Kolosi 3

1Ko qu tei mekarai turu mule tavitia tu na Karisito sagou, ko sa vei isa sa mu nyaqoria agou sira tu na sakasava pa nulu ketakoi sa tavatoqo na Karisito pa kale matuana na Tamasa. 2Mu roqu totoniria sira na sakasava pa nulu, nake sakasava pa peso. 3Ura qu tei mate tu sagou, ko kopira tana Tamasa tu sa kole golomo tavitia na Karisito sa na toa tamugou. 4Ko tonai mina bola votu sa na Karisito, isa na toa tamugou, poni sa agou ba muna somana bola votu tavitia tugu sisa ko muna somana isongia agou na ona malakapi.

Na Toa Leluna beto na Toa Koregana

5Ko sa vei sa mu vamateria sira na nyorogua tana pa peso qai kole pa miu toa, vevei na aru vabosi, na roiti valulasa, na nyonyorogua vavabosi, na nyonyorogua ikeredi, beto na isisongo muino sakasava- ura na muino isiongo sa na vatarasaena na tamasa sesekena. 6Ira na toa lulasadi aipira sa sa korapa lamenia na kokora tana Tamasa tadira qaike vatabea isa. 7Perangaina agou ba qu somana tutiria tu sa na toa vevei aipira tonai qu toaniria sa na toa lulasadi vei ira. 8Ba kopira sa mu loa paleria agou sira dorudi na roiti ikikeredi pira: na vavaikuo, na vavaikokora, na vavaiikerai lao lame, na vavaipoja vivikere, beto na vavavukele goboroniria na paranga qaike garo.

9Muke vaiseseke lao lame, ura qu tei ulu vagore palenia tu agou sa na toa leluna beto doru ona uana ikikeredi 10beto ko qu tei vasaea tu agou sa na toa koregana isa sa korapa tabei vakorega ko mu isongia sa na gigila vatalea agou sa na kirena isa sa vapodaka na toa koregana. 11Ko pana toa koregana api sa kepore sa na tinoni karovodi babi na tinoni Jiu, na tapobedi babi nake tapobedi, na tinoni karovodi, na tinoni pirudi, na pinausu babi na tinoni taruvatadi; goto doruna sa na Karisito gu beto na Karisito gu sa kole tadira dodoru.

12Na ona tinoni tavilena na Tamasa, na liosomiu beto sa roroqugou isa sagou. Ko sa vei isa sa mu toania agou sa na toa vairoqu, na vajongana lao tadira na tinoni, na vaiketai mule, nake sasuru gobororia ira na tinoni, beto na vera vamomoso. 13Mu doro vajola pale na sela tana goto tinoni beto mu mekarai vaitaleosae vei bi koleona sa kaki vaipaparanga pa vaikorapaimiu. Na Bangara sa taleosonigou sagou ko agou ba mu taleosonia tugu na goto tinoni. 14Tadira doru uana aipira sa mu vaokoto laonia sa na vairoqu, isa sa sa aru vaigosorai vataleniria doru sakasa. 15Na bule tana Karisito sa mi totolinia na bulomiu, na bule isa na ginuana sa kukunigou na Tamasa ko qu mekarai kame tinoni. Ko mu paranga jongana lao tana Tamasa. 16Na paranga tana Karisito mi toa masuru vatale tamugou, tonai qu vaivagigalai beto qu paranga vaivabalau pana uana tavagigala, beto tonai qu kera paranga jongana laoniria tana Tamasa pa bulomiu sira na kera vinatarasae, na kera lotu, beto na kera tabunadi. 17Beto doru roiti muna roitiniria, bi pana paranga babi pana uana, sa mu roitiniria pana isongona na Bangara i Jisu beto mu paranga jongana lao tana Tamasa na Tamada ura na tinoni tana Karisito sa gita.

Na Uana pana Toa Koregana

18Agou na rereko iviva, mu tuti viketairia sira na marenemiu ko mu toania sisa vei sa garo pana tutina na Bangara. 19Agou na marene iviva, mu roroquria sira na maqotamiu ko muke koti sasasururia. 20Agou na koburu, mu vataberia pana doru sakasava sira na tinamiu na tamamiu, ura isa sa na uana sa vaqerai na Bangara. 21Agou na tamadi, sa muke vavatagigiriria sira na tumiu, ura muna veiniria sa kode mai munyala pana dia popodeke.

22Agou na pinausu, mu vataberia pana doru sakasava sira na miu bangara pana toa tini. Nake tonai gu qai korapa dogoro kopunigou sa muna roiti vatale ko vei ko bai qeranigou ira na tinoni bugu, goto mu roiti pana bulo kaberena beto mu pangania sa na Bangara. 23Doru roiti qu roitiniria sa mu roiti vataleniria pana bulo jongana, vei qu korapa roiti vaniria nake tinoni goto na Bangara tu. 24Ura qu tei gigilai tu agou sa na Bangara tu mina vanigou sa na pinia isa sa kopu vaniria ira nona tinoni. Na Bangara na Karisito tu sa qu korapa nabulunia agou. 25Ura na tinoni sa roitinia na roiti ikikeredi sa mina tavakilasania tugu isa sira na roiti ikikeredi sa roitiniria, ura na Tamasa sake toka kalenia kai tinoni.

Currently Selected:

Kolosi 3: LGA

Highlight

Copy

Compare