Izaya 38
38
Okulwâla n’okufuma kwa Hizkiyahu
1Mw’ago mango, endwâla yanacigwârha Hizkiyahu, alonz’ifà. Omulêbi Yeshayahu, mwene Amotsi, ayish’imubwîra, erhi: «Ntyâla kwo Nyakasane adesire: Rhegûla bwinjà enyumpa yâwe, bulya okola wafà, orhâlamè:» 2Hizkiyahu ahindamukira ebwa nyasi, ashenga Nyakasane. 3Amubwîra, erhi: «Mâshi Nyakasane, kengêra oku embere zâwe nal’inyôsire mwemêzi na wa murhima mwimâna, n’oku nakazâg’ijira ebinja omu masù gâwe». Okuhandi Hizkiyahu anacigwîra avugumula emirenge. 4Lêro akanwa ka Nyakasane kanacirhindakwo Yeshayahu, erhi: 5«Genda, oj’i bwîra Hizkiyahu, mpu: Kwo adesire ntyâla Nyakasane, Nyamuzinda wa sho Daudi: Nayumvîrhe omusengero gwâwe, nabwîne n’emirenge yâwe. Alà oku nkola nayûshûla myâka ikumi n’irhanu oku nsiku z’akalamo kâwe. 6“Nakulîkûza, we n’ecishagala, omu mfune z’omwâmi w’e Asîriya. Nâfungira eci cishagala. 7Alaga ecimanyîso Nyakasane akuhîre c’okukuyêreka oku Nyakasane ajira okwo adesire”: 8“Nkola nashubiza ecizunguzungu nyuma mashonezo ikumi, izûba lyàli lyamâyandagala oku nsâ y’Ahazi. Izûba lyanacishûba mashonezo ikumi oku mashonezo lyàli lyamâyandagala”».
Hizkiyahu avug’omunkwa
9Olwimbo lw’Hizkiyahu, mwâmi w’e Yûda, erhi alwâla anafuma endwâla yâge:
10Nakâg’iderha, nti: Omu kâgarhî k’ensiku z’akalamo kâni, nkolaga nagenda; emyâka ecinsigalîre nkola nayigereza aha muhango gw’ekuzimu!
11Nakâg’iderha, nti: Ntakacibonakwo Nyakasane hanôla igulu ly’abazîne; ntakacisinzakwo oderhwa muntu muli abà boshi babà omu igulu!
12Ecirâlo câni bacinyazire, bàcîkwêba kuli nka cigala ca bangere; obuzîne bwâni nabuhunga nka kula omuhunzi ahunga omwenda, bantwîre nka kula batwa omulendwe oku muzingo. Kurhenga sêzi kuhika budufu mîra wammalîraga!
13Kuhika sêzi erhi kuyâma ndwîrhe nayâma. Nka kula entale enajira, kwo (Nyakasane) adwîrhe akugurha orhuvuha rhwâni rhwoshi. Kurhenga sêzi kuhika budufu erhi mîra wammalîraga.
14Ndwîrhe navigîra nka hiremberembe nîsi erhi muhangâli, ndwîrhe nagûkubira nka ngûkù. Amasù gampwêrîre emalunga mpenesire. Nkola ngombire, Yâgirwa Nyakasane, onfungire!
15Ci kurhigi naderha na bici namubwîra? Yêne wakolaga ebyo byoshi. Nâheka omutula omu murhima gwâni emyâka yoshi y’obuzîne bwâni.
16Abà Nyakasane ali eburhambi, bâbona akalamo; mûka gwâge gulanga ngasi kantu kalimwo obuzîne. Onfumye onanshuhizemwo omûka!
17Alà oku amarhabi gâni gamâhinduka murhûla! We walanzire obuzîne bwâni bulêk’irhogera omu nyênga, erhi ojugucira ebyâha byâni byoshi enyuma z’omugongo gwâwe.
18Bulya âbali omu kuzimu barhakukuza, n’emifù erhayimba irenge lyâwe. Abayandagalira omu nshinda barhacicîkubagira oku ôbà mudarhebana.
19Ocizîne, ocirimwo omûka yeki wankahash’ikukuza, nk’okûla ndwîrhe najira ene. Ababusi bayish’iyigîriza abâna bâbo oku we mudarhebana.
20Yâgirwa wamanciza! Rhukolaga rhwâkâmukuza n’omulya gw’olulanga ensiku zoshi z’obuzîne bwîrhu omu ndâro ya Nyakasane!
21Yeshayahu anaciderha, erhi: «Balêrhe obuntu bw’amalehe gw’omutini, baburhubire oku kafinjo: âfuma!»
22Naye Hizkiyahu aderha, erhi: «Cimanyîso cici namanyirakwo oku nashub’ikarheremera omu ndâro ya Nyakasane?»
Mashi Bible © BUKAVU Archdiocese of Bukavu, 2024.