Muhanûzi 7
7
Ecigabi ca kabiri
Enshokolezi
1Izîno lyo likulu oku mavurha g’engulo ndârhi; n’olusiku lw’okufà lwo lukulu aha lusiku lw’okuburhwa. 2Aha omuntu ankajà aha balya, ankajà aha balaka, bulya bwo buzinda bwa ngasi muntu, n’omuntu naye anakengêre okwo. 3Aha omuntu ankasheka ankabà burhè, n’obukali bw’ebusù buyinjiha. 4Omurhimanya anakazigerêreza oguli ebufîre n’omusirhe yêhe akengêrage ahâli amasîma. 5Aha omuntu ankayumvîrhiza olwimbo lw’omusirhe, ankayumvîrhiza ihano ly’omurhimanya. 6Bulyâla olwimbo lw’omusirhe kwo lujira olubî nka nshâli za mishûgi îdako ly’enyungu; kuli kurhebwa. 7N’amasheka ganahwinjagaze omurhimanya, n’amasîma ganahûse omurhima.
Obuhane
8Aha wankabà aha barhondêra akantu wankabà aha kâshwinjwa, omurhima gw’okulinda, gwo mukulu aha bwihâmbi. 9Orhahîra okacîdîrhibula duba-duba, bulyâla murhima gwa musirhe gubà mwo entanya. 10Orhaderhaga erhi: cici cirhumire ensiku zàli burhanzi zilusha eziri buno? Kulya kubà eryôla idôso lirhali lya burhimanya. 11Oburhimanya kwo buyinjiha nka kashambala, abâli hanôla igulu bwo bukwânana. 12Bulyâla olwâkiro lw’oburhimanya lwo na lwâkiro lw’ensaranga, n’obunguke bw’obumanye kunali kulya oburhimanya buciza nnabo. 13Orhangilola omukolo gwa Nyamuzinda: ndî wankagondôla ehi agondesire? 14Olusiku lw’obusîme, onashagaluke; n’olusiku lw’obuhanya, olole kwône: Nyamuzinda wabijiraga byombi, mpu ly’omuntu alekîbona akantu enyuma zâge yêne#7, 14 Nk’oku biyôsire oku buzindazinda bw’ebindi bigabi (3, 11.22; 6, 12; 8, 7; 9, 12; 10, 14; 11, 5), omuhanûzi akengêzize kulusha oku omuntu arhankamanya ebyayisha, arhankanahashicîbwîra yêne ehi Nyamuzinda alongîze igulu. Ntyo oku omuntu akajira, kuli kuyêmêra ebi Nyamuzinda alemire nka kulya yêne alonzagya mpu biyôrhe.. 15Omu buzîne bwâni bw’omurhebwa, bàbwîne omushinganyanya afà omu bushinganyanya bwâge, n’enkola-maligo yasigala omu maligo gâyo. 16Orhabâga mushinganyanya okurhalusire olugero, orhacijiraga murhimanya omu masù g’abandi; cici carhuma wacîlibuza? 17Orhahîraga okabîha okurhalusire olugero, omanye wankanasiraha; carhuma wafà embere amango gâwe gahike. 18Kukwânîne omuntu asêze ehi buzira kuleka hira, bulyâla okenga Nyamuzinda, anabihikekwo byombi. 19Oburhimanya bunahè omurhimanya emisî elushire eya barhambo ikumi omu lugo luguma. 20Hanôla igulu harhali omuntu mushinganyanya olya wankakola aminjà buzira kulogorha ciru n’eriguma. 21Obwo kwo biri ntyo, orhahîraga okâyumvirhiza emyanzi minji-minji, wa nkanayumva baderha oku mwambali wâwe akuderhaga buligo. 22Nâwe wêne omurhima gwâwe gurhahabiri kanga wamâderha abandi kubî! 23Ebyo byoshi nabigeziremwo n’oburhimanya, namanya nti nnandi murhimanya, ci kwône bindushire bulî. 24Akantu kali kandushire bulî, kali emwîna kuli kuli, ndi wankakahika-kwo? 25Nashubijà aho nacîhangâna nti nongereze oburhimanya haguma n’oluhembo; nti manye oku obubî linali isirhe, n’oku okuhwinjagala kunali kuhaba. 26Ka ntabugâna ebirhalusire olufù bululu: omukazi wa! bulyâla omukazi gubà murhego, n’omurhima gwâge kabà keshe, n’amaboko gâge bubà budagulè: orhînya Nyamuzinda ye fuma abakazi, ci enkola-maligo erhafuma. 27Alaga ebi, mbwîne, Koheleti okudesire, erhi nankabihira haguma byoshi. 28Ishiriza, nalonzize nalonza, ci ntarhôlaga. Mulume muguma omu cihu mbî, nêci mmubwîne, mukazi muguma muli boshi ntamubwîni. 29Alaga kwône ebi mbwîne obwo: Nyamuzinda ajizire omuntu mwîrhohye, naye yêne ye dwîrhage alonza okuhalûla ebihazire!
Mashi Bible © BUKAVU Archdiocese of Bukavu, 2024.