Amosi 5
5
Olwimbo lw’okulakira Israheli
1Muyumve eci cinwa ndesire kuli mwe, ca kulaka, wâni nyumpa ya Israheli: 2Ahirimire. arhanacizûke, mwâli w’Israheli! Atulamire oku idaho lyâge lyo na nênè, ntâye wamuzûsa. 3Bulya ntya kwo Nyakasane Nyamuzinda abwîzire enyumpa y’Israheli: Olugo lwakazagiheka bantu cihumbi oku matabâro, likola igana lyône lwâyôrhana, n’olwakazagiheka igana, likola lyabà ikumi lyône.
Buzira bucîyûnjuze, ntà bucire.
4Ntya kwo Nyakasane abwîzire enyuma y’Israheli: «Munnongereze, kandi mwalama#5, 4 Okulongereza Nyakasane: Kuli kumanya n’okujira obulonza bwa Nnâmahanga.. 5“Muleke Beteli, murhajâga e Gilgali murhagerega e Bersaba, bulya Gilgali àhêkwa bujà na Beteli ashandâla”. 6“Mulonze Nyakasane kandi, mwâlama. Akabà nanga, âcîhunika nka muliro oku nyumpa ya Yozefu, âyisingânola, na ntâye wâyizimiza e Beteli”. 7“Buhanya bwinyu, mwe mulenganya olubanja, mwe mukabulira obushinganyanya oku idaho”».
Obukuze
8Ye wajiraga eby’emalunga na Oriyona, ye hindula omwizimya mucêracêra n’omûshi budufu ziriri. Ye hamagala amîshi g’enyanja agashêshe oku idaho lyûmu. Izîno lyâge Ye Nyakasane. 9Ye shâba enyûbake bwinjà, ye kundula olugo luzibuzibu.
Ennongwè
10Mwe mushomba omucîranuzi mwinjà aha kagombe, mwe murhabona oku muntu oderha buzira bulyâlya. 11Akabà ntyo, bulya munatûntume omuzamba, munamuvurhise emburho y’aha kwâge, ezi nyumpa nyinjinjà z’amabuye mwayûbasire, murhâcizibêramwo, olu lukoma lunagirîre, mwarhwezire, murhanywe oku mamvu gâlwo. 12Bulya mmanyire oku amabî ginyu gàli manji, n’ebyâha binyu biri binene. Mwe mulibuza omushinganyanya, mwe mujà mwanyaga, mwe mukumîra omukenyi oku lumvi. 13Co cirhumire omuntu mwîrhonzi acîhulikire mwa gano mango, bulya gali mango ga buhanya.
Mubè n’omurhima nkana.
14Mulonze aminjà, muleke amabî, lyo mulama, na ntyo Nyakasane Nyamuzinda w’Emirhwe âbà haguma ninyu, kulya munaderha. 15Mushombe amabî, musîme aminjà, mutwe emmanja kwinjà ekagombe; kwakanaba Nyakasane, Nyamuzinda w’Emirhwe, acibabalira Kasigwa wa Yozefu.
Obuhane buli hôfi.
16Co cirhumire Nyamuzinda adesire ntya, Nyakasane, Nyamuzinda w’Emirhwe, erhi: «Endûlù yâbà ngasi hantu, bâderha omu ngasi njira, mpu: Yooh, Yooh!. Bâhamagala omuhinzi oku mishîbo, n’abalasi oku ndûlù. 17Bâlaka omu nkoma zoshi, bulya nkola nagera ekarhî kâwe», kwo Nyakasane adesire ntyo.
Olusiku lwa Nyakasane
18Buhanya bwâbo abadwîrhe bacîfinja olusiku lwa Nyamuzinda: Lwâbà luci kuli mwe olusiku lwa Nyamuzinda? Gwâbà mwizimya, ci arhali mwîkala. 19Lebè aderha mpu ayâka entale, agwe oku ngoromora: aderha mpu ajè omu mwâge, agwârhirize oku cirhebo, igù limulume! 20K’olusiku lwa Nyakasane gurhabè mwizimya ci arhali mwîkala? Gwâbà mwizimya ziriri.
Obukuze bw’embuga buli bwa busha.
21«Nshomba ensiku nkulu zinyu, ntazibonakwo, ntà musengero njira oku nsiku nkulu zinyu. 22“N’oli enterekêro zinyu munderhera ntazibonakwo, ntalonza entûlo zinyu, ciru ntakalola oku nterekêro zinyu z’ebimasha bishushagîre”. 23“Ntenzâkwo olubî lw’enyimbo zâwe, ntalonza okuyumva ennanga zâwe!” 24“Ci okutwa emmanja kwinjà kuhulule nka mîshi, n’obushinganyanya nka kîshi karhagana”. 25“Enterekêro n’entûlo, ka mwazimpire omu irungu mw’erya myâka makumi anni yoshi, wâni nyumpa y’Israheli”. 26“Muhêke Sikuto, mwâmi winyu, na Kevani, nyamuzinda winyu, bo bazimu mwacijìrîre”. 27“Bulya nkola nammululiza kurhaluka e Damasi, kwo Nyakasane Nyamuzinda w’Emirhwe adesire”».
Mashi Bible © BUKAVU Archdiocese of Bukavu, 2024.