Ezekiyeli 31

Enduluma y’e Libano

1Omu mwâka gwa kal’ikumi na muguma, omu mwêzi gwa kasharhu, omu lusiku lurhanzi lw’omwêzi, akanwa ka Nyamubâho kanacintinda kwo muli ebîra binwa, erhi:

2«Mwene omuntu, obwîre Faraoni mwâmi w’e Mîsiri kuguma n’omwandu gw’abambali, erhi: Bici nankakugerera kwo muli obûla bugale bwâwe? 3Alaga byo: oku muyerêzi#31, 3 muyerêzi gwo baderha omu nfarasè mpu cèdre gw’e Libano ogujira amashami minjinjà, ebyâsi byofôfi n’omurhi gulengerîre, omu bitù mwo irhwêrhwè lyâge lihikira. 4Amîshi garhuma gwakula, omusima gwarhuma gwalîha, enyîshi zakazâgihulula aha burhambi bw’aha gwàli gurhwezirwe n’emibunda yazo yakazihika oku yindi mirhi yali omu mashwa, 5Kwo kwarhumaga gulihûka okwo kulusha eyindi mirhi y’omu mashwa, n’amashami gâgwo galuga, n’amahaji gâgwo galandira bwenêne ebwa obwôla bunji bw’amîshi gakazagija emunda guli. 6Ebinyunyi by’emalunga byoshi byayishikaziyûbaka enyôgo muli gwo, ensimba z’erubala zakaziburhira muli gwo, abantu ba ngasi lubero bakazihumûkira omu cihôho câgo. 7Gwàli mwinjinjà omu buli bwâgo n’omu kulandira kw’amashami gâgwo. Emizî yagwo yakazilandira omu mîshi manene bwenêne. 8Erhayumananaga nagwo emiyerezi y’omu ishwa lya Nyamuzinda, ensindani zirhankagerîrwe oku mashami gâgwo ntà yindi mirhi ya nkalingânîne n’amahaji gâgwo, ntà murhi gw’omu ishwa lya Nyamuzinda gwankagurhalusire bwinjà. 9Naleka gwashabuka bwinjinjà. Gwakaziyâgalana kulusha eyindi mirhi y’omu ishwa lya Nyamuzinda.»

10Ntyâla kwo adesire Nyakasane Nyamubâho: Ebwa kubà gwamâshigalika erhi kulîhûka kwâge kurhuma, ebwa kubà irhwêrhwè lyâge linakazihikira omu bitù, ebwa kubà gukola gukazicîbona erhi okwôla kurhuma, 11naguhanyire omu maboko g’omuluzi w’amashanja nti agujirire nk’oku obubî bwâge bunali, obubî bwâge bwarhumire nâgukaga. 12Abantu b’ihanja bagutwîre bali balya bantu baminya kulusha agandi mashanja goshi, bâgukubira oku ntondo, amashami gâgo garhogera omu rhubanda rhoshi; abanagaka bâgo bavunirwa omu misima yoshi y’omu cihugo, amashanja goshi g’igulu gayâsire ecîhôho câgo, bàgukabulira. 13Oku misigala yago#31, 13 yago arhalikwo «hisegerezo» n’obwo hiri kulî: câgo, gâgo, bâgo, bwâge, lyâge, ebinyunyi by’emalunga binakaziyishikabêra kwo, n’omu banagaka bâgo muli ensimba zoshi z’erubala.

14Lyo harhagibà omurhi gudomererwa gwacîkuza, erhi bulî bwâgo burhuma, gurhaginaheka obulî bwâgo omu nkuba karhî k’ebitù, lyo harhagibà omurhi gwayunjula mîshi na ntyo gubè gwa bucîbone oku yindi mirhi. Bulya yoshi eligunzibwe n’olufù, yâjà ekuzimu omu idaho, yajibêra haguma n’abâna ba abantu balya bayandagalîre ekuzimu. 15Ntya kwo adesire Nyakasane Nyamubâho, erhi: Olusiku gwayandagaliraga e kuzimu narhegeka nti habè okushîba, nabwîkûla ekuzimu, nayimanza enyîshi zâge n’amîshi gâge manjimanji gàyimanzibwe. Nayimanzize Libano erhi gwo gurhuma, kandi gwarhuma emirhi yoshi y’omu lubala yahuha. 16Oku lubî lw’okuhirima kwâgo, amashanja goshi, nâgagezamwo omusisi, erhi nguyandagaliza ekuzimu haguma na balya bayandagalira omu mwîna. Yajire rhûlirizanya eyôla kuzimu. Eyo mirhi y’e Edeni, yo yali bulimbi na bwinjà bw’e Libano, ngasi mirhi yanakazâgidomererwa. 17N’iburha lyâgo lyayûbakaga omu cihôho câgo, omu karhî k’amashanja, nalyo lyàja ekuzimu, emwa abantu bànigagwa n’engôrho.

18Guhi mwâli muyumânîne mweshi nago oku kujà irenge n’oku bulî, omu mirhi yoshi y’omu Edeni? Okwôla wâjikwêbwa, mweshi n’emirhi y’omu Edeni, omu ndalâlà y’idaho, wâgendigwishira ekarhî k’entakembulwa, haguma n’abayisirwe n’engôrho. Lâba Faraoni mwâmi w’e Mîsiri n’omwandu gw’engabo yâge, kwo adesire Nyakasane Nyamubâho.

Currently Selected:

Ezekiyeli 31: MKB

Highlight

Compare

Copy