Pilipae 4
4
Na paranga vaivaneqi
1Ko sa vei sa, ka visa tavitiqu, agou sa na baere jonga taqu beto qa manoga kukulinigou ara. Agou sa na qera beto na tarapae vinasari pinia taqu, ko mu turu paragasa tana Bangara sagou, ka visa baere jonga. 2Qa tepa vivitigia ara si Iudia beto qa tepa vivitigia ara si Sunituke ko ira karu rereko aipira sa mai mekarai pana dia roroqu beto na dia susuvere tutina na Bangara. 3E, ko ara qa tepaigo tugu vei sao, na tinoni qu vaitokai vatelania na pogoso mamata, ko mu tokaniria sira karu rereko pira ko mai vaivamomoso. Ira karu rereko aipira sa qai mekarai roiti viviva tavitisiu ara pana vareregena na nongoro jongana, beto vei tugu i Kelemeniti beto ira doru qai mekarai roiti tavitisiu ara, ira na isongodi sa takuti pana buka sa kolea na isongodi ira qai isongia na toa. 4Mu qeqera doru totoso pana miu somana tana Bangara. Ma kai pojai mule: mu qeqera!
5Mu vadogoroniria ira na doru tinoni na miu vajongana lao tana goto tinoni. Na Bangara sa tata lame. 6Muke takulanga goboronia kai sa, goto na veveina doru kai sa sa mu vanongoronia na Tamasa sira na miu nyorogua pana miu vavara beto pana miu tetepa sa tavitia na paranga jongana. 7Ko na bule tana Tamasa, na bule sa ululu jolaniria doru gigalai, mina vasare vamanotia na bulomiu beto na roqumiu pana tutina i Jisu Karisito.
8Na vinaokotona, ka visa tavitiqu, aipira sira na uana tavagigala jongadi beto qai tatavaragua, ko ira sa mu vakoleria pa roqumiu: isa sa sosoto, isa sa tapangaga, isa sa tuvisi, isa sa lioso, isa sa bata jonga, beto isa qai rove vajongai ira na tinoni. 9Beto ko ira na sakasava qu gigalainiria, qu tekuniria, qu nongoroniria, beto qu batiniria taqu, sa mu roitiniria. Ko na Tamasa bule mina vavaburogou sagou.
I Paula sa paranga jonganania na vaivana
10Ara qa qeqera vivitiginia pana qua kole kame tana Bangara sa agou kopira tu na miu roroqu lame taqu sa tutugu ligu mule. Sosoto, qu kole roroqusiu tugu agou sara, ba quke boka batia kai lolomo jongana ko bu vabatinisiu. 11Kita mu rorovea sa vaivasevi gu sa soni paranga vei inara kita mugunisiu, ura ara qa tei siranania tu sa bi ai bi jongana vei babi ikerena vei sa na susuvere ba ara sa qake nyoguania mule kai sa. 12Qa gigilaiqua tugu ara sa ai sa vevei tonai sa qasa vaivasevi na tinoni, beto qa gigilaiqua tugu ara sa ai sa vevei tonai sa isongo vapugele nyonyoa na tinoni. Ara qa tei tomea tu ko qa sirana vatalenia sa bi ai susuvere veveveina, bi na totoso pote babi na totoso burana, bi na totoso pugele nyonyoa babi na totoso ivulu vaivasevi. 13Pana neqi tana isa sa vanisiu na neqi sa ara qa boka taleria gu sa doru kai sa. 14Ba na roiti jongana sa qu roitinia agou ko qu somana tokanisiu pana qua totoso tapata.
15Ko agou pa Pilipae mekamiu ba qu gigila vataleamiu sa pa popodalaina totonai sa koni tatarae tamugou na nongoro jongana tonai qa taloa pa Masidonia sara, sa kepore kai ekelesia bi somana tavitisiu ara pana iana beto na tekuna na vaivana, goto agou gu. 16Ura tonai tu qa suvere pa Tesalonika ara ba agou nake kai totoso sa qu garunu lamenia sa na miu vaitokai tonai sa keporenisiu ara. 17Nake vei ko qa korapa nyaqoa ko mu iasiu agou qau sa, goto ara qa korapa nyaqoa sa na vuana isa mi taanye tamo lao tadira na miu roiti jongadi qu roitiniria. 18Ko ara qa tei tekuria tu doru kai sa ko kopira qa pugele nyonyoa! Qa tei teku vakarovoria tu pana tai Epaporoditasi ara sa na vaivana qu valame vanisiu agou. Ko kopira sa pugele nyonyosiu na vaivanva. Na vaivana aipira sa qai vei na vaivana umumanga jongadi, na vavakukuvu qai garo beto qai vaqera vivitigia na Tamasa. 19Ko ira doru kai sa qu ivuluniria sa na qua Tamasa mi vapugelenigou na ona isisongo lavata sa kole tana Karisito Jisu. 20Na Tamasa na Tamada mi tavalavata beto mi tavatarasae ko mi kamua na kamua. Agua.
Na Paranga Vinaokotona
21Mu pojaniria na qua roroqu ira doru tinoni tana Tamasa qai tutia i Jisu Karisito ketakoi. Ira na turaqu qai tutia na Karisito qai korapa suvere tavitisiu ara aipira qai garunu laonia na dia roroqu tamugou. 22Ira doru tinoni tana Tamasa lani sa qai garunu laonia na dia roroqu, vei tugu ira qai roiti pana ruma tai Siza na kuta bangara.
23Na vairoqu vaialona tana Bangara i Jisu Karisito mi somana tamugou.
Currently Selected:
Pilipae 4: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
