Mikeyo 4
4
II. Ebi Siyoni alaganyibagwa
Nyamuzinda ayishiyîma e Siyoni
1Amango gayiruka omu nsiku za buzinda, mwâcibone entondo y’akà-Nyamuzinda eri enyanya ly’ezindi elîhe kulusha ezindi ntondo zoshi. Lyo amashanja goshi gâshagamukira emunda eri, 2igulu lyoshi lyayishilibirhirayo linaderhe mpu: «Yishi rhuyinamukire oku ntondo ya Nyakasane, yishi rhujè omu ka-Nyamuzinda ka Yakôbo. Arhuyigîrize enjira zâge, lyo nîrhu rhuyishimba. Bulya e Siyoni yo erhenga irhegeko, n’e Yeruzalemu erhenge akanwa ka Nyakasane»! 3Ayishiyîma ekarhî ka mashanja manji, ânatwîre amashanja madârhi emmanja. Engôrho zâbo bâzitulamwo enfuka, n’amatumu gâbo bâjiramwo emigushu. Ntà lubaga lwâcilengereze olundi engôrho, barhakaciciyigîriza okulwa amatumu#4, 3 1-3: Ebi binwa binashubibonekana muli Iz 2, 2-4. Ensiku za buzinda. Kwo kuderha ensiku z’okuyisha kwa Masiya.. 4Ci ngasi muguma akazitamala aha murhi gwâge gw’omuzâbîbu, n’aha idako ly’omurhi gwâge gw’omuzêti, ntâye wâcibakange. Ntyo kwo akanwa ka Nyamuzinda w’Emirhwe kadesire. 5Bulya embaga zoshi zilambagira ngasi muguma oku izîno lya nyamuzinda wâge, ci rhwêhe rhwâkazilambagira oku izîno lya Nyakasane Nyamuzinda wîrhu w’ensiku n’amango.
Okugaluka kw’obusò bushandabîne aha Siyoni
6Olwo lusiku, kwo Nyakasane adesire, nâshûbûza ebibuzi#4, 6 Nyamuzinda abwîzire Israheli oku ashûbûza olubaga lwâge hano ayûsimuhana. Ashimanyanya abasigîre omu mimo nka kula lungere mwinjà anajira. Lolà muli Eze 34, 1. biyagalisire, nâshimanyanya ebyâhabusire n’ebi nalibuzize. 7Ebikunagizi byo najiramwo omusigala, n’ebikagwa nabijira ishanja liguma lya misî. N’ago mango Nyamuzinda abà mwâmi wâbo oku ntondo ya Siyoni, kurhenga buno kuhika ensiku n’amango. 8Nâwe we munâra gw’obusò, irango lya mwâli wa Siyoni, obukulu bwâwe bwa mîra bwâkushubirakwo, bwo bwâmi bwa mwâli wa Yeruzalemu#4, 8 Omunâra gw’obusò: kwo kuderha Yeruzalemu..
Okurhêrwa, olubungo n’okuyagaluka kwa Siyoni
9Na buno, bicigi birhumire wayâma? K’emwâwe erhacibà mwâmi? K’abahanûzi bâwe bahezire obu wagwârhwa n’emikero nka mukazi walonziburha? 10Ogâyagâyage onayâne wâni mwâli wa Siyoni, aka omukazi waburha, bulya okola warhenga ekà ojihanda erubala; wahika e Babiloni, n’eyo yo wayôkolerwa. Eyo yo Nyakasane akucungulira, akukûle omu nfune z’abashombanyi bâwe. 11Bunôla, mashanja manji gakushimbire caligumiza. Gadwîrhe gaderha mpu: «Mâshi Siyoni azire n’amasù gîrhu gamulole.» 12Cikwône barhamanyiri emihigo ya Nyakasane, barhanamanyiri bwinjà omulâli gwâge, bulya yêne wabashûbûzagya kula bashûbûza emîha y’engano aha yakubirhirwa. 13Yimuka! Ovungunyule emburho mwâli wa Siyoni! Bulya amahembe gâwe nagajira ga cûma#4, 13 Amahembe g’ecûma: kwo kuderha emisî yâwe ya mîra., n’ebisenyi byâwe mbijire bya mulinga, ntyo ovungunyule mbaga nyinji. Omunyago wabarhôla ogurhûle Nyakasane, n’ebirugu byâbo obihe Nyamuzinda w’igulu lyoshi.
Obuhanya n’irenge ly’obûko bwa Daudi
14Shûbûzagya engabo zâwe buno, wâni mwâli wa ntwâli! Barhugosire. Bâshûrha omucîranuzi w’Israheli emikoba omu irhama.
Mashi Bible © BUKAVU Archdiocese of Bukavu, 2024.