1 Petro 2
2
Obwîrhôhye
1Kuziga mulekage ngasi bubî na ngasi bunywesi, obulyâlya n’obuyâgalwa na ngasi kalimi kabî. 2Nka rhubonjo rhwaciburhwa, mushwîre amarhà minjà g’obunya-mûka, lyo mukula munahike omu bucire, 3akabà mwalabwîre#Lul 34(33), 9 oku Nyakasane abà mwinjà!
Obudâhwa buhyâhya
4Mumujêho! Kali ye lirya ibuye ly’obuzîne abantu balahiraga, ci lirhôle na lya citwîro cidârhi omu masù ga Nyamuzinda! 5Ninyu mubè nka mabuye gazîne, mujè omu bûbake bw’enyumpa y’obunya-mûka, muhinduke badâhwa batagatîfu b’okurherekêra enterekêro z’obunya-mûka zasîmîsa Nyamuzinda oku bulagizi bwa Yezu Kristu. 6Bulya kuyandisirwe, mpu#Iz 28, 16; Rom 9, 33; 10, 11.: Ka murhabwîni oku mpizire omu Siyoni ibuye-kaboko ka nyumpa, liri lirhôle na lya citwîro cidârhi; na ngasi yêshi wacîlikubagîre arhakabona nshonyi. 7Nêci, kuli mwe obukuze, mwe bemêzi; ci abalahîre okuyêmêra, ibuye abûbasi bagayaguzagya, lyâyish’ibà kaboko ka nyumpa, 8lihinduke ibuye ly’okusârhaza n’ery’okuhirimya#Iz 8, 14.. Balisârhalakwo, kulya kubà barhayêmêra Oluderho#2, 8 Olwo Luderho, yo Myanzi y’Akalembe Abayahudi balahiraga okuyankirira., n’obwo olwo Luderho lwo bàlemeragwa. 9Ci mwêhe muli ishanja lîshogwa, muli badâhwa b’ebwâmi, muli mulala Mutagatîfu, muli lubaga lurhôle Nyamuzinda acungulaga mpu mukâyimba ebirhangâzo by’olya wammukûlaga omu mwizimya, ammuhamagala mpu mujè omu bulangashane bwâge bw’okusômeza; 10mwe murhali lubaga lwâge mîra, buno mukola lubaga lwa Nyamuzinda; mwe murhagwêrhe cababalira, buno mukola mubêrîrwe obwonjo.
Oku abemêzi bakwânîne okuyôrha ekarhî k’abapagani
11Bîra bâni, mmuhûnyire, mwe muli nka bigolo na nka babalama en’igulu, nti mucîlange oku iralà ly’omubiri likâlwîsa omûka. 12Olugendo lwinyu lubè nkana ekarhî k’abapagani. Ciru bankammunywerhera mpu muli banyankola-maligo, babone ebijiro binyu binjà banakuze Nnâmahanga olusiku ayish’ibarhandûla#2, 12 Olwo lusiku, lwo lusiku lw’olubanja luzinda. Abapagani bayish’ishimba olwiganyo lw’abakristu, bakayankirira obuyêmêre, bayish’ijà omu irenge ly’akalamo k’ensiku n’amango. .
Okukenga abakulu b’ecihugo
13Mukaz’iyumva ngasi murhegesi w’en’igulu erhi Nyakasane orhuma: akabà mwâmi, mumukengêre obukulu bwâge; 14akabà barhambo, bulya barhumirwe naye, mpu bahane ababî banakunge abajira aminjà.
15Ntyo kwo Nnâmahanga alonza: mpu omu kukola aminjà, mudumye abahwinja, barhishi bici. 16Olugendo lwinyu lubè lwa bantagengwa, ci arhali bantagengwa balonza obulyo bw’okufulika obubî bwâbo, ci nka barhumisi ba Nyamuzinda. 17Mukâkenga ngasi muntu; muzigire bene winyu; murhînye Nnâmahanga; mukenge mwâmi.
Abashizi bayumve bannawâbo
18Mwe bashizi, mukâyumva bannâhamwinyu munabarhînye, arhali abinja n’abantu nkana bônene, ci n’abadârhi. 19Bulya guli mugisho, okulembera amalibuko omuntu arhakwânîni erhi Nyamuzinda orhuma. 20Ndi wankakungirwa okubà alembîre empîmbo obubî bwâge bwàli bukwânîne? Ci erhi mwankalembera amalumwa n’obwo mwajizire kwinjà, gwo mugisho ogwo embere za Nyamuzinda.
21N’eco co mwahamagaliragwa, bulya Kristu alibuzîbwe erhi mwe murhuma, ammusigîre olwiganyo mpu mushimbe enshando zâge, 22Yêhe àrhajiraga câha, n’obulyâlya burhabonekaga omu kanwa kâge. 23Erhi babà badwîrhe bamujâcira, arhagalulaga bijâci; erhi bakamulibuza, acîhumbira; ci acîhira omu maboko gw’Omucîranuzi otwa emmanja n’oburhondekezi. 24Ye wacîbarhuzagya ebyâha bîrhu omu mubiri gwâge oku murhi gw’omusalaba, mpu lyo rhufa oku byâha, rhunalamire obushinganyanya. Nêci, bibande byâge byàrhufumagya. 25Bulya mwâli muyôsire nka bibuzi birhêresire, ci buno mwashubîrîre lungere n’omulanzi w’emyûka yinyu.
Currently Selected:
1 Petro 2: MKB
Highlight
Share
Compare
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.
