1 Batesalonika 4

Amahano: obutagatîfu n’obuzigire

1Nêci bene wîrhu, rhummuhûnyire rhunammuyinginzire muli Nyakasane Yezu nti mushimbe erya njira rhwammuyigîrizaya, erya njira emmuyêreka kurhi mukwânîne okuyôrha lyo musimîsa Nnâmahanga. Câbà kwo munakola muyôsire ntyo. Muhirage njira, mujè embere. 2Mumanyire bwinjà marhegeko maci rhwammuhîre oku izîno lya Nyakasane Yezu. 3Obulonza bwa Nnâmahanga b’obu: muhinduke batagatîfu; muleke eby’enshonyi; 4ngasi muguma muli mwe amany’ilanga omubiri gwâge omu butagatîfu n’omu bukenge, 5arhacicîrîkiriraga omu kuhêkwa n’amîru mabî ak’abapagani barhishi Nyamuzinda. 6Muli okwo harhajiraga owasârhaza mwene wâbo erhi okumujira buligo; bulya Nyakasane anacîhôle kw’ebyo byoshi, nka kulya rhwammubwiragakwo rhwanakuhamîriza 7Birhali bya nshonyi Nyamuzinda arhuhamagaliraga, ci butagatîfu. 8Na ntyo owagayaguza ago marhegeko, erhi arhali muntu agayaguzize, ci Nyamuzinda yêne, owammushobôzagya Omûka gwâge Mutagatîfu.

9Oku biyêrekîre okuzigirana, ntà bulagîrire mugwêrhe bw’okuyandikirwa, kulya kubà Nyamuzinda yêne wammuyigîrizagya okuzigirana mwêne na nnene, 10erhi kwo munayôrha mujirira bene wîrhu boshi b’omu Macedoniya yoshi. Rhummuhûnyire nti muyûshûle okujà embere, bene wîrhu. 11Mucîsêze okukarhûza, na ngasi muguma ashîbirire omulimo gwâge, munakole n’amaboko ginyu, nka kulya rhwammurhegekaga. 12Ntyo olugendo lwinyu luyôrhe lushingânîne omu masù g’abâli embuga#4, 12 Abâli embuga, bo balya bahali b’omu mulala gwîrhu gw’abemêzi (1 Kor 15, 12)., na ntâye mwalagîrirakwo.

Abazîne n’abafîre olusiku Nyakasane agaluka

13Bene wîrhu, rhurhalonza muhabe olw’abafîre, lyo murhag’ifà mutula ak’abandi barhajira bulangâlire#4, 13 Abandi barhajira bulangâlire; bo bapagani abo.. 14Akabà rhuyêmîre oku Yezu afîre anafûka, ntyo kwo abafîre muli Yezu nabo banayish’ibà: Nyamuzinda anabahêke bo naye. 15Okûla rhummubwîzirekwo n’obuhashe b’Oluderho lwa Nyakasane: rhwe rhucizîne, rhwe rhwâbè rhuciriho amango Nyakasane agaluka, rhurhakashokolera abafîre. 16Bulya, oku cimanyîso, oku izù lya Malahika mukulu n’oku mushekera gwa Nyamuzinda, Nyakasane yêne anayandagale, kurhenga empingu, n’abafîre muli Kristu bo bâfûke barhanzi. 17Okubundi nîrhu, rhwe nabo omu bitù, rhuj’ishimânana na Nyakasane omu malunga; na ntyo rhwâbêre na Nyakasane ensiku zoshi. 18Mukaz’irhûlirizanya n’ebyo binwa.

Currently Selected:

1 Batesalonika 4: MKB

Highlight

Copy

Compare