Ezekiyeli 44

Abakaja omu ka-Nyamuzinda: Abaluzi

1Oyo muntu anacimpêka ebwa muhango gw’aka-Nyamuzinda guli embuga, oguyêrekîre olunda lw’ebuzûka-zûba, gwàli guhamisirwe. 2Nyamubâho anacimbwîra, erhi: Olwo lumvi lwâyigulwa, lurhâcihamûlwe, ntâye wâkaz’igerahwo, ebwa kubà Nyamubâho w’Israheli anahagezire; gukaz’iyôrha guli muyîgale. 3Erhi omuluzi ankayisha mpu ajibêra hwo, ebwa kubà ali muluzi#44, 3 Omuluzi arhali ye mwâmi: Nyamuzinda yênene ye mwâmi w’Israheli. Oyo muluzi arhacigwêrhi obuhashe buli nk’obw’omudâhwa., mpu alîre hwo ebiryo by’enterekêro embere za Nyamubâho; oyo muluzi anagerere omu kabadu ka ogwo muhango n’omu kugalukamwo anashubiyisha.

Amarhegeko g’okujà omu ka-Nyamuzinda

4Ashubimpêka ebwa muhango guli olunda lw’emwênè embere z’enyumpa; nanacikazilola, nasinza oku irenge lya Nyamubâho lyamâyunjulira enyumpa; nanacikumba bûbi. 5Nyamubâho anacimbwîra, erhi: «Mwene omuntu, oyigule omurhima gwâwe, ololêreze n’amasù gâwe oyumvîrhize n’amarhwîri gâwe ngasi oku nakanakubwîra kuyêrekîre amarhegeko g’enyumpa ya Nyamubâho na ngasi bindi birhegesirwe kuli yo. Oyigule omurhima gwâwe lyo ohashimanya kurhi kukwânîne okujira omu kujà omu nyumpa, kandi onamanye emîhango yoshi y’omu nyumpa.» 6Ogend’ibwîra abagoma, omulala gwa bene Israheli erhi: Ntyâla kwo adesire Nyakasane Nyamubâho: Amabî ginyu gakola garhalusire, wâni mulala gw’Israheli: 7Munakaziyisha mudwîrhe ebigolo, abarhakembûlagwa murhima na mubiri, mpu bajè omu cirhînyiro câni na ntyo bahemule enyumpa yâni; munakazihâna ebiryo byâni, amashushi n’omukò kulya kwankarhuma endagâno yâni esherezibwa n’amabî ginyu, 8Murhalangaga amarhegeko gayêrekîre emikolo y’oku bintu byâni bitagatîfu, abîre ebigolo byo muyimanza mpu bibè byo bikazikola omu nyumpa yâni ahâli hinyu. 9Ntyâla kwo adesire Nyakasane Nyamubâho, erhi: Ntà cigolo, bwo bali balya bantakembûlwa murhima na mubiri, wankâja omu cirhînyiro câni, ntâye omu bene ebigolo biri emwa bene Israheli.

Amarhegeko g’Abaleviti

10Oku biyêrekîre balya Baleviti banyâkaga galya mango Israheli aciyegulaga kuli nie omu kushimba abazimu, abôla Baleviti bônene banabarhula obubî bwâbo. 11Bakazijà omu cirhînyiro câni, babà barhumisi ba kulanga enyumvi z’enyumpa yâni n’okukazikola omu nyumpa yâni, bwo bakazibâga ahâli h’olubaga, enyama z’enterekêro y’ensirîra n’oku zindi nterekêro, banakaziyôrha bacîrheganyize okurhumikira olubaga. 12Ebwa kubà bajirirhumikira olubaga emwa abazimu, na ntyo bàrhuma omulala gwa bene Israheli goshi guhirima omu câha, okwôla kwarhumire mbangalaza okuboko kuli bo, kwo adesire Nyakasane Nyamubâho, bônene bâbarhula ecâha câbo. 13Barhâkaziyegêre emunda ndi mpu balijira emikolo y’obudâhwa, mpu bâyegera ebintu byâni bitagatîfu ebibêra omu hantu hatagatîfu bwenêne; bônene bahêka ecihemu n’amabî gâbo bajizire. 14Mbahîre emikolo y’okukaz’ikola omu nyumpa yâni oku biyêrekîre enterekêro n’oku yindi mikolo yoshi.

