Lubungo 35
35
Olwa Sabato luli lukulu lwa kurhamûka
1Mûsa anacihamagala olubaga lwoshi lwa Bene Israheli, ababwîra, erhi: «Alagi ebinwa Nyakasane arhegesire okujira: 2Mukazijira emikolo nsiku ndarhu, ci olusiku lwa kali nda, lubè kuli mwe, lusiku lutagatîfu, luzira lwa Nyakasane lwa kurhamûka. Ngasi wahume akabishi mw’olwo lusiku anayirhwe. 3Ngasi hoshi mwânabè muli, murhayâsagya ciru n’omuliro olusiku lwa Sabato.»
Bene Israheli balêrha entûlo yâbo
4Mûsa anacibwîra olubaga lwa Bene Israheli lwoshi, erhi: «“Yumvagi oku Nyakasane adesire”: 5“oku birugu binyu, murhôlekwo ebi mwasholôlera Nyakasane. Ngasi muntu yêshi w’omurhima muhânyi asholôlere Nyakasane amasholo, amarhale, emiringa”; 6“akaduku k’omukara, akaduku k’akalinga, akalinga-kéru, ecitàni ciniole, amôya g’empene”, 7“empù z’enganda-buzi zirimwo ebitàke by’akaduku, empù z’ebigoho, emirhi y’akasiya”, 8“amavurha g’akamole, omugavu gw’amavurha g’okucîshîga, obukù bw’okuyôca”, 9“amabuye ga onikisi n’amabuye g’okujà omu efodi n’omu mwambalo gw’oku cifuba”. 10“Ngasi balenga ba muli mwe bayîshe barhangire ngasi byoshi Nyakasane arhegesire”: 11“Endâro, ecihando câyo n’oburhungiri bwâyo, amîno gâyo, empaho zâyo, emirhamba yayo, emitûngo y’amarhwèrhwè yayo”, 12“omucîmba n’emirhamba yago, omufûniko n’omwenda gw’okugufûnika n’okugubwîkira”; 13“ameza n’emirbamba yagwo, orhulugu rhwâgo rhwoshi n’omugati gw’enterekêro”; 14“ecinâra c’akamole n’orhulugu rhwâco rhwoshi, orhumole rhwâco n’amavurha g’okumoleka”, 15“oluhêrero lw’enshangi n’emirhamba yalwo, amavurha gw’okucîshîga n’omugavu gw’enshangi, emyenda y’ebirhebo by’aha muhango gw’endâro”, 16“oluhêrero lw’embâgwa n’olugurhu lwâlwo lw’omulinga, emirhamba yalwo n’orhulugu rhwoshi, omukenzi n’amakondo gâgwo”, 17“emyenda y’emihango y’omu côgo n’emitûngo yayo, amarhwèrhwè gâyo n’omwenda gw’olumvi lw’oku côgo”, 18“enkîngi z’Endâro n’ecôgo câyo n’emigozi yayo”; 19“emyenda y’obugashânize y’okuyambala omu hatagatîfu, emyenda mitagatîfu y’omudâhwa Aroni n’emyenda abagala bakaziyambala omu mukolo gw’obudâhwa”».
20Erhi olubaga lwoshi lwa Bene Israheli lurhenga hali Mûsa, 21ngasi boshi b’omurhima mwinjà bàyisha na ngasi bàgwêrhe obulonza bw’okuhâna bakazilêrha entûlo ya Nyakasane y’okuyûbaka Ecihando c’Ihano, okujira ngasi mikolo yamwo n’emyambalo mitagatîfu. 22Abalume n’abakazi bavangula. Ngasi ba murhima muhânyi balêrha orhugondo rhwâbo rhw’omu marhwiri, engondo, emiringa, orhulugu rhunji rhw’amasholo, rhulya bànalilonzize okurhûla Nyakasane. 23Ngasi bàli bagwêrhe akaduku k’omukara, akaduku k’akalinga, akalinga kêru, ecitâni ciniole, amôya g’empene, empù z’enganda-buzi zirimwo ebitâke by’akaduku n’empù z’ebigoho, bakazibilêrha. 24Abakâgisholola entûlo z’amarhale, n’ez’emiringa, bakàbilerhera Nyakasane ntûlo. Ngasi bàgwêrhe emirhi y’akasiya yankakwanana kw’eyo mikolo, bakâyilêrha. 25Ngasi bakazi balenga, bakazihûnga emigozi, ey’akaduku k’omukara k’akalinga, n’ey’akalinga kêru n’ey’ecitâni ciniole, bàkazibijira n’amaboko gâbo bônene banabilêrha. 26Abakazi balenga bàkâluka amôya g’empene. 27Abagula b’olubaga bakazilêrha amabuye ga onikisi n’amabuye gw’okutâka efodi n’enshoho y’oku cifuba, 28migavu n’amavurha g’akamole gw’okushiga n’enshangi. 29Bene-Israheli boshi, abalume n’abakazi, ngasi ba murhima muhânyi, bâkazilêrha buzira kusêzibwa ebyâli bikwânîne oku mikolo yoshi Nyakasane ali rhegesire Mûsa okujira.
Abakozi b’omu ka-Nyamuzinda
30Mûsa anacibwîra Bene Israheli, erhi: «Loli! Besaleli mwene Uri, mwene Huru w’omu bûko bwa Yûda, Nyakasane amuhamagîre omu izîno lyâge. 31“Amuyunjuzize omûka gwa Nyakasane, omûka gw’oburhimanya, obumanye n’obulenga omu mikolo ya ngasi lubero”, 32“mpu akageranya ngasi mukolo, ahashe okukazikola amasholo, amarhale n’emiringa”; 33“ahashe okukâgôya amabuye g’okubambira, okubinjûla emirhi n’okujira ngasi mikolo yoshi y’obulenga”. 34“Anahizire omu murhima gwâge n’omu gwa Oholiyabu mwene Ahisamaki, w’omu bûko bwa Dani, engalo y’okuyigîriza”. 35“Abayunjuzize oburhimanya bw’okujira ngasi mikolo y’okugôya, okutâka n’okuluka emyênda y’akaduku k’omukara, ey’akaduku k’akalinga, ey’akaduku kêru n’ecitâni ciniole, n’oburhimanya bw’okuhunga: abahîre obulenga bw’okujira emikolo ya ngasi lubero n’obukengêre bw’okuyigeranya.”»
Mashi Bible © BUKAVU Archdiocese of Bukavu, 2024.