2 Amateka 3
3
1Salomo atangira kubaka Ingoro y'Uhoraho i Yeruzalemu ku musozi wa Moriya,#Moriya: ni ho Aburahamu yari agiye kwicira Izaki. Reba Intang 22.2 ku mbuga ya Arawuna#Arawuna: reba 2 Sam 24.16-24; 1 Amateka 21.18. w'Umuyebuzi. Aho ni ho se Dawidi yari yarateguye kubera ko ari ho Uhoraho yamubonekeye. 2Yatangiye imirimo yo kubaka mu kwezi kwa kabiri, mu mwaka wa kane ari ku ngoma. 3Dore ingero z'Ingoro Salomo yubakiye Imana: uburebure bwari metero mirongo itatu, ubugari bukaba metero icumi. 4Uburebure bw'ibaraza ry'Ingoro bwari metero icumi bungana n'ubugari bw'iyo Ngoro, naho ubugarike bwari metero mirongo itandatu. Nuko imbere mu Ngoro ahomeka izahabu inoze. 5Inkuta z'Icyumba kizira inenge zari zubakishijwe imbaho z'amasipure zometseho izahabu inoze, maze ashushanyaho imikindo n'imitako imeze nk'iminyururu. 6Icyo Cyumba agitākisha amabuye y'agaciro. Naho izahabu yakoreshaga yaturukaga i Paruvayimu. 7Mu Ngoro ahomeka izahabu, ayomeka ku nkingi no mu rwinjiriro, no ku nkuta no ku nzugi, kandi ku nkuta ashushanyaho abakerubi.
8Hanyuma yubaka Icyumba kizira inenge cyari gifite uburebure bungana n'ubugari bw'Ingoro. Uburebure bwari metero icumi n'ubugari ari metero icumi. Acyomekaho izahabu ipima toni makumyabiri. 9Uburemere bw'imisumari yakoreshejwe bwanganaga na garama magana atanu y'izahabu. Ibyumba byo hejuru na byo abyomekaho izahabu.
10Mu Cyumba kizira inenge cyane ahashyira amashusho abiri y'abakerubi, ayomekaho izahabu. 11-12Buri baba ry'umukerubi ryari rifite metero ebyiri n'igice z'uburebure. Ibaba rimwe rya buri mukerubi ryakoraga ku rukuta rw'Ingoro, irindi baba na ryo rigakora ku ry'undi mukerubi, ku buryo amababa y'abo bakerubi bombi yari afite uburebure bwa metero icumi. 13Abo bakerubi bari bahagaze berekeye Icyumba kizira inenge. 14Salomo aboha umwenda wo gukinga Icyumba kizira inenge cyane, ufite amabara y'isine n'umuhemba n'umutuku n'umweru, awufumaho amashusho y'abakerubi.
Inkingi z'imiringa n'urutambiro
(1 Bami 7.15-22)
15Salomo akora inkingi ebyiri azishyira ku ibaraza ry'Ingoro. Buri nkingi yari ifite metero icyenda z'ubuhagarike, ifite n'umutwe uyiteretseho wari ufite metero ebyiri n'igice. 16Akora imitako imeze nk'iminyururu isobekeranye, ayishyira ku mitwe y'izo nkingi. Muri iyo minyururu ashyiramo amashusho ijana y'imikomamanga. 17Ashinga izo nkingi ku ibaraza ry'Ingoro. Inkingi yo mu majyepfo ayita Yakini, iyo mu majyaruguru ayita Bowazi#Yakini … Bowazi: iryo zina Yakini risobanurwa ngo “Imana irakomeza”, naho Bowazi risobanurwa ngo “Muri Yo hari imbaraga”..
Currently Selected:
2 Amateka 3: BIR
Highlight
Copy
Compare
Share
Want to have your highlights saved across all your devices? Sign up or sign in
Bibiliya Yera © Bible Society of Rwanda, 2001
