Daniyeli 7

VII. Ebilôrho bya Daniyeli: ensimba ini

Ebyagâne bya Daniyeli

1Omu mwâka gwa burhanzi gwa okuyîma kwa Baltazari, mwâmi w’e Babiloni, Daniyeli anacijakwo ecilôrho n’okuyaganwa omu bukengêre bwâge erhi ali aha ncingo#7, 1 Olole Maf 13, 1-18.. Oku bundi anaciyandika ecôla cilôrho. Oku byabîre k’oku: 2Daniyeli anacijà omu kanwa aderha erhi: Nakazâgilola erhi mbonekerwa budufu, nalola oku empûsi inni z’oku nkuba zanacizûsa emilaba omu nyanja nênênè. 3Nsimba inni zanacirhenga omwôla nyanja, ntà nguma yali eshushire eyâbo.

4Entanzi yali eshushire entale erhi enagwêrhe ebyûbi biri nka bya nyunda. Nanacibona kandi yakûlwa ebyûbi, yanaciyîmanzibwa oku idaho, yayîmangira oku magulu nka muntu, yahâbwa n’omurhima guli nka gwa muntu.

5Eyindi nsimba yanaciyisha, yali eshushire cihazi, yali eyimangire lunda luguma, yanali egwêrhe mirhibadu isharhu omu kanwa k’amîno, banaciyibwîra mpu: Yimanga ofôrhe nyama nyinji!

6Enyuma z’aho nashubikazilola nanacibona ensimba ya kasharhu, yali eshushire engwi n’oku mugongo gwâyo kwàli byûbi binni biri nka bya kanyunyi, n’eyôla simba yali egwêrhe marhwe anni, banaciyiha ohwâmi. 7Na buzinda bw’ahôla oku ndwîrhe nalolêreza muli okwôla kubonekerwa budufu, alà oku ensimba ya kani yanaciyisha, nsimba nkali, nsimba ya kuyôbohya na nzibu nzibu bwenêne, yali egwêrhe amîno manene gali nka ga cûma, yanazifonfomera n’okurhôla bihimbi bihimbi n’ebisigîre yanabihonyogola n’amagulu. Yali eshushire kwâyo kwâyo muli ezôla zâbo nsimba z’embere, yanali egwêrhe mahembe ikumi. 8Oku ndwîrhage nalolêreza agôla mahembe, nanacibona erindi ihembe lisungunu kulusha agâbo, lyamera ekarhî kâgwo, na mahembe asharhu muli agôla ga burhanzi gwakûlwa n’eryôla ihembe; nalola oku ery’ihembe lyàli ligwêrhe amasù gali nka ga muntu n’akanwa kakazâg’iderha bintu binji binji.

Okubonekerwa n’Omushosi na Mwene omuntu

9Nanakulikiza okulola, banaciyisha badwîrhe entebe bazihira ahôla, Omushosi#7, 9 Omushosi: liri izîno lya kulonza okuderha Nyamuzinda. Barhôzire olwo lwìganyo bulya yêne ye Nyamubâho, na ye wânayôrhe ensiku n’amango. anaciyisha atamala. Omwambalo gwâge gwàli mwêru nka lubula n’emviri z’oku irhwe lyâge zàli zishushire amwôya g’ecibuzi gashushire bwinjinjà. Entebe yâge yakazirhengamwo engulumira z’omuliro, yanali nyinyi egwêrhe emizizi edukumbusire n’omuliro. 10Olwîshi lunene lw’omuliro lwakazihulula embere zâge. Ebihumbi by’ebihumbi by’abantu byakazimukolera, n’abandi mwandu bali bayimanzire embere zâge. Okutwa olubanja kwarhangira n’ebitahu byabùngûlwa#7, 10 Ebyo hitahu hyo byàli hiyandisirwemwo ebijiro by’abantu, kwo kuderha aminjà n’amabî g’abantu (Lul 56, 9; Mal 3, 16; Eze 13, 9; Maf 3, 5; 20, 12).. 11Nakazilolêreza, olubî lw’ebinwa binjibinji byakazâgiderhwa na lirya ihembe, oku nandwîrhe nalolêreza nabona erya nsimba yayîrhwa, omubiri gwâyo bagusharhulasharhula banagukwêba omu muliro. 12Ezindi nsimba bazinyaga oburhegesi, ci kwônene bazitwîra amango g’okulama na kandi kasanzi kasungunu. 13Nanacikulikiza okulolêreza ebyôla byabonekaga budufu, nalola oku enyanya ly’ecitù c’emalunga yarhenga oli nka mwene omuntu ajà emunda olya mushosi ali, banacimuyêgeza embere zâge#7, 13 Mwene omuntu: Kwo kuderha oku oyo abonaga aligwêrhe enshusho y’omuntu. (Erhi rhwankalola omu citabu ca Ezekiyeli, rhwanabona oku kanjikanji omulêbi anahamagalwe omu izîno lya «mwene omuntu» Eze 2, 3; 3, 1.3.4.10.17…). Omu kushimba ebilôrho bya Daniyeli oyo w’enyanya bwenêne, anabà ye lulya lubaga lw’abatagatîfu (Dan 7, 14.27). Buzinda na buzinda, olwo luderho «mwene omuntu» lwâbà erhi ludesire omucunguzi (Mat 8, 20). Na ntyo Yezu alukolêsize omu kulonza okucîderha yêne.. 14Banacimuhà amâmi, amahashe, irenge n’oburhegesi, amashanja goshi n’ebihugo byoshi, n’abantu b’endimi zoshi bakazimurhumikira. Obwâmi bwâge bwabà bw’ensiku n’amango, bwâmi burhakayûrha, bwâmi burhakakûlwa ciru n’amango maguma.

