Migani 22
22
Okubâ n’izîno linjà
1Aha wankaluza ebirugu, wankajira izîno nkana, aha wakashegema amarhale n’amasholo, wankajà irenge.
2Omugale n’omugunda babugânîne mw’oku: bombi Nyakasane wabalemaga.
3Omwenge akabona obuhanya anabuyâke, abahwinja bôhe mpu barharhaluka, bayandûle.
4Oluhembo lw’obwîrhôhye n’okurhînya Nyakasane, bubà irenge n’akalamo.
Ebikwânana izîno ly’omuntu
5Mishûgi n’emirhego omu njira y’ababî, omuntu ocîlanzire yêhe kuyâka ayiyâka.
6Oyigîrize omwâna wâwe enjira âgeramwo, âbà akola mushosi erhi yo anacibâmwo.
7Mugale orhegeka abakenyi, ohûna mpu bamuhoze, ye mujà w’owamuhozagya.
8Orhwêra amaligo buhanya ahaka, karhî ka burhè bwâge kamushurha.
9Ayâgirwe mâshi omuntu ôbà lukogo, omuntu ohâ mukenyi oku cijumbu!
10Ohuluse omugambanyi entambala ehwe; embaka n’ebijâci byanarhûla.
11Nyakasane arhonya emirhima ecîre, oyishiderha ye mwâmi arhonya.
12Masù ga Nyakasane galanga omurhimanya, ci kwône ebinwa by’endyâlya ye bibula-buza.
Ebibihya izîno
13Omwôlo nk’aderha, mpu: «entale eri embuga», erhi: «banyîrhira omu muhanda».
14Akanwa k’abakazi b’embuga ebà nyènga, oyu Nyakasane ashombire ye yirhogeramwo.
15Obuhwinja bubà bunanîre oku murhima gw’omwâna, akarhi k’obuhane kanamulikûze kuli bwo.
16Okurhindibuza omukenyi kubà kumugaza, n’okushobôza omugale kubà kumukenya.
III. Ebinwa by’abarhimanya
17Binwa bya burhimanya, orhege ebinwa byâni okurhwiri, orhege omurhima ly’obimanya bwinjà.
18Bulyâla wâyumva osîmire okubibîkirira oku murhima gwâwe, n’okubona byoshi bikuli ngasi mango omu kanwa.
19Kuderha nti okaziyôrha ocîkubagire Nyakasane, kwo kurhumire nalonza okukumanyîsa ene enjira washimba.
20Ka ntabonaga nakuyandikira bigabi makumi asharhu, bya mahano n’obulenga?
21Kuderha, nti omanye okunali, onahashishuza n’ebinwa bikwânîne ngasi yêshi wakudôsa.
22Orhanyagiraga omukenyi okubâ mukenyi, n’ohanyagîre orhamulibulizagya aha lûmvi.
23Bulya Nyakasane ye basambira, n’abahaguzi, yêhe mûka abahêka.
24Orhayinjibanaga omuntu okunira bwenêne, orhakaz’îgigenda n’omuntu ôbà burhè duba.
25Wakanayîga enjira zâge, obone wamâfâ.
26Orhabâga wa muli balya bashurha omu nfune, bacîhâna cikinja oku myenda.
27Erhi wankabà orhagwêrhi ebi wâjuha, banakunyonyôla n’encingo ogwîshirakwo.
28Orhahîra okahindula olubibi lwa mîra, oku abashakulûza bâwe bàtwaga.
29K’obwîne omuntu mubidu omu kukola? Ye wankakolera mwâmi oyo, arhakayôrha akolera abantu kwône.
Mashi Bible © BUKAVU Archdiocese of Bukavu, 2024.