Yoweli 4
4
Cigabi ca 4 omu BHS ciciri ca 3 omu WLC
Olubanja lwa Nnâmahanga oku mashanja
1Muli ezo nsiku, nâshubiza Yûda na Yeruzalemu omu bwôrhere bwâge bwa burhanzi, kwo Nyakasane adesire. 2Nâshûbûza amashanja g’ihanga, ngayandagalize omu lubanda Lwa Yozafati. Ho nagajikiza lubanja kw’ebi gajirire olubaga lwâni lw’Israheli: balushandâzire omu mashanja g’ihanga banagabâna ecihugo câni. 3Abantu bâni babagabânyire, babayesha cigole, abanarha-bâna babahindula mbaraga, n’abâna-nyere bakaz’ibaguza mamvu bananywa. 4Kwâgo kwâgo, mwe bishagala bya Tiri na Sidoni, bici mwandonzakwo? Ninyu mwe bihugo by’Abafilistini, ka mulonzize okucîhôla kuli nie? Mumanyage, mukalonza mpu mwagereza okucîhôla kuli nie, bwo na buno nammushangula amarhwe. 5Mwarhôzire ensaranga zâni n’amasholo gâni, obuhirhi bwâni bwinjinjà bwoshi mwazigulira emwinyu, mwajihira omu ngombe z’abazimu binyu. 6Abasole b’e Yûda n’ab’e Yeruzalemu mwabaguza bujà emw’abantu b’e Yavâni mpu mubayâse ecihugo câbo. 7Lêro nkolaga nâbahamagala eyo munda mwabagulîze, n’obwo buhanya bwoshi nâbudekereza oku irhwe linyu. 8Bagala binyu na bâli binyu nâbaguliza bene Yûda, nabo babagulize Abasabeyi babà omu cihugo c’ekulî bwenêne. Ntyo kwo ndesire niono Nyakasane.
Okuhamagalwa kw’amashanja
9Abantu boshi mubabwîre ntya: Mucìrheganye oku matabâro. Hamagali entwâli, bayishe barhereme. 10Mutule engôrho n’ebyûma binyu, emigushu yinyu mujiremwo amatumu, engonyi ederhe, erhi: «Ndi ntwâli.» 11Bangâduki, nâyisha, mwe bihugo rhubibikînwe, mutwe akacâma hala. (Nnâmahanga, yandagaza entwâli zâwe). 12Mucîmoge, mwe lubaga, muyinamukire omu lubanda lwa Yozafati, bulya mwo nâbwârhala, ntwîre amashanja goshi olubanja. 13Murhemage, mwayêzize, muhûle, munakande, emikenzi, enkuluba, byayunjwîre. 14Musiribulire mula lubanda lw’olubanja, bulya Nnâmahanga aling’itwîra olubanja omu lubanda lw’emihigo.
Olusiku lwa Nyakasane
15Izûba n’omwêzi byabîre budufu, enyenyêzi zazima. 16Nyamuzinda alumbîre e Siyoni, izù lyâge liyumvikîne kurhenga e Yeruzalemu, empingu n’igulu byageramwo omusisi. Ci kwône Nnâmahanga abà lwâkiro lw’olubaga lwâge, mpenzi y’abâna b’Israheli. 17Ho mwâmanyire oku nie Nyakasane Nyamuzinda winyu, ôbà e Siyoni, ntondo yâni ntagatîfu. Yeruzalemu habà hantu hatagatîfu, ebigolo birhakacihalabarha.
Okushub’igaluka kw’obwâmi bw’Israheli
18Muli olwo lusiku entondo zahulula mamvu mahyâhya, n’amarhà oku rhurhondo. Emmanda za Yûda zoshi zahululamwo amîshi. Omu nyumpa ya Nnâmahanga mwarhenga enshôko yanywêsa akabanda ka Akasiya. 19Mîsiri abà cihugo cihehêrere, na Edomu yacîbêra mpinga bwâmwa, bulya abo bantu barhindibuzize bene Yûda, bàbulaziremwo mukò munji gw’abêru-kwêru. 20Ci kwônene Yûda ayûbakamwo ensiku zoshi, na Yeruzalemu agandâze iburha oku lindi. 21Nâcîhôlera omukò gwâbo, ntakalembera amabî, na Nyakasane agandika aha Siyoni.
Mashi Bible © BUKAVU Archdiocese of Bukavu, 2024.