Daniyeli ahugûla ehi anabonaga

15Oku binyêrekîre niono Daniyeli, ebyôla nabonekeragwa nabyo omu bukengêre bw’irhwe lyâni byanyôbohya. 16Nanacijà hali muguma muli balya bayîmanzire embere nanacimudôsa kurhi kw’okuli ebyôla byalonz’imanyîsa, andesa anakazimpugûlira ebyôla byoshi. 17«Ezôla nsimba nnênênè oku ziri inni, bali bâmi bâni banayishe hano igulu; 18ci kwônene abatagatîfu b’Ow’Enyanya bwenêne, bo hanahâbwe obwâmi banabuyôrhane ensiku n’amango, n’amango g’amango.» 19Nashubilonza okumanya ebiyêrekîre erya nsimba kandi erhal’ishushîne n’ezâbo zoshi n’eyali nkali okulushire, eyàli egwêrhe amîno g’ecûma n’enyûnu z’omulinga, eyakazâg’ilya eyakazâg’ishanshanyula byoshi n’okuhonyogola ebisigîre. 20Oku biyêrekîre galya mahembe ikumi g’oku irhwe lyâge n’oku biyêrekîre lirya ihembe lyameraga lyarhuma gandi asharhu garhenga, eryo ihembe lyàli ligwêrhe amasù n’akanwa kakazâg’iderha ebintu binjibinji n’eryaliliyôsire nka lyo linene kulusha agandi. 21Nakazâg’ilolêreza nabona eryo ihembe lyatula entambala oku Batagatîfu, yanabahima, 22kuhika olya mushosi alinda ayisha, aha abatagatîfu obushinganyanya bw’Ow’Enyanya n’amango galinda gahika aga abatagatîfu bahâbagwamwo obwâmi. 23Anaciderha erhi: erya nsimba ya kani, buli bwâmi bwa kani bwayisha hano igulu, burhali nk’agandi mârni goshi, bwâyish’iyûsa agandi mârni, bwâyish’iyûsa igulu lyoshi, bulihonyogole, bunalijire katulo. 24Oku biyêrekîre ago mahembe ikumi: muli obwôla bwâmi, mwârhenga bâmi ikumi, owundi âyishiyisha enyuma zâbo, ârhayish’ishushane n’abarhanzi âyish’ihima basharhu muli abôla bâmi. 25Ayishiderha ebinwa by’obucîbone kuli Ow’Enyanya bwenêne. Ajà âyîrha abatagatîfu b’Ow’Enyanya bwenêne, âcîshomya ciru n’okuhindula amango matagatîfu, okuhindula obuyêmêre, oku ngoma yâge abatagatîfu balibuzibwa mango garhali manyi, kugere n’agandi mango, n’agandi mango masungunu#7, 25 Mwâmi Antiyokusi arhegeka Abayahudi mpu bashimbe idini n’akalamo k’Abagereki., 26Enyuma z’ahôla hanayishiba okutwa olubanja, banamunyaga obwâmi, bamunigûze banamuherêrekeze loshi. 27Obwâmi, obuhashe n’amarhegesi goshi ganayishihâbwa olubaga lw’abatagatîfu b’Ow’Enyanya bwenêne; obwôla bwâmi bwâbà bw’ensiku n’amango n’agandi mârni goshi gâbushiga ganaburhumikire. 28Kwo byàbîre ntyo. Kuli nie Daniyeli obukengêre bwanzunguluka, nabula omurhûla, ci nakazilanga ebyôla omu murhima gwâni.

Currently Selected:

Daniyeli 7: MKB

Highlight

Compare

Copy