مَتّی 14

مرگ یحیای تعمیددهنده

1وختی که هیرودیسِ حاکم دربارۀ معجزه ئُوی عیسی شِشنُت، 2به آدمُ خو که نوکری شاکِه ایگو: «ایی یحیای تعمیددهندَن که زنده بودِن و وا خاطر همین که ایی معجزهُ اَنجُم اَدِت.»

3چونکه هیرودیس وا خاطر هیرودیا که زنِ کاکاش فیلیپَ، به یحیی ایگِفتَهُ و توو زندون ایکَردیدَه. 4چونکه یحیی به اُ ایگُفتَه: «حلال نین که با ایی زن بِشی.» 5هیرودیس شَواستَه به یحیی بُکُشِه، ولی اَ مردم شَتِرسی، چون مردم به یحیی یه پیغُمبَر شادونِستَ.

6ولی توو روز جشن تولد هیرودیس، دُهت هیرودیا توو مجلس چِمَک ایکه هیرودیس هم ایکَک خاشی هُند 7که کَسَم ایخا هرچه که اُ دُهت شَوا بهش هادِه. 8دُهت هم با تحریک مُمِش ایگو: «سر یحیای تعمیددهنده ئو همی جا توو دیس به مه هادَه.» 9پادشاه خیلی ناراحت بو، ولی وا خاطر کَسَمی که ایخاردَه و به احترام مِهمُنُش فَرمُن ایدا خواسته دُهتُ اَنجُم هادِن. 10پَ هیرودیس آدم ایفِرِستا و توو زندون سر یحیی ئو شُزَه، 11و سَری توو دیس شُوا و به دُهت شُدا. دُهت هم پهلوی مُمِش ایبُرد. 12شاگردُنِ یحیی هُندِن و به جسد یحیی شُبُرد، خاکی شُکِه و بعد رفتِن و به عیسی خبر شُدا.

خوراک دادن به پنج هزار نُفر

13وختی عیسی ایی خبرُ شِشنُت، سوار کایِک بو و اَ اُجا به یه جایِ پرتی رَه. ولی موکعی که مردم واخبر بودِن، اَ شهرُ خو وا پا پیاده دُمبال عیسی راه کَفتَن. 14وختی عیسی اَ کایِک زیر هُند، جمعیت زیادی ایدی و دلی به اُشُ درد ایکه و به مریضُشُ شفا ایدا.

15غایه غروب، شاگردُن حدِ عیسی هُندِن و شُگُفت: «ایجا جایِ پرتین، شُو اِبودِن. به مردم بفرست تا به بالاشهروی دور و وَر بِرَن و به خو خوراک بِگِرِن.» 16ولی عیسی ایگو: «نیازی اینین مردم بِرَن. شما خوتُ بهشُ خوراک هادِین.» 17شاگردُن شُگُفت: «ولی ایجا فَکَه پنج تا نُن و دو تا مُئی مُهَه.» 18عیسی ایگو: «بیاری به مه هادِی.» 19بعد به مردم فَرمُن ایدا تا رو سبزهُ بِگِرِن بِنینگِن. اُغایه عیسی پنج تا نُن و دو تا مُئیُ ایگِفت، به آسَمُن نگاه ایکه و به اُ نُن و مُئیُ برکت ایدا. بعد نُنُ ئُو پَرک ایکه و به شاگردُن ایدا و شاگردُن هم به مردم شُدا. 20همه شُخا و سیر بودِن و اَ خُردَه تکه ئُویی که موندَه دوازده گیفیر پُر جمع شُکِه. 21جمعیت کسوئی که شُخاردَه جُلَ زَنُن و چوکُ، پنج هزارتا مرد هَستَه.

عیسی روی هُوو راه اَرِت

22درجا عیسی به شاگردُن خو بلند ایکه تا همیطو که خوش به مردم شَفِرِستا، شاگردُن سوار کایِک بَشِنُ و کَبل اَ عیسی به اُ طَرَه دریاچه بِرَن. 23بعد اَ فرستادِن مردم، خوش تهنا وا کوه رَه تا دعا بُکنت. شُو بو و عیسی اُجا تهنا هَستَه. 24همی موکَع، کایِک اَ لُو تیُو خیلی دور بودَه و گرفتار مُجُئَه، به چه که باد نعشی شَهُند. 25تقریباً ساعت سه شُو، عیسی همیطو که رو هُوو راه شَرَه طَرَه اُشُ رَه. 26وختی شاگردُن شُدی عیسی رو هُوو راه اَرَفتِن، دل تَرَک بودِنُ، اَ تِرس غار شُزَه شُگُفت: «روحِن»، 27ولی عیسی درجا به اُشُ ایگو: «دلتُ کُرص بَشِت. مه اَم مَتِرسی!»

28پطرس جواب ایدا: «سرورُم، اگه تویی، فَرمُن هادَه تا مه اَم رو هُوو پهلوت بیام.» 29عیسی ایگو: «بُدو!» اُغایه پطرس اَ کایِک در هُند و رو هُوو راه رَه و طَرَه عیسی رَه.

30ولی وختی دور و وَر خو نگاه ایکه مُجُنِ بلندی ایدی، تِرسی و تو هُوو کَفت، همیطو که توو هُوو شَرَفتَه غار ایزَه: «سرورُم، به مه نجات هادَه!» 31عیسی درجا دَس خو دراز ایکه و به اُ ایگِفت و ایگو: «ای کم ایمُن، به چه شک اِتکه؟» 32وختی سوار کایِک بودِن، باد کَ. 33کسوئی که توو کایِک هَستَرِن، به عیسی سجده شُکِه، شُگُفت: «واکعاً که تو پُس خدایی!»

عیسی مریضُنُ توو جِنیسارِت شفا اَدِت

34وختی اُشُ وا اُ طَرَه دریاچه رِسیدن، توو منطکه جِنیسارِت اَ کایِک زیر بودِن. 35وختی مردمِ اُجا به عیسی شُشناخت، به تَمُن اُ منطکه آدم شُفِرِستا، که خبر هادَن تا همه به مریضُ خو حد عیسی بیارِن. 36اُشُ اَ عیسی خواهش شُکِه بُواله تا فَکَه به بُشِ جِمه‌اَش دَس بِزَنِن، و هَرکَ دَس شَزَه، شفا شَگِه.

Currently Selected:

مَتّی 14: PES

Highlight

Copy