مَتّی 19

تعلیم دربارۀ طِلاک

1موکعی که عیسی ایی گَپُنُ تَمُن ایکه، اَ منطکه جلیل در بو و اَ اُ طَرَه رود اُردن وا منطکه یهودیه رَه. 2جمعیت زیادی دُمبال عیسی راه کَفتَن و عیسی به اُشُ شفا ایدا.

3عالموی فرقه فَریسی پهلو عیسی هُندِن و وا خاطریکه به اُ امتحانی بُکنِن اَزی شُپُرسی: «شرعاً مرد اجازه ایشَه به زن خو به هر دلیلی طِلاک هادِه؟» 4عیسی جواب ایدا: «مگه توو نوشته‌ئُوی مقدّس تُنَخوندِن که، اُ اَ شروع خلکت ”به اُشُ مرد و زن خَلک ایکه.“ 5و ایگو: ”وا خاطر همی اَم، مرد اَ بَپُ و مُم خو جدا اِبو، به زن خو اَپِیوَندِه و اُ دو نُفر یَک تن اَبِن“؟ 6پَ دگه اُشُ دو تن نَهَن بلکه یَک تنَن. پَ اُچه که خدا به هم پیوند ایدادِن، انسان نبایه جدا بُکنت.» 7اُشُ به عیسی شُگُفت: «پَ به چه موسی پیغُمبَر حکم ایکه، که مرد به زن خو طِلاکنومه هادِه و به اُ ول بُکنت؟» 8عیسی بهشُ ایگو: «اَ بس که دلتُ سنگَ موسی ایواشت که به زنُ خو طِلاک هادِین، ولی اَ شروع خلکت ایطو نَهَه. 9به شما اَگَم، هَرکَ به زن خو به جز به علت زنا طِلاک هادِه و یه زن دگه بِگِنت، زنا ایکِردِن.»

10شاگردُن به عیسی شُگُفت: «پَ با ایی حساب همو زن و شو نَگِفتِن بِهتِرن!» 11ولی عیسی به اُشُ ایگو: «هَرکَ هم ناتون ایی گَپُ کبول بُکنت، مگه کسوئی که اَ طَرَه خدا عطاش به اُشُ داده بودِن. 12چونکه بعضی خواجه‌ئُو هَستَن که اَ اُشکُم مُم خو ایطوکا وا دنیا اَتان و بعضی خواجه‌ئُو هم هَستَن که وا دَسِ آدمُ خواجه بودَن و بعضیُ هم وا خاطر پادشاهی آسَمُن به خوشُ خواجه به حساب اَتارِن. بُوال هَرکَ اِتون اییُ کبول بُکن، کبول بُکنت.»

بُوالی چولنگُ پهلو مه بیان

13اُغایه مردم به چولنگُ حد عیسی شُوا تا رو اُشُ دَس بُنوسِه و دعا بُکنت. شاگردُن به مردم نهیب شُدا. 14ولی عیسی ایگو: «بُوالی چولنگُ پهلو مه بیان و جلوشُ مَگیری چون پادشاهی آسَمُن، مالِ ایطو کسونِن.» 15بعدِ ایی گَپ عیسی رو چولنگُ دَس اینِها، به اُشُ برکت ایدا و اَ اُجا رَه.

جَوُن پولدار

16یه رو یه مرد پهلو عیسی هُند و ایپُرسی: «استاد، چه کار خُبی بایه اَنجُم هادَم تا زندگی ابدی اُمبَشِت؟» 17عیسی جواب ایدا: «به چه اَ مه سؤال اَکُنی چه خُبِن؟ فَکَه خدان که خُبِن. اگه تَوا وارد زندگی ابدی بِشی، حکموی خدائو اَنجُم هادَه.» 18اُ مرد اَ عیسی ایپُرسی: «کَمتِی اَ حکمُ؟» عیسی ایگو: «”کَتل مَکُن، زنا مَکُن، دُزی مَکُن، گواهی دورو مَدَه، 19به بَپ و مُم خو احترام بُنوس“ و ”به هَمسادَت مثه خوت دوست اِتبَشِت.“ 20اُ جَووُن ایگو: «همۀ ایی حکمُ اَنجُم اُمدادِن، دگه چه کم اُمهَستِن؟» 21عیسی جواب ایدا: «اگه تَوا کامل بِشی، بِرَه هرچه که اِتهَستِن بُفروش و به فَخیرُ هادَه، که تو توو آسَمُن گنج اِتَن. اُغایه بُدو و اَ مه پیروی بُکن.» 22اُ مرد جَووُن وختی ایی گَپُ شِشنُت، غُصَتش ایگِه و اَ اُجا رَه، چون خیلی پولدارَه.

23اُغایه عیسی به شاگردُنُ خو ایگو: «حکیکتاً به شما اَگَم، داخل بودِن پولدارُ به پادشاهی آسَمُن، خیلی سختِن. 24دوبارَه بهتُ اَگَم که رد بودِنِ اُشتُر اَ سولاخ سوزن راحت تِه اَ ایین که یه آدم پولدار داخل پادشاهی خدا بَشِت.» 25شاگردُن وا شنیدن ایی گَپ ماتِشُ ایزَه و شُپُرسی: «پَ کِ اِتون نجات پیدا بُکنت؟» 26عیسی بهشُ نگاه ایکه و ایگو: «ایی به آدمیزاد غیرممکنِن، ولی بِی خدا همه چی ممکنِن.»

27اُ موکَع پطرس ایگو: «بیگین ما همه چی خو ول مُکِردِن و دُمبال تو هُندِیم. پَ چه گیرُمُ اَتا؟» 28عیسی بهشُ ایگو: «حکیکتاً به شما اَگَم، توو دنیای جدید موکعی که پُسِ انسان روی تخت پُر جلال پادشاهی خو بِنینگِت، شما هم که دُمبال مه هُندِین رو دوازده تخت اَنینگین و به دوازده طِیفه کوم یهود حکم اَکُنین. 29و هَرکَ وا خاطر نُم مه لَهَر خو یا کاکائُنِ خو یا دادائُنِ خو یا بَپُ خو یا مُمُ خو یا چوکُ خو یا زمینُ خو ول ایکِردَه بَشِت، صد برابری وا دَس اَتارِه، زندگی ابدیُ ارث اَبَرِه. 30ولی خیلیُ که اَوِّلین آخِر اَبِن، و آخِریُ اَوِّل اَبِن!

Currently Selected:

مَتّی 19: PES

Highlight

Copy