Ezekiyeli 27

Okushandwa kwa Tiri

1Akanwa ka Nyamubâho kanacintindakwo muli ebîra binwa, erhi: 2Nawe, wâni mwene omuntu oderhe ebinwa by’okulibuka kwa Tiri. 3Obwîre Tiri, lwo lugo luli oku burhambi bw’enyanja, lwo lugo embaga nyinji z’omu bizimba zirhimbûliramwo, erhi: Ntyâla kwo adesire Nyakasane Nyamubâho. Erhi:

Ewani Tiri we wakazagiderha, erhi: ndi nkugè eyinjiha ehimana. 4Obwâmi bwâwe bwàli buhisire omu karhî k’enyanja, n’abakuyûbakaga bakuyinjihya kulusha. 5Bayûbaka amarhambi gâwe n’empaho z’ensindani z’e Seniri. Baya nsire omwerezi gw’e Libano bakujiriramwo omutungo. 6Bakujirira engasi n’emirhi minênênè y’e Bashani. Bakuyûbakira irheme ly’ihembe ly’enjavu lishomeke ekarhî k’emiyerezi y’omu bizimba bw’e Kitimi. 7Omulondo gw’ecitâni c’e Mîsiri guli kwo obushengerêre gwabà gwo mwenda gwâwe wajiramwo olurhalarhala. Emishangi y’akaduku n’eya akalinga y’omu bizimba by’Elisha yo wayûbasiremwo omu ndalâlà y’eyo nyumpa yâwe. 8Abantu b’e Sidoni n’ab’e Arvadi bo bâli bashâna bâwe. N’abagula bâwe, wâni Tiri bo bakazâgikola omu mwâwe. 9Abashamuka b’e Gebali n’abalenga bâyo bâli emwâwe bwo bakazâgiharhûla ebisherîremwo.

Amârho g’omu nyanja goshi kuguma n’abashâna bâgo bakazâgiyisha emwâwe balirhimbûlirayo. 10Abantu b’e Persi, ab’e Ludi n’ab’e Puti, bâli omu ngabo y’abalwî bâwe, bo bakazâgikujîra oku matabâro. Emwâwe yo bakazâgimanika empenzi yâbo n’ensirha yâbo. Bânarhuma wajà irenge. 11Bene Arvadi, n’omurhwe gw’abalwî bâbo bo bakazâgiyinjihya enkûta zâwe omu marhambi banakazilanga orhuhembe rhwâwe. Bakazâgimanika empenzi zâbo oku nkûta zâwe, ntyo bayûshûla bwenêne obwinjà bwâwe. 12Tarsisi akazâgiyishigulira emwâwe, abona adwîrhe ayungukira oku bugale bwâwe. Bakazâg’ikuhà ensaranga, ecûma, akasiteriti (kasigiriti), nâwe wanabaha ebirugu bali gula. 13Yavani, Tubali na Mesheki, bakazagiyishirhimbûlira emwâwe. Bakazâgiguza abantu n’ebirugu byâbo by’omulinga nâwe wanabaha oku biryo byâwe. 14Abantu b’e Beti-Togarma bakazâgikulerhera enfarasi, n’enfarasi zâbo z’okuja oku matabâro kuguma n’endogomi. 15Bene Dedani bakazâgiyishirhimbulira emwâwe; bantu banji b’oku burhambi bw’enyanja bakazâgiyishigulira emwâwe; bakazikujuha amahembe g’enjavu n’embaho nyirubala. 16Edomu akazâgiyishigulira emwâwe erhi bunji bwa bintu byâwe burhuma: akazâgikujuha ezumaridi, emishangi y’akaduku, ey’obushengerêre n’eyindi eri nka citâni cinjinja n’amarajani n’eakiki, byo bakazâgikujuha oku bintu bagulaga emwâwe. 17Ciru na Yûda boshi n’Israheli bakazâgiyishigulira emwâwe: bakazikulerhera engano y’e Miniti, obulo, obûci, amavurha n’enshangi. 18Damasi akazâgiyishirhibûlira emwâwe erhi bunji bwa birugu byâwe burhuma n’obwo obugale bwâwe bwakazîgikulerhera idivayi ly’e Helboni n’amôya g’ebibuzi by’e Sethari. 19Dani na Yavani, kurhenga e Uzali, bakazâgikulerhera ebyûma bitule, orhubati rhw’ecûma n’amasheke byo bakazâgijuha oku birugu byâwe. 20Dedani ayishigikazirhimbûlira emwâwe, akazikulerhera amalangeti g’enfarasi. 21Arabiya n’abarhwâli b’e Kedari boshi bakazâgiyishigulira e mwâwe, bakazijuha abâna-buzi, engandabuzi, n’ebihebe. 22Abarhimbûzi b’e Seba n’ab’e Rama bakazâgiyishigulira emwâwe: bakakulerhera obukù bw’e ngulo ndârhi, amabuye g’engulo ndârhi n’amasholo byo bakazâgikujuha oku birugu byâwe. 23Harani, Kane na Edeni, abarhimbûzi b’c Seba, ab’e Asûru n’ab’e Kilmadi bayishigikazigulira emwâwe. 24Bakazikulerhera emishangi minji y’obugale, ebishûli by’akaduku n’eby’obushengerêre, n’emishangi y’amabara, emigozi mizibu-zibu byo bakazâgikujuha oku birugu byâwe. 25Amârho g’e Tarsisi gakazagiyishira oburhunzi bwâwe. Kuziga wali mugale na wakuja irenge omwo karhî k’enyanja.

26Abashâna bakuhêka emuhengere. Empûsi y’ebuzûka-zûba yakuvunira emuhengere gw’enyanja. 27Obugale bwâwe, eby’oburhimbûzi byâwe, omuhako gwâwe, abûbasi bwâwe, abarhunzi bâwe, abalwî bâwe ojawahêka, n’omwandu gw’engabo eri omu ndalâlà yâwe boshi balohoma omu karhî k’enyanja olusiku wâzika. 28Hano biyumva olubî lw’abashâna bâwe, ebikunguzo byoshi byânageremwo n’omusisi. 29Oku bundi ngasi bavugama boshi banarhenga omu mârho gâbo, abashâna, abantu boshi balegerera omu nyanja banajibêra okw’idaho lyûmu. 30Bâlaka banalakûle erhi we orhumire. Bâcîkwêba omutulo omu irhwe, bâcivuluvunza omu luvù. 31Bâcîmomogola irhwe erhi we orhumire, bânayambale sunzu. Bâkulakira bavugumule emirenge minene. 32Bâkaziderha kuli we hano bakola bali omu mishîbo yâwe, bakola bakulakira banaderha, mpu: «Ndi wali aka Tiri w’obucîbone omu karhî k’enyanja? 33Erhi wahakûlaga eby’oburhimbûzi bwâwe, ly’oyigusa embaga zoshi n’obugale bwâwe, n’ebiryo byâwe mwandu, wakazagigaza abâmi b’igulu. 34Lêro w’oyu wavunisire n’emibungè y’amîshi omu karhî k’enyanja. Omuhako gwâwe n’engabo yâwe mwêshi mwamalohoma. 35Abantu bayûbaka omu bizimba by’ekulî bàgeziremwo omusisi erhi we orhuma. Abâmi bâbo bamârhangâla, obusù bwâbo bwamâzinzibala. 36Abarhimbûzi b’embaga bamâheba olushungurho kuli we, bulya wamârhuma bâgeramwo omusisi n’okuherêrekera kwâwe Joshi.»

Currently Selected:

Ezekiyeli 27: MKB

Highlight

Compare

Copy