Giburu 10

1Na Vavanau tadira na Jiu sa nake kirena sosoto ira na sakasa sosotodi pa noka, goto na ongudi gu na sakasa jongadi sa taringungutiniria na Tamasa. Kai muqisi vavakukuvu gu sa qai tavavakukuvunia doru totoso na doru vaituti aoro gu. Ba na Vavanau sake boka sosoto valiosoria sira na tinoni qai lame tana Tamasa. 2Vei bi kai totoso gu bi tavalioso sa na dia sela sira na tinoni qai vatarasaea na Tamasa, poni sa baike kole roroqu takulangania ira pa monanadi sa na dia sela ko baike roiti gogojonia na vavakukuvu sira na tinoni. 3Ba na vavakukuvu tugu ira sa doru aoro qai kole varoroquniria na dia sela sira na tinoni. 4Ura na orungudi na bulumakau beto na qoti sa qaike boka sosoto vulasia sa na sela tadira na tinoni.

5Ko sa vei sa tonai sa vanaqiti lagere pa kasia gusu sa na Karisito poni sa paranga lao tana Tamasa, pira sau,

<<Na vavakukuvu beto na vaivana sa ao quke nyoroguaniria.

Ba qu vanaqiti vanisiu kai tini sara.

6Ira na manugu qai taparugu doruru pa vavakukuvuna babi kaki vavakukuvu vulasadi na sela

sa ao quke qeraniria.

7Beto pira qau,

<Api sara, Tamasa, qa vanaqiti ko mana roitinia ara sisa vei qu nyoroguania ao,

kai muqisi vei tugu sa tei takuti tu na veveiqu ara pana buka sa kolea na Vavanau,> qau,>> sau sa na Karisito.#Kera Vinatarasae 40.6-8.

8Isa sa tapoja momoe sa pira sau, <<Na vavakukuvu beto na vaivana manugu qai taparugu doruru pa vavakukuvuna beto kaki goto vavakukuvu vulasadi na sela sa ao quke nyoroguaniria beto quke qeraniria,>> ba pira tugu sa na vavakukuvu sa vaigarununia na Vavanau.#Kera Vinatarasae 40.6. 9Beto sa pira sau, <<Api sara, qa lame ko mana roitinia ara sisa vei qu nyoroguania ao,>> sau. Ko na vavakukuvu momoe sa kepore na dia neqi ba na vavakukuvu tana Karisito sa pore neqina.#Kera Vinatarasae 40.7. 10Ko pana ginugua vei na Karisito sa roitinia sisa vei sa nyoroguania na Tamasa, poni sa taqe tavalioso pana oda sela sa gita tonai sa vaivanania na tinina sisa pana kai memeka totoso pupusalai gu.

11Ira doru iama sa qai turu pa moena na ia vavakukuvuna ko qai roitinia na dia roiti doru aoro beto kai muqisi vavakukuvuna gu sa qai vavaivananiria soku totoso, ba na vavakukuvu ira sa qaike boka vulasaria sa na sela. 12Ba na Karisito sa vaivanania ko na vulasadi na sela sa kai vavakukuvu gu, beto sa toqo keta pa kale matuana na Tamasa, isa na totoqona poreveveina jola, ko mina kamua na kamua. 13Ko kopira sa korapa vera vatalenia sa totonai mai tavakilasa ko mai tavakole pa kauruna sira nona kana. 14Ura kai memeka vavakukuvu gu sa sa valiosoria sira na tinoni qai korapa tavamadi pana dia toa.

15Na Gagala Tabuna mekana sa ule vanigita sa na vavakukuvuna na Tuna sa sa garo. Ura pira sau sisa,

16<<Api sa na vinaego mana roitinia ara pana tadira pana rane qai korapa lame pori, sau sa na Bangara:

Mana vakolea pa bulodi sira na qua Vavanau beto mana kutiria pa roqudi.#Jeremae 31.33; Giburu 8.10.

17Na dia sela beto na dia roiti ikikeredi

sa manake isongo roroqu laoria ara,>> sau.#Jeremae 31.34; Giburu 8.12.

18Ko tonai qai taleoso sira na sela, poni sa kepore mule sa kai vavakukuvu bi tanyorogua mule.

