22, 15; 23, 13-14; 29, 15-17.. 7Abâna bagwêrhe ecibâlya banali bîrhonzi, banabuke ababusi bâbo omungo. 8Abâna bagayanyi na mbula bukenge, banajâcize obwôrhere bwinjà bw’omulala gwâbo.
Oburhimanya n’isirhe
9Okuyigîriza omusirhe kubà kuhanga orhujo, kubà kuzûsa omuntu wafîre n’îrò. 10Okuhanûla omusirhe, kubà kuhanûla omuntu oli îrò, buzinda akudôse, mpu: «Bici ebyo?» 11Olakire ofîre: agenzire, arhakàcibona izûba, olakire omusirhe: arhacigwêrhi murhima, gwahûsire; kunyi wâlakira ofîre, bulya kurhamûka ajire, ci kuli omusirhe, olufù lwo lukulu aha kalamo kâge. 12Emishîbo y’ofîre zibà nsiku nda, ey’omusirhe n’omubî, nsiku zoshi z’akalamo kâbo. 13Orhabwîraga omusirhe binwa binji-binji, orhajâga ciru emund’ali, omanye akulêrhera embaka za busha, omanye akuzinza. Omuyâke, wabona omurhûla, ebihenyango byâge birhacikulibuze. 14Bicigi bizirho kulusha amabuye? Kurhi biderhwa? Cingolongolo. 15Omushenyi, omunyu, enundo y’ebyûma, byo byangu by’okubarhulwa aha cingolongolo. 16Oburhungiri buyûbake n’emirhi mizibu, burhagagajwa na musisi, omurhima gurhanziricîdôsa gubulihiga, gurhahombagana omu mango g’entambala. 17Omurhima guyêgemîre enkengêro z’oburhimanya, guli nka kulya bayinjihya olukûta n’irangi lyananîra bwinjà. 18Orhubuye rhutya-rhutya ah’irhwêrhwè ly’olukûta, rhurhalindira mpûsi, omurhima gw’ecingolongolo ebi gugerêreza byo binaguyôbohya.
Obwîra
19Bakashûrha isù, linadwe emirenge, bakahika omuntu oku nyomvu y’omurhima, banamanye ecikuli. 20Obanda irongo, abalaza orhunyunyi, ohangâla omwîra, bwîra ayîrha. 21Akabà wayômolîre omwîra engôrho, orharhâga omurhima, kwankanabà acigaluka; 22akabà waderhire omwîra kubî, orhayôbohaga, mwanaciyumvanya; ci omuhè rubanda, hoshi aho, obwîra bunafè. 23Mulungu wâwe akenyîre, mulole bwinjà, hano agâla, wasîma haguma naye; akajakwo obuhanya, orhamurhibagamwo, hano afuma olwo, mwe naye mwagabâna ebyâge. 24Engulumira mugî guyishokolera, kwo n’okwo bijâci bishokolera omukò. 25Ntakabà nshonyi z’okufungira omwîra, ntakanacîfulika ye. 26Akabâga ye n’enganya, abandi bakuyumva bamujire ndyâlya.
Obè masù
27Lêro ndi wakampira omulanzi oku kanwa, ahîre omu binwa byâni ecinwa c’obukengêre, lyo ndekisârhala byo birhumire, olulimi lulekimpeza?
Mashi Bible © BUKAVU Archdiocese of Bukavu, 2024.