Mateyo 20

Abakozi b’ishwa ly’emizâbîbu abarhanzi n’abazinda luhembo luyumânîne

1Obwâmi bw’empingu bushushîne na nnakà wazûkaga mucêracêra mpu aj’ilâlika abamukolera omu lukoma lwâge lw’emizâbîbu. 2Erhi abà amâlagana n’abakozi oku abahà igerha Iiguma oku lusiku, abarhuma omu lukoma lwâge. 3Erhi amashî gakala#20, 3 Erhi amashî gakala: Omu nsâ isharhu. , mpu ahuluka, alangira abandi babwârhîre oku irango buzira mukolo. 4Anacibabwîra, erhi: «Gendi ninyu ekwâni, nayîsh’immuhà oluhembo lummukwânîne». 5Nabo banacigenda. Ashub’ihuluka erhi izûba liyimanga n’erhi izûba liyêrêra#20, 5 izûba liyimanga: Omu nsâ ndarhu; izûba liyêrêra: Omu nsâ mwenda., ashub’ijira nk’oku ajiraga burhanzi. 6Erhi enkafu zirya ebizîzi#20, 6 erhi enkafu zirya ebizîzi: Omu nsâ ikumi na nguma., ashub’ihuluka, ashimâna abandi bayimanzire, abàbwîra, erhi: «Kurhi mwayimangaga omulegerege gwoshi buzira mukolo?» 7Banacimushuza, mpu: «Bulya ntâye warhulalisire». Anacibabwîra, erhi: «Ji ninyu ekwâni». 8Erhi kucibà bijingo, nnakà w’olukoma abwîra omwambali, erhi: «Hamagala abakozi, obahè oluhembo, orhangirire oku bazinda kuhika oku barhanzirhanzi». 9Erhi balya barhondêraga enkafu zirya ebizîzi bayisha, bahâbwa ngasi muguma igerha Iiguma. 10Erhi abarhanzi baciyisha, bamanya mpu bahâbwa kulusha; ci nabo bahâbwa ngasi muguma igerha. 11Obwo bakaz’iliyanka erhi banayîzire banagayire nnakà. 12Bakacîdesa, mpu: «Ewani! abà ba nyuma kasanzi katya kône bakozire, wamanarhuyumanyanya nabo, rhwe rhwalegirîre rhwakoya n’omukolo oku izûba n’idûrhu ly’omûshi». 13Lêro naye erhi ashuza muguma muli bo, amubwîra, erhi: «Yâga mwîra wâni, ntakuzimbiri: ka lirhali igerha liguma rhwalagânanaga? 14Yanka ebyawe, ogende. Nalonza okuhà owinyu wa buzinda nkawe. 15Ka ntankajira ebyâni oku nalonza? Nîsi nkaba isù lyâwe lyo libî bulya ndi mwinjà?» 16Ntyo kwo abazinda bayish’ibà barhanzi, n’abarhanzi babè bazinda.

Yezu abwîra Entumwa obwa kasharhu oku ayish’ibabazibwa

(Mrk 10, 32-34; Luk 18, 31-33)

17Erhi Yezu akola arheremera e Yeruzalemu, arhôla balya ikumi na babiri bône bône, n’erhi bakola bali omu njira, ababwîra, erhi: 18«Rhw’ono rhwarheremera e Yeruzalemu; obwo Mwene-omuntu ahânwa omu maboko g’abajinji n’abashamuka b’ihano: bamutwîra olufù. 19Bayish’imuhà abapagani mpu bamushekere, bamushûrhe emikoba banamubambe oku musalaba; ci olusiku lwa kasharhu ayish’ifûka».

Nnina wa bene Zebedeyo

(Mrk 10, 35-40)

20Okuhandi nnina wa bene Zebedeyo anacimujaho bo n’abagala, amuharâmya, anamusengera akantu. 21Naye anacimubwîra, erhi: «Bici walonza?» Amushuza, erhi: «Abâna bâni abà oku bali babiri; orhegeke babwârhale omu Bwâmi bwâwe, muguma ekulyo kwâwe, owundi ekumosho». 22Yezu anacishuza, aderha, erhi: «Murhamanyiri ebi muhûnyire. Ka mwankahash’inywa omulengo#20, 22 Omulengo kuli kuderha mababale. nayîsh’inywa?» Banacimubwîra, mpu: «Rhwanahasha». 23Anacibà bwîra, erhi: «Omulengo gwâni gwôhe mwâgunywe, ci okubwârhala ekulyo kwâni erhi ekumosho, arhali nie nâmmuhekwo, ci Larha okuhà abà àkurheganyîze».

Abakulu barhegesirwe okubà barhumisi b’abâbo

(Mrk 10, 41-45; Luk 22, 25-27)

24Erhi balya ikumi bayumva okwo, bakunirira balya bâbo babiri. 25Okuhandi Yezu anacibahamagala hôfi naye, ababwîra, erhi: «Muyishi oku emwa abapagani, abâmi banabayêreke obuhashe bwâbo, n’abakulu obukulu bwâbo. 26Ci arhali kwo byâbà ntyo muli mwe; owalonz’ibà mukulu muli mwe, acîjire murhumisi winyu; 27n’owalonz’ibà wa burhanzi muli mwe, acîjire mwambali winyu. 28Nk’oku Mwene-omuntu arhayishaga mpu akolerwe, ci akolere abandi, anahâne obuzîne bwâge mpu lyo acungula banji».

Mihûrha ibiri y’e Yeriko

(Mrk 10, 46-52; Luk 18, 35-43)

29Erhi bacîrhenga e Yeriko, nyamugege w’abantu amukulikira. 30Ho n’aho mihûrha ibiri yali ebwârhîre oku njira, yayumva oku Yezu wagera; yanacihamagala, yaderha, erhi: «Muciza w’abantu, Mwene Daudi, orhubêre obwonjo!» 31Kalya katù k’abantu kanacikaz’iyikalihira mpu ehulike. Lêro yôhe yanaciyâma, yalushisa, yanaderha, mpu: «Muciza w’abantu, Mwene Daudi, orhubêre obwonjo!» 32Obwo Yezu anaciyimanga, abahamagala, anababwîra, erhi: «Bici mwalonza mmujirire». 33Banacimushuza, mpu: «Muciza, nti nîrhu rhubone!» 34Okubundi Yezu anacigwârhwa n’olukogo, abahuma oku masù: ho na halya babona, banamukulikira.

Currently Selected:

Mateyo 20: MKB

Highlight

Copy

Compare