Izaya 24
24
Obuhane bw’igulu
1Alà oku Nyakasane amâshereza igulu amânalishâba, amâbindamya obusù bwâlyo amânashandabanya abalibâmwo.
2Oku byâbà oku mudâhwa kwo byâbà n’oku lubaga, oku byâbà kuli nnakà kwo byâbà n’oku mujà wâge, oku byâbà oku mugoli kwo byâbà n’oku mujà-kazi wâge, oku byâbà oku waguza kwo byâbà n’oku wagula, oku byâbà oku wahoza kwo byâbà n’oku wacîhoza, oku byâbà oku walîbirwe omwenda, kwo byâbà n’oku wagulîre.
3lgulu lyamâsherera okurhankaderhwa, lyamâhagulwa bwa nkwîra; nêci, Nyakasane odesire akôla kanwa.
4lgulu liri omu mishîbo, lyàbengîre; igulu lyàsherîre, lyàshâbûsire; amalunga nago gabengîre haguma n’igulu.
5Igulu lyahemwîrwe n’amagulu g’abalibâmwo, bulya bavunyire amarhegeko, barhajiraga ebishingânîne, banavuna endagâno y’ensiku n’amango.
6Okwo kwarhuma igulu lihehêrerwa n’obuhane burhogera abalibâmwo; okwo kwarhuma abalibâmwo bahungumuka, n’abasigîre gakola mâhunga gône.
Olwimbo oku cishagala cishûbusire
7Amamvu g’omurhobo gali omu mishîbo, enkoma z’emizâbîbu zaganûsire, n’entwâli z’enshagali zidwîrhe zaniha. 8Obushagaluke bw’abarhimba engoma bwahwîre, olubî lw’abantu bali oku nsiku nkulu lwahirigisire, n’omuhimbo gw’olulanga gwadumire. 9Barhacinywa mamvu nka bayimba, amamvu gakola galulira baluganywa. 10Lukola bijonjolekeza, lulya lugo lulimbira obusha; enyumpa zoshi ziri mpamike, zirhankacihash’ijibwâmwo. 11Abantu bakola bajà balakira amamvu omu njira; enshagali yazimangîne lwoshi; amasîma gahirigisire omu cihugo. 12Nyamanjà wa bigûkà yêne okola osigîre omu lugo; olumvi lwâlo lwajonjolekîne, lukola lubà mulangabulè. 13Nêci, okwâbà omu mashanja ga hano igulu, kwâyîsh’ibà nka kula owajà atwa amashami g’amalehe g’omuzêti, nka kula owajà ahumbûza emizâbîbu bamâyûs’isârûla. 14Ci bôhe badwîrhe bayâkûza n’izù linene, banashamambira irenge lya Nyakasane kurhenga ebuzikiro bw’izûba. 15Badwîrhe bakuza Nyakasane ebushoshôkero bw’izûba, badwîrhe bakuza izîno lya Nyakasane Nyamuzinda w’Israheli oku birhwa by’omu nyanja. 16Kurheng’emunda igulu lihekera, rhwamâyumva bayimba, mpu; «Irenge oku Mushinganyanya!»
Entambala nzinda
Ci niehe nanaciderha, nti: «Lêro namâhera! lêro nieshi oyu! namâjâkwo obuhanya! Abalenzi balenganyize! abalenzi badwîrhe balyâlyanya!» 17Ecôbà, enyenga n’omurhego bidwîrhe byammulinda; mwe mubà en’igulu! 18Owaderhe mpu ayâka ecôbà, arhogere omu nyenga, anagwârhwe n’omurhego. Nêci, emihango y’amîshi g’emalunga yamayîguka, n’ebiriba by’igulu byamâjuguma. 19Igulu lyahahanyusire, lyacîbêrîre bijonjolekeza; igulu lidwîrhe lyadunga, lyanadungadunga. 20lgulu lidwîrhe lyadândabagana nka mulalwè, lidwîrhe lyadundagana nka cifumba. Obubî bwâlyo buligogomize; likola lyahenanguka, lirhakacizûka. 21Mw’olwo lusiku, Nyakasane âhana omurhwe guli omu malunga#24, 21 Omurhwe guli omu malunga enyanya: kwo kuderha nyenyêzi. enyanya, na hano idako abâmi bali en’igulu. 22Bayish’ishûbûzibwa omu mwîna nka bigorogo; bayish’ihêkwa omu mpamikwa, na hano hagera nsiku zirhali nyi, bâhâhwa obuhane bwâbo. 23Omwêzi gwanâtulûle n’izûba enshonyi zilibumbe, bulya Nyakasane Nyamuzinda w’Emirhwe ye wanâyîme oku ntondo ya Siyoni n’aha Yeruzalemu; irenge lyâge lyanalangashanire embere z’abagula bâge.
Mashi Bible © BUKAVU Archdiocese of Bukavu, 2024.