Aria ko ta tata lame tana Tamasa gita

19Ko sa vei sa, ka visa tavitiqu, pana orunguna i Jisu taqe taruvata sosoto sa gita ko kopira taqeke matagutu tome laoa gita sa na Ia Madina Jola. 20Isa sa revanga vanigita kai soana koregana na soana toana ko gita taqe boka tutia na soana isa lao ketakoi sa suveria na Tamasa, kai muqisi podeke vei na kuta iama sa lao vei pana poko sa tobai na Ia Madina. Ko i Jisu sa roiti vei isa tonai sa vaivanania na tinina mekana pa korosi, ko na tinina sa sa vei na toba poko. 21Taqe isongia gita sa kai iama poreveveina isa sa kopunia na ruma tana Tamasa. 22Ko aria ko ta tata lame tana Tamasa pana bulo sa sosoto beto pana rarange neqina, ura na buloda qai tei tavalioso tu pana monana ikeredi beto ira na tinida qai tei tavakorega tu pana kolo liosona. 23Ta aru tamana vamauru tonai taqe korapa vera vatalenia sisa mina roiti vanigita na Tamasa, ura na Tamasa sake boka teteria sira nona taringunguti. 24Ta mekarai vaidogoro ko ta vaivaneqi pana vairoqu beto pana roiti jongadi. 25Take aru loloai sa na oda vavaikamu pana toa vinatarasaena na Tamasa. Ira kaki sa qai tei toa vei tu ko sake jonga sa sa vei isa. Goto gita sa ta mekarai paranga vaivaneqi ura qu gigilaimiu agou sa na rane tana Bangara sa rijo tata lame sa kopira.

26Ura vei tabe vilea ko tabe toa lalaodia pana sela pa liguna taqe tei teku vakatapia tu gita sa na nongoro sosotona, poni sa kepore mule sa kai vavakukuvu mina boka vulasaria na oda sela. 27Goto na totoso isa sa isa gu sa kole ko mina tavera vatatale sa na vaipitu vaivamatagutuna beto na memea iku lavata mina ganiriagana sira na tinoni qai kanai na Tamasa. 28Na tinoni sa daiona vatabea na Vavanau ti Mosese gu ba sake taroqu goto sa tavamate pale pa liguna qai vavakato sa karu ba kue tinoni ko sa tapoa sa na sela tana. 29Ko mina vei sa ai mina koi vei lavatana sa na vinakilasa na padana na tinoni sa tete anyanyunia na Tuna na Tamasa, sa doro veinia kai sakasa goborona sa na orungu sa vatoqoa na vinaego tana Tamasa beto sa vulasia nona sela, beto ko sa poja vivikeria sa na Gagala sa vadogoronigita na vairoqu! 30Ura taqe gigilaioda gita sa isa sa paranga vei pira, <<Ara sa mana vaibeiqua, ara mana vagosoro talenigou na tapata sira na sela qu roitiniria,>>#Vavanau 32.35; Romu 12.19. sau. Beto pira mutu sau, <<Na Bangara mina pituria nona tinoni,>>#Vavanau 32.36; Kera Vinatarasae 135.14. sau. 31Na sakasa vaivamatagutuna jola sa tonai na tinoni mina tavakilasa pa limana na Tamasa toana.

32Ba mu roroqua agou sa isa sa vevei na miu toa perangaina. Totonai qu koni batia na kabere tana Tamasa sa qu gosororia soku tapata, ba qu vangajuria sira na vitigi. 33Kaki totoso sa qu tapoja vivikere beto qu tangangulu pa moedi na tinoni, goto kaki totoso sa qu malumu gu ko mu somana tavitiria sira qai tangangulu pana soana vei isa qugu. 34Qu somana gosororia agou sira na vitigi qai gosororia ira na tinoni qai tapiu talenia na veveina na Karisito, beto ko totonai qai teku variunigou sira na miu isisongo sa qu qera gu, ura qu gigilaimiu agou sisa na sakasa sa taringungutinigou na Tamasa sa qu korapa isongoria gu agou, ko ira tu sa na sakasa qai poreveveina jola beto mai kole jola. 35Ko sa vei sa muke munyala tonai mu tangangulu, ura vei munake munyala sa kode muna tekua agou sa na pinia lavatana. 36Goto agou sa mu turu vangaju tu, ko mu boka roitinia agou sa isa sa nyoroguania na Tamasa beto sa muna tekua agou sa nona taringunguti. 37Ura pira sau sa na Kukuti Tabuna,

<<Nake sovaina sa na totoso sa kole,

beto isa sa korapa lame sa mina lame kamu.

Ko kode minake vavabongi sisa.

38Ba na qua tinoni tuvisina mina toania na rarange,

goto na tinoni sa gabala mule,

sa ara qake qerania sisa,>> sau.#Gabakuku 2.3-4.

39Ba gita sa nake tinoni vevei ira qai gabala mulea na dia toa leluna ko qai muma. Goto gita sa na tinoni taqe rangea na Tamasa ko taqe taalo pana oda toa.

Currently Selected:

Giburu 10: LGA

Highlight

Copy

Compare