Ezekiyeli 3

1Anacimbwîra, erhi: «Wâni mwene omuntu, ebyôla bakuyêrekîze obilye! Olye ecôla citabu, onakanye, ogendidôsa enyumpa y’Israheli!» 2Nanacibumbula akanwa, andîsa cirya citabu. 3Anacimbwîra, erhi; «Wâni mwene omuntu, lya, oyîgurhe eci citabu#3, 3 Erhi Yehezekiyeli ayûsilya ecitabu, akanwa kâge kayunjula kanwa ka Nnâmahanga (Rhulole muli Iz 6, 3-7; Yer 1, 19; Maf 10, 8-11). nkuhîre». Nanacilya: omu kanwa canunira nka buci. 4Anacimbwîra, erhi: «Wâni mwene omuntu, okanye, ojè emwa bene Israheli, onabahêkere ebinwa byâni. 5Bulya arhali emwa lubaga lw’iderha lirhayumvîkana nîsi erhi emwa lubaga lwa lulimi ludârhi yo nkurhumire, ci emwa bene Israheli. 6Arhali emwa mbaga mwandu, ez’iderha lirhayumvîkana n’ez’olulimi ludârhi, zirya orhayumva ebi zaderha. Nk’emwâbo nakurhumaga, bali bakuyumva. 7Ci bene Israheli barhalonzizi okukuyumva, bulya barhalonza okunyumva; kulya kubà enyumpa y’Israheli yoshi eri ya cikanyi-cirhagomba n’omurhima muzibu. 8Nêci, alaga oku namàjira obusù bwâwe buzibu nk’obusù bwâbo, n’amalanga gâwe mazibu nk’amalanga gâbo. 9Amalanga gâwe nâgazibuhya nka diyama, yo elusha ibuye okuzibuha. Orhabayôbohaga, orhabarhînyaga, bulya bali iburha lya bagoma». 10Anacimbwîra, erhi: «Wâni mwene omuntu, ebinwa byoshi nkubwîzire, obibîkirire emurhima, onabiyumvîrhize n’amarhwîri gombi». 11Okubundi okanye, ojè emwa abalulize, emwa bene olubaga lwâwe, ogendibadesa. Bakuyumve nîsi erhi babè barhakuyumvîrhi, oj’ibabwîra, erhi: «Ntyâla kwo adesire Nyakasane Nyamubâho!» 12Okubundi Mûka anacinyêhûkana, najà nayumva omu nyuma zâni olubî luli nka cihôgêro, lwajà lwaderha, erhi: «Liganze irenge lya Nyakasane ngasi ahâli n’ah’âbà hoshi!» 13Olwôla lubî lwàli lwa byûbi bya zirya nsimba byayishaga byakubakubira ngasi ciguma ebwa cindi; lwàli lubî lw’erya mizizi yali âha burhambi bwâzo, na lubî lwa cihôgêro. 14Mûka anacinyêhûkana, ampêka. Nagenda erhi nnankunîre n’omurhima guyunjwîre burhè, ci n’erhi okuboko kwa Nyakasane kungwêrhe buzirho. 15Nanacihika aha Tel-Abibu, emwa abalulize, eburhambi bw’olwîshi Kebari, ho bàli bayûbasire; nahandaho nsiku nda ndi nka kadunduguli ekarhî kâbo.

Omulêbi kw’ali nka mulanzi w’olubaga

16Erhi kugera nsiku nda, akanwa ka Nyakasane kantindakwo, erhi: 17«Wâni mwene omuntu, nkujizire mulanzi w’enyumpa ya bene Israheli: mango okayumva oluderho lw’ekanwa kâni, onagend’ibarhonda oku nie nkurhumire. 18Erhi nankabwîra nyankola- maligo, nti: “Kufà wâfà”, nâwe okabula kwakâmurhonda, okabula kwakâderha lyo ohanza oyo nyankola-maligo mpu aleke olugendo lwâge lubî lyo alama, oyôla nyankola-maligo yêhe anafâna obubî bwâge, ci omukò gwâge nakulyûzegwo. 19Ci erhi w’oyo wankarhonda oyo nyankola-maligo, akanabula kugokôla n’okuleka olugendo lwâge lubî, yêhe anafâna obubî bwâge, ci w’oyo wanayôkola obuzîne bwâwe. 20Erhi omushinganyanya akaleka obushinganyanya bwâge, akakola amabî, nanahira omurhego embere zâge: kufà akanafà. Akabà orhàli omurhonzire, afana ecâha câge, n’ebijiro by’obushinganyanya ajizire barhakacibikengêra, ci omukò gwâge nakulyûzegwo. 21Ci erhi wakarhonda omushinganyanya mpu amanye ankajira ecâha, akanalek’ijira ecâha, kulama akanalama, bulya ali arhonzirwe, nâwe, wêne wanaciza obuzîne bwâwe».

I. Embere Yeruzalemu arhêrwe n’ababisha

Yehezekiyeli, iderha lyamugenda

22Ahôla go mango okuboko kwa Nyamubâho kwarhindaga kuli nie, anacimbwîra, erhi: «Yîmuka, okanye ojè ebwa kabanda, najikubwîra». 23Na naciyimuka nanacijà ebwa kabanda, nalola oku irenge lya Nyamubâho lyàli liyimanzire eyôla munda, lyàli liyosire nka lirya irenge nanabonaga hôfi na olwîshi Kebari, nanacikumba bûbi 24Okubundi Mûka wa Nyamubâho anacinjamwo, anyîmanza akaz’indesa. Ambwîra, erhi: «Okanye ogend’iciyîgalira omu mwâwe. 25Wâni mwene omuntu, lolà oku bakola bagend’ikushwêka n’emigozi eryâla orhankahashi cishwêkûla, orhânahash’icîrhenze muli yo#3, 25 Kwanahashikana erhi Yehezekiyeli aderhaga mpu bamuhanikemwo emigozi mpu lyo amanyîsa oku obulêbi bw’okurhonda abantu bukolihwa. Obwo bulêbi bwashubirhondêra enyuma ly’okushâbwa kwa kabirhi na kwa buzinda kwa Yeruzalemu (587).. 26Olulimi lwâwe nalugobekera ebiraka, wâbà kaduma, waleka okukazibarhonda, bulya liri iburha lya bagoma. 27Na, amango nânakudese, nânashub’ikuyîgula akanwa, wanababwîra, erhi: Ntya kwo Nyakasane Nyamubâho adesire: Ngasi yêshi walonza okuyumva, ayumve na ngasi yêshi orhalonza okuyumva, aleke, bulya bacîbêra iburha lya bagoma.»

Currently Selected:

Ezekiyeli 3: MKB

Highlight

Compare

Copy