Izaya 4
4
1Olwo lusiku, bakazi nda barhuluba mulume muguma#4, 1 Bakazi nda oku mulume muguma, bulya balume banji bâfà n’ebîrha na banji bajà omu mpamikwa. Bene Israheli babona oku ntâko bankacibona iburha. Hano abwo bakazi babona ntyo, bâlonza mulume muguma akâbakûla enshonyi., bamubwîre, mpu: «Rhwakâlya ebiryo bîrhu rhunayambale emyambalo yîrhu, casinga orhuyêmêrere okuheka izîno lyâwe; orhukûle enshonyi!»
Siyoni alaganyibwa Omucunguzi
2Olwo lusiku, emburho Nyakasane ameza yâbà bukuze n’irenge, n’emyâka yayêra omu cihugo yâbà mulimbo na bulangashane bw’amâhûngà gasigîre omu Israheli. 3Okubundi amâhûngà g’omu Siyoni n’emisigala y’omu Yeruzalemu bâderhwa «batagatîfu», balya boshi bali bandike omu citabu c’obuzîne omu Yeruzalemu. 4Mango Nyakasane âbà amarhenza izinga ly’abâna-nyere b’e Siyoni n’okushuka omukò gwabulagîrwe omu Yeruzalemu n’omûka g’obucîranuzi bwâge n’omûka gw’engulumira y’omuliro gwâge, 5Nyamuzinda ahira oku ntondo ya Siyoni na kuli ngasi boshi bakubugânana ecitù mûshi, n’omugî gwalangashana nka muliro budufu; bulya irenge lya Nyakasane lyâbwîkira byoshi; 6na mûshi endâro yakâjira ecîhôho amango g’akalengerêrè, mwo bânakaz’ikayâkira ecihûsi n’enkuba.
Mashi Bible © BUKAVU Archdiocese of Bukavu, 2024.