Abadâhwa

15Abadâhwa b'Abaleviti, balya bene Sadoki balanganga amarhegeko g’omu cirhînyiro câni, galya mango bene Israheli baciyegûlaga kuli nie, abôla bwo bakaz’inyêgêra omu kunkolera, bwo banakazija embere zâni bayishirhererekêra enterekêro y’amashushi n’ey’omukò, kwo adesire Nyakasane Nyamubâho. 16Bwo bâkaz’ijà omu cirhînyiro câni, bwo bâkaz’iyêgêra amêza gâni balijira kwo omukolo gwâni, bashimbe amarhegeko gâni. 17Nka bakola bagera omu mihango y’omu bululi bw’omu ndalâlà, bânayambala emishangi y’ecitâni, ntà mwambalo gwa mwôya gwabajakwo amango badwîrhe bajira emikolo y’ebwa mihango y’omu bululi bw’omu ndalâlà n’omu ndalâlà mwonênè. 18Bayambale ensirha z’ecitâni oku irhwe, banayambale n’orhubutura rhw’ecitâni oku magala gâbo, barhayambala akantu kankabalêrhera idûrhu. 19Ci konene nka bakola bajà ebwa bululi buli embuga, ebwa bululi b’embuga bujire emunda olubaga luli, banahogola erya mishangi bàlikolamwo, banayidekereza omu nyumpa y’ecirhînyiro, banayambala yindi yindi mishangi barhahîra bakagend’iyobôla olubaga barhanacihindula emishangi yâbo#44, 19 Abadâhwa bône (nkabaga n’Abaleviti nabo) bwo bakagihuma oku birugu bitagatîfu.. 20Barhahîra hakakungûla emviri zâbo oku irhwe, nîsi erhi okuzileka zalihûka ci banakazizitwâkwo bwinjinjà. 21Ntà mudâhwa wankanywa amamvu amango ajà omu bululi bw’omu ndalâlà. 22Omukuja omu buhya, barhahîra bakayanka omukazi w’omukana erhi omukazi w’eciherula, ci bakaziyanka abânanyere baciri babikira b’omu mulala gwa bene Israheli, banahashiyinjira omukana wali mukà omudâhwa. 23Akaziyigîriza olubaga lwâni ehiri hitagatîfu n’ehirhali hitagatîfu, baluyigîrize ehiri hibî n’ehiri hinjà. 24Amango hali akadali bwo bakazitwa olubanja; balutwe omu kushimba amarhegeko gâni najiraga. Bakazishimba amarhegeko n’engeso zâni omu ngasi nsiku nkulu, banakazilanga ensiku zâni za Sabata. 25Harhabâga ciru n’omuguma wacîhemula omu kuyêgêra omuntu ofîre, barhankacihemula nka arhali kuli îshe, erhi nina w’omuntu, kandi erhi oku mugala, oku mwâli, kuli mwene wâbo, erhi kuli mwâli wâbo orhajira ibà. 26Nk’omudâhwa amâyûsicîyôbôla, banamuganjira nsiku nda, 27n’olusiku ajà omu cirhînyiro, omu bululi bw’omu ndalâlà mpu alikola omu cirhînyiro, anarhangihana enterekêro oku câha, kwo adesire Nyakasane Nyamubâho.

28Alagi âkaba kashambala kâbo: nie nâbà nie kashambala kâbo; murhahîra mukabahà ehi bankayîmamwo omu Israheli, niene nie nâbà byo. 29Bakazilya oku nterekêro y’enkalangè, oku nterekêro y’oku câha, oku nterekêro y’obubî na ngasi kadesirwe ka kuzira kali kâbo. 30Ebiyêzire birhangiriza bya ngasi luhêro, mwankalêrha obwa burhanzi mpu mulibihâna nterekêro, biri bya badâhwa mukazihà abadâhwa nabo oku mula gw’ebi mwashwâga, lyo omugisho gujà omu nyumpa yinyu. 31Ngasi nyama yacihozagya nîsi elîbirwekwo, ebè ya kanyunyi, nîsi erhi yindi yindi nyama, abadâhwa barhahîra bakayirya.

Currently Selected:

Ezekiyeli 44: MKB

Highlight

Compare

Copy