Migani 25
25
V. Ecitabu ca kabirhi c'emigani yayandikagwa na Salomoni
1Lâba eyindi migani ya Salomoni, yàyandikagwa na bambali ba Hezekiyahu, mwâmi w’e Yudeya.
2Okufulika omwanzi, libà irenge lya Nyamuzinda, ci okusholera olubanja libà irenge lya mwâmi.
3Amalunga go gabâ enyanya n’igulu lyo libà idako, omurhima gw’abâmi gwohe libà ishâmba.
Ebwâmi erhabêra orhali mwîrhonzi
4Ecûma, ocibalazekwo amazî g’ecûma, wabona oku cayisha cirî-cirî;
5Okûle endyâlya omu masù ga mwâmi wabona oku entebe yâge yasêra omu bushinganyanya.
6Orhahîraga okacîhiramwo amakangarasa nk’oli omu masù ga mwâmi, orhanahîraga mpu wâjitamala halya h’abakulu-bakulu:
7Bulya aha bankakuyôza omu burhwâli, bankakubwîra mpu «ogere».
Ebi amasù gâwe gàbwîne, 8orhabihêkaga duba-duba aha kagombe, bulya kurhi okolaga wajira obwo, erhi owinyu ankakuyâgîriza?
9Olongôle mweshi n’owinyu, ci kwône orhabasagya ihwe lya bene;
10nnalyo akanakuyumva obone amâkugaya, nâwe wêne oheze olukengwa.
11Akanwa kalîke amango minjà, irehe lya masholo oku mbale y’amarhale.
12Ehigondo hy’amasholo n’enjuma y’amasholo gacîre, kwo binali nka kanwa k’omurhimanya wakalihira okurhwiri kwayumva.
13Omurhumwa mûmva, kw’ali omu masù g’owamurhumaga nka mîshi maholo-maholo amango bâsârûla, garhuliriz’omurhima.
14Omuntu ohâna omulagi arhâjirè, kw’ali nka bitù n’empûsi erhakulikîrwi na nkuba.
15Oburhûza bunarhume omurhambo agômba, olulimi lw’omuntu murhûza lunabeze akavuha.
16Erhi wankarhanga obûci, onalye oyîgurhe, ci kwône omanye wankacîhakabo, wankanagogwa.
17Orhahîraga okakômera enyumpa y’omulûngu, akanarhama obone mwamâshombana.
18Omuntu ohambâra omwalungwe, buli buhiri, ngôrho, mwampi mwôji.
19Okucîkubagira endyâlya olusiku luhanya, kunashube lîno libolo, kugulu kwâhegera.
20Okuhogola ensirha n’emboho eri, kubà kubulagira enkalishi oku cibânde, kuyimbira omurhima guli burhè.
21Omushombanyi wâwe erhi ankashalika, onamushalûle, erhi ankagwârhwa n’enyôrha, onamuhè anywe.
22Kuli kulunda amakala oku irhwe lyâge, Nyakasane akugalulira.
23Hali empûsi elêrha enkuba, olulimi lubà mwanzi nalwo lunalerhere omuntu oburhè.
24Abà omuntu ankabêra nyumpa nguma n’omukazi mudârhi, ankayûbaka oku kanshôsho k’enyumpa.
25Omwanzi mwinjà gwarhenga emahanga, kwo guli nka mîshi abà mumiro gw’omuntu oli nyôrha.
26Omushinganyanya oyôbohire enkola-maligo, ye muguma n’iriba lilabarhanyè nîsi erhi nshôko bahemwîre.
27Okulya obûci bunji kurhabà kwinjà, okurhebwa n’ebinwa by’oluhohòlolo nakwo kurhabà kwinjà.
28Olugo lw’omwerûlè, lulya lurhalikwo côgo, lwo lugumà n’omuntu orhajira murhima.
Mashi Bible © BUKAVU Archdiocese of Bukavu, 2024.