Mikeyo 7
7
Obulyâlya bwa boshi
1Namâlagîrira! bulya kwo nkola ndi nk’owahumbûlaga amalehe canda, nka malehe ga mizâbîbu gàhumbûlagwa enyuma ly’okusârûla; ntà cihadu cankacirîbwa, ciru mpâga irehe ly’omutini ndi nacifinja!
2Abantu ba Nnâmahanga barhaciboneka omu cihugo; ntà mushinganyanya ciru n’omuguma omu bantu. Boshi bàcîkwendesirage bayunja oku bahuma omukò, ngasi muguma adwîrhe arhega mwene wâbo akasirha#7, 2 Akasirha eri nshoho ngali ya bintamanzi eshushire akêshe, ekolêsibwa omu kurhega ensimba emuzirhu..
3Ebijiro amaboko gâbo galengeha okujira ganali mabî gônene. Omurhambo adwîrhe alinga ecituliro; n’omucîranuzi adwîrhe alinga empyûlo lyo atwa olubanja. Omukulu adwîrhe aderha ebigalugalu n’oku omurhima gunamuhire.
4Omwinja mulibo, anali nka lukererhè n’omushinganyanya nka lugurhu lwa mishûgi. Loli, olusiku lw’obuhane abalanzi bâwe baderhaga luyîruka, mukolaga mwasômerwa.
5Mumanye murhalangaliraga omwîra murhacikubagiraga ecìrongôzi. Omanye ciru orhashagalaga akanwa embere za mukâwe.
6Bulya omwânarhabana ali ajâcira îshe, omwânanyere ali ahagalika nnina. Omuhya-kazi ali ayimanganwa na nnazâla; ngasi muntu ashombirwe n’ab’omu mwâge.
7Cikwône niehe ngalamîre Nyakasane, ndagalîre Nyamuzinda w’okunciza, Nyamuzinda wâni ânyumva#7, 7 Muli ogu mulongo, omulêbi ayêrekinemwo obuhamîrizi bw’obucire nkana acîkubagira; nkaba ho anali ashwinjîre olwandiko lwâge. Okwo kwayishihâna omukâba gw’enjira oku bitakîro by’obulangâlire, byaciyishiriyûshûlwa buzinda. Biri nka bya kurhenga amango g’olubungo..
IV. Obulangâlire n’omusengero gw'olubaga
Siyoni ajacirwa n’omushombanyi wâge
8Orhacishinge erhi nie ntuma, wâni mushombanyi#7, 8 Oyo mushombanyi anahashibà Edomu erhi Asûru. wâni, akabà nahirimire, nâzûka; akabà ntamîre omu mwizimya, Nyakasane ye bulangashane bwâni.
9Nâlembera obukunizi bwa Nyakasane bulya namugomîre, kuhika ansambîse, antwîre olubanja. Bulya ampulusa, ampire ahâli obulangashane, mbone obushinganyanya bwâge.
10Hano omushombanyi wâni abona okwo, enshonyi zimubumbe; olya wambwîraga erhi: «Ngahi Nyamuzinda wâwe aligi?». Amasù gâni gamulolà hano akola adwîrhe alabarhwa nka bijondo omu njira.
11Olusiku lw’okuyûbaka ebyôgo byâwe luyîruka! Olwo lusiku bâgalihya ishwa lyâwe.
12Ago mango bene winyu bayâgaluka kurhenga e Asûru, kuhika omu bishagala by’e Mîsiri; kurhenga e Tiri kuhika oku lwîshi#7, 12 Lwîshi: kwo kuderha Eufrati., kurhenga oku nyanja kuhika oku yindi, na kurhenga oku ntondo kuhika oku yindi.
13Ciru akabà ntyo, ecihugo câbà bigûkà erhi ba nnaco bàrhuma, erhi bijiro byâbo bibî birhuma.
Omusengero oku mashanja g’abashombanyi
14Mâshi Nyakasane, yâbula olubaga lwâwe n’akarhi kâwe, obusò bw’omwîmo gwâwe, bala balamire buhumba omu muzirhu; omu mashaka g’e Karmeli. Bashubikera nka kulya byàli mîra omu Bashani n’omu Galadi.
15Nka kulya mwa zirya nsiku warhurhenzagya omu cihugo c’e Mîsiri oshubigirhuyêreka ebirhangâzo.
16Amashanja gabone enshonyi zigabumbe, ciru akabà gacibona misî, gâgwârha oku kanwa, gafuke n’amarhwîri.
17Bâmima oluvù nka njoka, nka ngasi biyandala oku idaho. Barhulubuka omu malîngiriro gâbo bayishe bajuguma, n’ebikango, n’obwôba embere zâwe.
Okushenga obwonjo bwa Nyamuzinda
18Ndi wundi Nyamuzinda akâwe, obabalira amabî, ozaza ecâha, orhabika bukunizi ensiku n’amango ci okunda okufà bwonjo n’okubabalira?
19Kandi oshubirhufa bwonjo, olabarhe amabî gîrhu, ebyâha bîrhu byoshi obikwêbe emuhengere.
20Oyêreke Yakôbo obudahemuka bwâwe, n’Abrahamu omubêre lukogo lulya wacîgashiraga balarha kurhenga mîra#7, 20 Okucungulwa kwa Israheli, kuli kuyûkiriza eciragâne Nnâmahanga ajiraga bône bashakulûza. Eyo ndagâno n’eco ciragâne, co cìsiki ca ngasi bulangâlire, lyo igwârhiro ly’obuyêmêre bw’olubaga lwîshogwa..
Mashi Bible © BUKAVU Archdiocese of Bukavu, 2024.